សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ ផ្លូវប្របមាត់ព្រែកក្នុងទីរួមខេត្តកំពត ចាប់ពីចំណុចគល់ស្ពានថ្មី រហូតដល់គល់ស្ពានចាស់ប្រវែងជាង៧០០ម៉ែត្រ បានចាប់ផ្ដើមបើកការដ្ឋានសាងសង់ជាផ្លូវការហើយ ជាមួយនឹងការសាងសង់សួនកម្សាន្តតាមមាត់ព្រែក ដែលមានចំណត់រថយន្ត ឆ្នេរខ្សាច់សម្រាប់លេងទឹក និងលេងកីឡាលើទឹកផ្សេងទៀតផងដែរ ។ សមិទ្ធផលថ្មីទាំងនេះ នឹងលេចរូបរាងនៅពេលឆាប់ៗ ហើយនឹងអាចទាក់ទាញភ្ញៀវទេសចរជាតិ និងអន្តរជាតិទៅសម្រាក និងកម្សាន្តនៅខេត្តកំពតបន្ថែមទៀត ។
នៅក្នុងអំឡុងពេលចុះពិនិត្យ និងបើកការដ្ឋានស្ថាបនាផ្លូវប្របមាត់ព្រែកកំពង់បាយ នៅថ្ងៃទី ២៦ មីនា ២០២៤ ឯឧត្តម ម៉ៅ ធនិន្ទ អភិបាលខេត្តកំពតបានជំរុញឱ្យក្រុមការងារពន្លឿនការស្ថាបនាឆ្នេរខ្សាច់ថ្មីនៅលើទឹកដីខេត្តកំពត ដើម្បីឱ្យភ្ញៀវទេសចរបានចូលលេងកម្សាន្តនៅពេលឆាប់ៗខាងមុខនេះ ។ ទន្ទឹមនឹងនេះ អភិបាលខេត្តកំពត ក៏បានស្នើឱ្យពលរដ្ឋដែលរស់នៅជាប់ដងព្រែកកំពង់បាយ ហើយបានសង់សំណង់ចូលក្នុងដីចំណែកព្រែកកម្មសិទិ្ធសាធារណរបស់រដ្ឋ ចូលរួមសហការរុះរើសំណង់ ក៏ដូចជាសហការជាមួយក្រុមការងារជំនាញ ដើម្បីស្ថាបនាផ្លូវថ្មីឱ្យបានរួចរាល់ក្នុងពេលឆាប់ៗនេះដែរ ។
ឯកឧត្តមបន្តថា តំបន់ឆ្នេរខ្សាច់កម្សាន្តចន្លោះស្ពានថ្មី និងស្ពានចាស់នេះ គឺជាបេះដូងនៃក្រុងកំពត ហើយនៅពេលអនាគតទីតាំងនេះ នឹងក្លាយជាទីតាំងកម្សាន្ត និងសម្រាប់ការរៀបចំព្រឹត្តិការណ៍ធំៗនៅពេលមានបុណ្យទានម្ដងម្កាល ។
អ្នកអភិវឌ្ឍន៍ដីធ្លី និងអចលនទ្រព្យក្នុងខេត្តកំពតបានបង្ហាញពីសុទិដ្ឋិនិយមចំពោះគម្រោងអភិវឌ្ឍន៍របស់រដ្ឋបាលខេត្ត ដែលនឹងអាចទាក់ទាញភ្ញៀវទេសចរជាតិ និងអន្តរជាតិមកសម្រាក និងកម្សាន្តនៅក្នុងខេត្តកំពតបន្ថែមទៀត ហើយនឹងអាចធ្វើឱ្យតម្លៃដីធ្លីនៅខេត្តកំពតមានហាងឆេងឡើងវិញ ក៏ដូចជាទាក់ទាញវិនិយោគិនចូលមកអភិវឌ្ឍន៍ក្នុងខេត្តកំពត ។
លោក ជិន ណារិន អ្នកអភិវឌ្ឍន៍គម្រោងដីធ្លី និងផ្ទះលំហែកាយមួយរូបនៅខេត្តកំពតបានថ្លែងថា សមិទ្ធផលថ្មីក្នុងទឹកដីខេត្តកំពត នឹងអាចទាក់ភ្ញៀវទេសចរចូលមកលេងខេត្តកំពតកាន់តែច្រើន ហើយនឹងធ្វើតម្រូវការដីធ្លីសម្រាប់សាងសង់ផ្ទះសំណាក់ សណ្ឋាគារ ភោជនីយដ្ឋាន ក៏ដូចជាផ្ទះលំហែកាយកាន់តែកើនឡើង ជាមួយគ្នានោះដែរ សម្រាប់ពលរដ្ឋដែលត្រូវការផ្ទះលំហែកាយនៅក្នុងខេត្តកំពតក៏នឹងមានកំណើនឡើងដូចគ្នា ។ ម្យ៉ាងវិញទៀត ការសាងសង់រចនាសម្ព័ន្ធ និងឆ្នេរខ្សាច់ថ្មីនៅតាមដងព្រែកកំពតនេះ នឹងធ្វើឱ្យភ្ញៀវទេសចរមានកន្លែងកម្សាន្តច្រើនជាងមុន និងស្នាក់នៅក្នុងខេត្តកំពតបានយូរជាងមុន ៕
Account
Security
Favourite Content