សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ នៅដើមឆមាសទី២ ឆ្នាំ២០២៥នេះ (ក្នុងត្រីមាសទី៣) សេដ្ឋកិច្ចរបស់ប្រទេសជប៉ុនបានធ្លាក់ចុះជិត ២% ដែលបណ្តាលមកពីផលប៉ះពាល់នៃអត្រាពន្ធគយរបស់អាម៉េរិកផង រួមផ្សំនឹងការចំណាយរបស់ប្រជាជនក្នុងស្រុកមានការកើនឡើងយឺត ឬចំណាយតិចជាងមុន នេះបើយោងតាមសេចក្ដីរាយការណ៍ពីរ៉យទ័រ។
នៅថ្ងៃចន្ទ ដើមសប្ដាហ៍នេះ ផ្អែកតាមទិន្នន័យដែលចេញដោយរដ្ឋាភិបាលជប៉ុនបានបង្ហាញថា ការធ្លាក់ចុះនៃកំណើនសេដ្ឋកិច្ចនៅដើមឆមាសទី២ ឆ្នាំ២០២៥នេះ ភាគច្រើនគឺបណ្តាលមកពីផលប៉ះពាល់នៃការវិនិយោគលំនៅដ្ឋានធ្លាក់ចុះ បន្ទាប់ពីការផ្លាស់ប្តូរបទប្បញ្ញត្តិក្នុងស្រុកមួយចំនួន ជាពិសេស ការនាំចេញចុះខ្សោយ។ ទិន្នន័យដដែលបានបញ្ជាក់ថា នៅក្នុងត្រីមាសទី៣ ឆ្នាំនេះ សេដ្ឋកិច្ចរបស់ជប៉ុនបានធ្លាក់ចុះ ១,៨% (គិតពីខែកក្កដា ដល់ខែកញ្ញា) បើធៀបនឹងកំណើននៅត្រីមាសទី២ មានអត្រា ២,៣% និងទាបជាងការព្យាករ ២,៥% ។ ទន្ទឹមនឹងនេះ ការចុះខ្សោយនៃការនាំចេញរបស់ជប៉ុនរយៈពេល ៤ខែជាប់គ្នា ចាប់តាំងពីខែឧសភា គឺជាមូលហេតុធំនៃការធ្លាក់ចុះសេដ្ឋកិច្ច ដោយសារឥទ្ធិពលនៃអត្រាពន្ធខ្ពស់របស់អាម៉េរិក។
ក្រុមហ៊ុនជំនាញផលិតរថយន្តបានមើលឃើញថា បរិមាណនៃការដឹកជញ្ជូនបានធ្លាក់ចុះ បើទោះបីជាអត្រាពន្ធគយថ្មីធ្វើឲ្យពួកគេកាត់បន្ថយតម្លៃថ្លៃដើមក៏ដោយ។ យ៉ាងណាមិញ កាលពីខែកញ្ញា សហរដ្ឋអាម៉េរិក និងជប៉ុនបានធ្វើកិច្ចព្រមព្រៀងជាផ្លូវការមួយដែលអនុវត្តកម្រិតពន្ធមូលដ្ឋាន ១៥% លើការនាំចូលស្ទើរតែទាំងអស់ពីជប៉ុន បើធៀបនឹងអត្រាពន្ធ ២៥% សម្រាប់ទំនិញភាគច្រើន និង ២៧,៥% លើរថយន្តកាលពីគ្រាមុន។ មិនត្រឹមតែប៉ុណ្ណោះ ការវិនិយោគលើលំនៅឋាន បានធ្លាក់ចុះ ៩,៤% ក៏ជាកត្តាជំរុញឱ្យធ្លាក់ចុះសេដ្ឋកិច្ចផងដែរ បូករួមទាំងបទប្បញ្ញត្តិក្នុងស្រុកកាន់តែតឹងតែងជាងមុន។ បន្ថែមពីនេះ ការចំណាយរបស់វិស័យឯកជនដែលមានចំណែកច្រើនជាងពាក់កណ្តាលនៃទិន្នផលសេដ្ឋកិច្ច កើនឡើងយឺត ០,១% ប៉ុណ្ណោះបើធៀបនឹង ០,៤% នៅត្រីមាសទី២ ខណៈដែលតម្លៃនៃម្ហូបអាហារកើនឡើង ធ្វើឲ្យពលរដ្ឋដែលជាអ្នកប្រើប្រាស់គិតគូរ និងរឹតត្បិតលើការចំណាយយ៉ាងប្រុងប្រយ័ត្ន។
សូមបញ្ជាក់ដែរថា កាលពីពេលថ្មីៗនេះ នាយករដ្ឋមន្ត្រីជប៉ុន លោកស្រី Sanae Takaichi គ្រោងនឹងរៀបចំកញ្ចប់ថវិកាដើម្បីជំរុញកំណើនសេដ្ឋកិច្ច ជួយសម្រួលការឡើងថ្លៃនៃតម្លៃរស់នៅប្រចាំថ្ងៃរបស់ពលរដ្ឋ ខណៈដែលទិន្នន័យបានបង្ហាញពី GDP ចុះខ្សោយ។ ទីប្រឹក្សារបស់នាយករដ្ឋមន្ត្រី បានបញ្ជាក់ដែរថា ការធ្លាក់ចុះនៃទំហំផលិតផលក្នុងស្រុកសរុប (GDP) គឺជាមូលហេតុដែលជំរុញឱ្យមានវិធានការបន្ទាន់ជាមួយកញ្ចប់ថវិកាលើសពី ១៧ ទ្រីលានយ៉េន ឬជិត ១១០ ពាន់លានដុល្លារ)៕
Account
Security
Favourite Content