ភ្នំពេញ ៖ ក្នុងរយៈពេល​២ឆ្នាំ ពោលគឺចាប់ពីថ្ងៃទី០១ ខែតុលា ឆ្នាំ២០២៣ ដល់​ថ្ងៃទី៣១ ខែតុលា ឆ្នាំ២០២៥ ក្រសួង​រៀបចំដែនដី នគរូបនីយកម្ម និងសំណង់​ សម្រេច​បានលទ្ធផល​ចុះវាស់​វែងដីធ្លីចំនួន ៥ ៦៦១ ៨៥២ក្បាលដី ស្មើនឹង​៩៩ភាគរយ​នៃផែនការសរុប ។ នេះបើតាម​របាយការណ៍របស់ក្រសួង​រៀបចំដែន​ នគរូបនីយកម្ម និងសំណង់​ ។

ក្នុង​របាយការណ៍ដដែលបានបង្ហាញថា ក្នុងរយៈពេល​២ឆ្នាំកន្លងទៅនេះ ក្រសួង​ដែនដី បានកំណត់​ផែនការ​វាស់វែង​ដីឱ្យ​បានចំនួន ៥ ៧១៤ ៦០៥​ក្បាលដី ប៉ុន្តែសម្រេច​រហូតដល់​ជាង ៥លាន៦៦សែនក្បាលដីទៅហើយ នៅសល់​តិច​តួច និងបង្ហើយនៅក្នុងឆ្នាំ២០២៦ខាងមុខនេះ ។​

សម្រាប់ឆ្នាំ២០២៥​ គិតត្រឹមដំណាច់ខែតុលា ក្រសួង​បានសម្រេច​បានលទ្ធផល​វាស់វែង​ដីសរុប​ចំនួន ១ ៣៦០ ៤២៥ក្បាល ឬស្មើនឹង​៩៥ភាគរយនៃផែនការ ដែលផែនការ​ក្នុងឆ្នាំ២០២៥​ មានចំនួន ១ ៤៣៥ ១៩៨​ក្បាល ។​ ក្បាលដីដែលនៅសល់​មិនទាន់បានវាស់វែង​មានប្រមាណ ៥២ ៧៥០​ក្បាល​ដី ក្នុងនោះមាននៅខេត្ត​រតនគិរី  ខេត្តកោះកុង ខេត្តកំពត និងរាជធានីភ្នំពេញ ខណៈខេត្ត​ចំនួន​២១​ផ្សេងទៀត បានបញ្ចប់​ការ​វាស់វែង​រួចហើយ​ ។

ទន្ទឹង​នឹង​លទ្ធផល​នៃការ​ចុះវាស់វែងដីធ្លី ក្រសួងរៀបចំដែនដី ក៏បាន​សម្រេច​លទ្ធផល​ចុះបញ្ជី និងចេញ​ជា​បន្ត​បន្ទាប់ជូនម្ចាស់កម្មសិទ្ធិ​ដីធ្លី ក្នុងនោះក្បាលដែល​ត្រូវ​បានចុះបញ្ជីសរុបចំនយន ១៣ ៧៥១ ០០៧​ក្បាល​ដី ហើយបានចេញ​បណ្ណ​សរុប​ចំនួន ៨ ៨០៩ ២៥២ក្បាលដី និ​ងបានចែក​បណ្ណកម្មសិទ្ធិ​រួចរាល់ មានចំនួន ៨ ១៦២ ៥៤៩​ក្បាលដីផងដែរ ។

គួរ​រម្លឹកថា ដើម្បីចូលរួម​អនុវត្ត​យុទ្ធសាស្ត្រ​បញ្ចកោណ​ដំណាក់កាលទី១ ក្រសួងរៀបចំដែនដី នគរូបនីយកម្ម និងសំណង់ ដឹកនាំដោយឯកឧត្តម​ឧប​នាយករដ្ឋមន្ត្រី សាយ សំអាល់ បានដាក់ចេញនូវ​ចង្កោម​គោល​នយោបាយ​អាទិភាព​ចំនួន ១៥ចំណុច ក្នុងនោះពាក់ព័ន្ធនឹ​ងអនុវិស័យ​រដ្ឋបាលដីធ្លី បានដាក់ចេញនូវគោល​​នយោបាយ​ ការ​ចុះបញ្ជីដីធ្លីបង្ហើយ សេវាគាប់​ចិត្ត និង​បរិយាកាស​គ្មានវិវាទ ដែល​ប្រតិបត្តិផ្ទាល់​ដោយផែន ការងារ​សុរិយោដីនិងភូមិសាស្ត្រ ។

បើតាម​ប្រសាសន៍របស់​ឯកឧត្តម​ឧ​បនាយករដ្ឋមន្ត្រី សាយ សំអាល់ រដ្ឋមន្ត្រីក្រសួ​ងរៀបចំដែនដី នគរូបនីយកម្ម​ និងសំណង់ បាន​ថ្លែង​នៅក្នុងសន្និបាទបូក​សរុបការងារកាលពីពេលថ្មីៗនