បរទេស៖ យោងតាមប្រភពព័ត៌មានពី CNA បានរាយការណ៍ថា ឥណ្ឌូនេស៊ី បានត្រៀមបញ្ចេញកញ្ចប់ថវិកាដើម្បីជួយជំរុញកំណើនសេដ្ឋកិច្ចថ្មីមួយដែលមានតម្លៃជិត ១ ពាន់លានដុល្លារអាម៉េរិក ដោយរួមបញ្ចូលទាំងជំនួយស្បៀងអាហារ និងកម្មវិធីជំនួយដែលអាចផ្តល់ការងារបណ្តោះអាសន្នសម្រាប់មនុស្សជាង ៦ សែននាក់។

កាលពីថ្ងៃចន្ទដើមសប្ដាហ៍នេះ រដ្ឋមន្ត្រីសេដ្ឋកិច្ចរបស់ឥណ្ឌូនេស៊ី លោក Airlangga Hartarto បានប្រាប់អ្នកយកព័ត៌មានថា វិធានការជំរុញនឹងត្រូវបានអនុវត្តនៅក្នុងត្រីមាសទី ៤ នៃឆ្នាំ២០២៥ ហើយវិធានការមួយចំនួននឹងត្រូវបន្តរហូតដល់ឆ្នាំ២០២៦ ។

សូមជម្រាបថា ឥណ្ឌូនេស៊ី គឺជាប្រទេសដែលមានសេដ្ឋកិច្ចធំបំផុតរបស់អាស៊ីអាគ្នេយ៍ដែលមានកំណើនកើនឡើង ៥,១២% ក្នុងត្រីមាសទីពីរ ជាអត្រាកំណើនដ៏ល្អបំផុតក្នុងរយៈពេលពីរឆ្នាំ ប៉ុន្តែអ្នកបង្កើតគោលនយោបាយមួយចំនួនបានលើកឡើងពីសញ្ញានៃការធ្លាក់ចុះសេដ្ឋកិច្ចនៅក្នុងត្រីមាសបន្ទាប់ ខណៈដែលរដ្ឋមន្ត្រីសេដ្ឋកិច្ចរបស់ឥណ្ឌូនេស៊ី លោក Airlangga បាននិយាយថា ជាមួយនឹងកញ្ចប់ជំរុញសេដ្ឋកិច្ចនេះ រដ្ឋាភិបាលសង្ឃឹមថាអាចឈានដល់គោលដៅកំណើនសេដ្ឋកិច្ច ៥,២%។

គួរបញ្ជាក់ដែរថា កញ្ចប់ជំរុញសេដ្ឋកិច្ចនេះមានតម្លៃ ១៦,២៣ ទ្រីលានរូពៀ (៩៨៩ លានដុល្លារអាមេរិក) រួមបញ្ចូលទាំងជំនួយស្បៀងអាហារ និងកម្មវិធីកសាងហេដ្ឋារចនាសម្ព័ន្ធដែលអាចផ្តល់ការងារបណ្តោះអាសន្នសម្រាប់មនុស្សជាង ៦ សែននាក់។ លើសពីនេះ រដ្ឋាភិបាលនឹងផ្តល់ឱ្យ ១៨,៣ លានគ្រួសារនូវអង្ករ ១០ គីឡូក្រាមក្នុងមួយផ្ទះនៅក្នុងត្រីមាសទី ៤, ការដកពន្ធលើប្រាក់ចំណូលផ្ទាល់ខ្លួនសម្រាប់បុគ្គលិកក្នុងវិស័យទេសចរណ៍ និងបែងចែក ៥,៣ ទ្រីលានរូពៀសម្រាប់គម្រោងសាច់ប្រាក់ការងារមនុស្សជាង ៦ សែននាក់នៅក្នុងអំឡុងខែកញ្ញា ដល់ខែធ្នូ។ គម្រោងសាច់ប្រាក់សម្រាប់ការងារជាធម្មតាពាក់ព័ន្ធនឹងការផ្តល់ប្រាក់ឈ្នួលប្រចាំថ្ងៃដល់បុគ្គលិក ដែលភាគច្រើនមកពីសហគមន៍ជនបទ និងធ្វើការលើគម្រោងហេដ្ឋារចនាសម្ព័ន្ធដូចជាផ្លូវ និងស្ពានជាដើម។ មិនត្រឹមតែប៉ុណ្ណោះ កញ្ចប់ជំរុញសេដ្ឋកិច្ចនេះក៏រួមបញ្ចូលកម្មវិធីកម្មសិក្សាដែលផ្តល់ថ្លៃពលកម្មសម្រាប់និស្សិតបញ្ចប់ការសិក្សាពីកលវិទ្យាល័យចំនួន ២ ម៉ឹននាក់ និងការបញ្ចុះតម្លៃ ៥០% សម្រាប់ធានារ៉ាប់រងរបួសការងារដែលផ្តល់ដោយរដ្ឋសម្រាប់អ្នករត់ម៉ូតូឌុប និងអ្នកបើកឡានដឹកទំនិញ។

រដ្ឋមន្ត្រីសេដ្ឋកិច្ចរបស់ឥណ្ឌូនេស៊ី Airlangga បានលើកឡើងថា ការដកពន្ធលើប្រាក់ចំណូលផ្ទាល់ខ្លួនសម្រាប់វិស័យមួយចំនួន និងគម្រោងធានារ៉ាប់រងនឹងត្រូវបន្តរហូតដល់ឆ្នាំ២០២៦។ បន្ថែមពីនេះ ពន្ធលើប្រាក់ចំណូលលើអាជីវកម្មខ្នាតតូចអាចនឹងកើនឡើងពី ០,៥% ក្នុងពេលឥឡូវដល់ ១% នៃប្រាក់ចំណូលនៅឆ្នាំក្រោយ ប៉ុន្តែរដ្ឋាភិបាលអាចនឹងសម្រេចចិត្តរក្សាអត្រាបច្ចុប្បន្នរហូតដល់ឆ្នាំ ២០២៩ ។ រដ្ឋាភិបាលឥណ្ឌូនេស៊ីក៏នឹងចាប់ផ្តើមកម្មវិធីដាំដើមឈើឡើងវិញលើផ្ទៃដីចំនួន ៨៧០ ០០០ ហិកតាសម្រាប់ជាដំណាំដូចជា អំពៅ កាកាវ កាហ្វេ ស្វាយចន្ទី គ្រាប់ផ្លែឈើ និងដូងនៅឆ្នាំ ២០២៦ ដែលជាកម្មវិធីមួយដែលអាចបង្កើតការងារថ្មីចំនួន ១,៦ នាក់៕