សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នាយករដ្ឋមន្ត្រីនៃព្រះរាជាណាចក្រកម្ពុជា សម្តេចធិបតី ហ៊ុន ម៉ាណែត បានចង្អុលបង្ហាញថា នៅក្នុងត្រីមាសទីមួយនៃឆ្នាំ២០២៤ និន្នាការនាំចេញរបស់កម្ពុជាបានបន្តមានចលនាវិជ្ជមានជាមួយនឹងកំណើន១៧,២ ភាគរយ។
សម្តេចធិបតី ហ៊ុន ម៉ាណែត បានថ្លែងថា ការនាំចេញរបស់កម្ពុជាមានកំណើនជាមធ្យម ១៣,៣ភាគរយក្នុងចន្លោះឆ្នាំ២០១៧ ដល់ឆ្នាំ២០២៣ និងបានកើនឡើងដល់ទំហំ ២៣,៤៧ ពាន់លានដុល្លារអាមេរិក ឬស្មើនឹង ៥៤,៧ភាគរយ នៃផលិតផលក្នុងស្រុកសរុបរបស់កម្ពុជាក្នុងឆ្នាំ២០២៣។ ជាមួយគ្នានេះ នៅក្នុងត្រីមាសទី១ នៃឆ្នាំ២០២៤ និន្នាការនៃការនាំចេញនៅបន្តមានចលនាវិជ្ជមានក្នុងកំណើនប្រមាណ ១៧,២ភាគរយ។
សម្ដេចបានបញ្ជាក់ថា កម្ពុជាត្រូវបានកត់សម្គាល់ជាលើកដំបូង ដែលមានអតិរេកពាណិជ្ជកម្មនៅក្នុងសមតុល្យពាណិជ្ជកម្មអន្តរជាតិនារយៈពេល៣ខែដើមឆ្នាំ២០២៤។ របាយការណ៍ផ្លូវការបានបង្ហាញថា ចំណូលនាំចូល-នាំចេញសរុបក្នុងអំឡុងខែមករា ដល់ខែមីនា ឈានដល់ ១២,៤៩ ពាន់លានដុល្លារ។
សម្តេចធិបតី ក៏បានថ្លែងថា ក្នុងអំឡុងនៃការឆ្លងរាលដាលនៃជំងឺកូវីដ-១៩ ទោះបីជាមានកំណើនអវិជ្ជមានក្នុងឆ្នាំ២០២០ សេដ្ឋកិច្ចកម្ពុជាបានស្ទុះឡើងវិញយ៉ាងឆាប់រហ័ស ដោយសម្រេចបានកំណើន ៥,១ភាគរយក្នុងឆ្នាំ២០២២ និង៥ភាគរយ ក្នុងឆ្នាំ២០២៣ ហើយត្រូវបានព្យាករថា នឹងបន្តសម្រេចបានកំណើនខ្ពស់ក្នុងរយៈពេលមធ្យមទៅរយៈពេលវែងខាងមុខ ខណៈដែលរាជរដ្ឋាភិបាលតែងតែចាត់ទុកការកែលម្អបរិយាកាសធុរកិច្ច ការវិនិយោគ និងកិច្ចសម្រួលពាណិជ្ជកម្មជាអាទិភាពដ៏ចម្បង ដោយបានដាក់ចេញនូវគោលនយោបាយយុទ្ធសាស្ត្រ កម្មវិធី និងវិធានការកំណែទម្រង់ ព្រមទាំងស្តង់ដារបទដ្ឋានគតិយុត្តដើម្បីកែលម្អការអនុវត្តជាក់ស្តែង។
សម្រាប់វិស័យឧស្សាហកម្មកាត់ដេរសំលៀកបំពាក់ ស្បែកជើង និងផលិតផលធ្វើដំណើរ គឺជាវិស័យផ្តល់ប្រាក់ចំណូលធំបំផុតសម្រាប់ប្រទេសកម្ពុជា ហើយផលិតផលនាំចេញផ្សេងទៀត គឺជាផលិតផលមិនមែនកាត់ដេរ ដែលមានដូចជា គ្រឿងបន្លាស់អេឡិចត្រូនិក ផលិតផលកសិកម្ម កង់ និងបន្ទះសូឡាថាមពលពន្លឺព្រះអាទិត្យ។ ចំណែកមុខទំនិញដែលកម្ពុជានាំចូលភាគច្រើនមានដូចជា ៖ វត្ថុធាតុដើមវាយនភណ្ឌកាត់ដេរ ផលិតផលត្បូងចម្រុះ និងគ្រឿងអលង្ការមានតម្លៃ ប្រេងឥន្ធនៈ សម្ភារសំណង់ គ្រឿងអេឡិចត្រូនិក យានយន្ត គ្រឿងឧបភោគបរិភោគ ឳសថ និងបរិក្ខាពេទ្យ ជាដើម។
Account
Security
Favourite Content