សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី UNESCAP បានលើកឡើងថា អាជីវកម្មបរិយាបន្នគឺជាដំណោះស្រាយផ្អែកលើទីផ្សារ ដើម្បីជួយសម្រួលដល់ជីវភាពអ្នកក្រីក្រ ឬអ្នកចំណូលទាបនៅក្នុងសេដ្ឋកិច្ច ដោយផ្តល់ឱកាសដល់ពួកគេក្នុងការរកចំណូលបន្ថែម ទិញទំនិញ និងប្រើប្រាស់សេវាកម្មជាមូលដ្ឋានប្រកបដោយតម្លៃសមរម្យ និងគុណភាពដោយស្មើភាពគ្នា។
ទន្ទឹមនឹងនេះ រដ្ឋាភិបាលអាចលើកទឹកចិត្តដល់ការរីកលូតលាស់នៃអាជីវកម្មបរិយាបន្នដោយការអនុវត្តគោលនយោបាយ ជួយសម្រួលដល់ការវិនិយោគដែលមានផលប៉ះពាល់។ បន្ថែមពីនេះ ពួកគេក៏អាចផ្តល់រង្វាន់ដល់ក្រុមហ៊ុនដែលមានឥទ្ធិពលលើសង្គម និងជំរុញការបង្កើតថ្មីៗដែលអនុញ្ញាតឱ្យអាជីវកម្មបរិយាបន្នទទួលបានប្រាក់ចំណេញ។ កាលពីឆ្នាំ ២០១៩ បណ្តាញសកម្មភាពធុរកិច្ចបរិយាបន្ន (iBAN) និងគណៈកម្មការសេដ្ឋកិច្ច និងសង្គមសម្រាប់អាស៊ី និងប៉ាស៊ីហ្វិក(ESCAP) របស់អង្គសហប្រជាជាតិបានប្រកាសគំនិតផ្តួចផ្តើមរួមគ្នា ដើម្បីជួយរដ្ឋាភិបាលក្នុងការលើកកម្ពស់គោលនយោបាយសម្រាប់អាជីវកម្មបរិយាបន្ននៅក្នុងតំបន់អាស៊ីអាគ្នេយ៍ ។
លើសពីនេះ ភាពជាដៃគូ iBAN-ESCAP នឹងផ្តោតលើផ្នែកសំខាន់ៗចំនួន ៣ រួមមាន៖ ការផ្តល់យោបល់និងការវាយតម្លៃកម្រិតថ្នាក់ជាតិ, ការពិភាក្សាគោលនយោបាយក្នុងតំបន់ និងការផ្លាស់ប្តូរចំណេះដឹង។ បន្ថែមពីនេះ ពួកគេធ្វើការសិក្សាកំណត់អត្តសញ្ញាណក្រុមហ៊ុនអាជីវកម្មបរិយាបន្នបច្ចុប្បន្ន និងអនាគតនៅក្នុងប្រទេសនីមួយៗ រួមទាំងវិភាគបរិបទទាំងមូលដែលពួកគេប្រតិបត្តិការផងដែរ។ ផ្អែកលើការស្រាវជ្រាវទាំងនេះ ពួកគេនឹងផ្តល់នូវការណែនាំដល់អ្នកបង្កើតគោលនយោបាយ និងស្ថាប័ននានា ដើម្បីលើកទឹកចិត្តដល់អាជីវកម្មបរិយាបន្ន។ មិនត្រឹមតែប៉ុណ្ណោះ ពួកគេផ្តល់ឱ្យអ្នកបង្កើតគោលនយោបាយនូវសេវាកម្មបច្ចេកទេស និងប្រឹក្សា ដើម្បីជួយពួកគេរៀបចំគោលនយោបាយអាជីវកម្មបរិយាបន្ន។ បន្ថែមពីនេះ ESCAP នឹងប្រមូលផ្តុំប្រទេសជាសមាជិកទាំងអស់, ជំរុញការពិភាក្សាគោលនយោបាយ, និងការព្រមព្រៀងគ្នានៅកម្រិតតំបន់។
