សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ នៅក្នុងខែវិច្ឆិកា ឆ្នាំ២០២៤កន្លងទៅថ្មីៗនេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងថ្មីចំនួន៤០គម្រោង និងគម្រោងពង្រីកផលិតកម្មចំនួន៣គម្រោង ដែលមានទុនវិនិយោគសរុបប្រមាណ៩៤០លានដុល្លារអាម៉េរិក និងអាចបង្កើតការងារបានប្រមាណ៣៩ម៉ឺនកន្លែង។ ក្នុងចំណោមគម្រោងវិនិយោគសរុប គម្រោងនៅក្រៅតំបន់សេដ្ឋកិច្ចពិសេសមានចំនួន៣២គម្រោង នៅតំបន់សេដ្ឋកិច្ចពិសេសមានចំនួន១១គម្រោង។
ប្រភពដដែលនេះបានឱ្យដឹងថា៖ គម្រោងវិនិយោគដែលមានភាពលេចធ្លោជាងគេប្រចាំខែវិច្ឆិកាមានចំនួន៦។ នៅក្រៅតំបន់សេដ្ឋកិច្ចពិសេសគឺគម្រោងពង្រីកផលិតកម្មរបស់គម្រោងវិនិយោគសេវាទូរគមនាគមន៍មូលដ្ឋាន(ប្រព័ន្ធទូរស័ព្ទចល័ត)ដែលមានទីតាំងនៅរាជធានី-ខេត្តទូទាំងប្រទេស មានទុនវិនិយោគបន្ថែម៤៨០លានដុល្លារអាម៉េរិក និងបង្កើតការងារ ២០០៤កន្លែង។
ទាក់ទងនឹងវិស័យទេសចរណ៍ មានគម្រោងវិនិយោគបង្កើតសណ្ឋាគារកម្រិតផ្កាយ៥ ចំនួន៣០០បន្ទប់ស្ថិតនៅ ភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។ គម្រោងនេះមានទុនវិនិយោគ៧០លានដុល្លារអាម៉េរិក និងបង្កើតការងារ៨២២កន្លែង ។ ចំណែកវិស័យឧស្សាហកម្មមានគម្រោងវិនិយោគបង្កើតរោងចក្រផលិតភេសជ្ជៈប៉ូវកម្លាំងស្ថិតនៅ ភូមិគ្រួស សង្កាត់សំរោង ខណ្ឌព្រែកព្នៅ រាជធានីភ្នំពេញ ដោយគម្រោងនេះមានទុនវិនិយោគ ៣៩លានដុល្លារអាម៉េរិក និងបង្កើតការងារ១១៥កន្លែង។ រីឯគម្រោងវិនិយោគមួយទៀតគឺរោងចក្រផលិតអំពូលភ្លើងលំអដើមណូអែល, ពូកខ្យល់ និងគ្រឿងសង្ហារិម ទុនវិនិយោគ៣៥លានដុល្លារអាម៉េរិក និងបង្កើតការងារ១៩៣០កន្លែង។ គម្រោងនេះមានទីតាំងស្ថិតនៅភូមិ១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
ចំណែកគម្រោងធំៗនៅក្នុងតំបន់សេដ្ឋកិច្ចពិសេសគឺគម្រោងបង្កើតតំបន់សេដ្ឋកិច្ចពិសេសនៅភូមិត្រពាំងគោ និងភូមិត្រពាំងមូល ឃុំជើងគោស្រុកព្រៃនប់ ខេត្តព្រះសីហនុ។ គម្រោងនេះ មានទុនវិនិយោគជាង៥០លានដុល្លារនិងអាចបង្កើតការងារជាង២០០កន្លែង។
គម្រោងមួយទៀត គឺគម្រោងវិនិយោគបង្កើតរោងចក្រកែច្នៃអាលុយមីញ៉ូម និងផលិតគ្រឿងបន្ទាប់បន្សំបន្ទះសូឡាដែលមានទុនវិនិយោគ ៣០លានដុល្លារអាម៉េរិក និងបង្កើតការងារ ១៦០កន្លែង មានទីតាំងនៅក្នុងតំបន់សេដ្ឋកិច្ចពិសេសក្រុងព្រះសីហនុ។
គួរបញ្ជាក់ជូនផងដែរថា ក្នុងខែវិច្ឆិកា ឆ្នាំ២០២៤ កន្លងទៅនេះ ការវិនិយោគមកពីសាធារណរដ្ឋសង្គមនិយមវៀតណាមស្ថិតនៅលំដាប់លេខរៀងទី១ ដោយបានរួមចំណែក៥១,០៨% នៃទុនវិនិយោគសរុប (២) សាធារណរដ្ឋប្រជាមានិតចិនស្ថិតនៅលំដាប់លេខរៀងទី២ ដោយបានរួមចំណែក២៤,២៦% នៃទុនវិនិយោគសរុប និង (៣) ព្រះរាជាណាចក្រកម្ពុជាស្ថិតនៅលំដាប់លេខរៀងទី៣ ដោយបានរួមចំណែក១៤,៤៩% នៃទុនវិនិយោគសរុប៕
Account
Security
Favourite Content