បណ្តាញសកម្មភាពអាជីវកម្មបរិយាបន្ន (Inclusive Business Action Network ឬ iBAN) គឺជាគំនិតផ្តួចផ្តើមជាសកលដែលគាំទ្រដល់ការពង្រីក និងការអនុវត្តគំរូអាជីវកម្មបរិយាបន្នដែលមានលក្ខណៈរួមបញ្ចូល។ តាមរយៈសសរស្តម្ភយុទ្ធសាស្ត្ររបស់ខ្លួនពីរគឺ iBAN blue និង iBAN weave បណ្តាញសកម្មភាពអាជីវកម្មបរិយាបន្ន iBAN គ្រប់គ្រងវេទិកាចំណេះដឹងលើប្រព័ន្ធអនឡាញប្រកបដោយភាពច្នៃប្រឌិតសម្រាប់អាជីវកម្មបរិយាបន្ន និងផ្តល់ជូននូវកម្មវិធីអភិវឌ្ឍន៍សមត្ថភាពផ្តោតសំខាន់សម្រាប់ក្រុមហ៊ុនដែលបានជ្រើសរើស ក៏ដូចជាអ្នកបង្កើតគោលនយោបាយនៅក្នុងប្រទេសកំពុងអភិវឌ្ឍន៍ និងកំពុងរីកចម្រើន។ iBAN បង្កើតកន្លែងមួយដែលចំណេះដឹងផ្អែកលើភស្តុតាង ដែលលើកទឹកចិត្តក្នុងការទទួលបានចំណេះដឹងថ្មីៗ និងកសាងភាពជាដៃគូថ្មីៗ។ នេះគឺជាវេទិកាអនឡាញដែលផ្តល់ចំណេះដឹងអំពីអាជីវកម្មបរិយាបន្នរបស់ iBAN (https://www.inclusivebusiness.net/)។ ជាមួយនឹងការយកចិត្តទុកដាក់លើការលើកកម្ពស់គំរូអាជីវកម្មបរិយាបន្នឲ្យកាន់តែធំ និងធ្វើឱ្យប្រសើរឡើងនូវជីវភាពរស់នៅរបស់អ្នកក្រីក្រ iBAN កំពុងរួមចំណែកយ៉ាងសកម្មក្នុងការសម្រេចបាននូវគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ។ iBAN ត្រូវបានផ្តល់មូលនិធិដោយសហភាពអឺរ៉ុប និងក្រសួងសហព័ន្ធអាល្លឺម៉ង់សម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច ហើយត្រូវបានអនុវត្តដោយអង្គការអភិវឌ្ឍន៍អន្តរជាតិអាល្លឺម៉ង់ (GIZ)។
គួរឲ្យបញ្ជាក់ដែរថា iBAN គឺជាគំនិតផ្តួចផ្តើមជាសកលដែលអនុវត្តដោយ អង្គការអភិវឌ្ឍន៍អន្តរជាតិអាល្លឺម៉ង់ (GIZ) ដែលគាំទ្រដល់ការធ្វើមាត្រដ្ឋាន និងការចម្លងនៃគំរូអាជីវកម្មបរិយាបន្ន ដើម្បីកែលម្អជីវភាពរស់នៅរបស់អ្នកចំណូលទាប និងអ្នកក្រីក្រ។ ESCAP គឺជាវេទិកាអន្តររដ្ឋាភិបាលក្នុងតំបន់របស់អង្គការសហប្រជាជាតិនៅអាស៊ី និងប៉ាស៊ីហ្វិក ដែលប្រើប្រាស់ជំនាញសមត្ថភាពរបស់ខ្លួនក្នុងការលើកកម្ពស់អាជីវកម្មប្រកបដោយនិរន្តរភាព ការច្នៃប្រឌិតមានលក្ខណៈរួមបញ្ចូល និងការវិនិយោគដែលមានផលប៉ះពាល់ ដើម្បីគាំទ្រអ្នកបង្កើតគោលនយោបាយក្នុងការអភិវឌ្ឍគោលនយោបាយអាជីវកម្មបរិយាបន្ន និងផ្តល់ជាវេទិកាសម្រាប់ចែករំលែកចំណេះដឹង និងបទពិសោធន៍នៅទូទាំងអាស៊ីអាគ្នេយ៍៕
Account
Security
Favourite Content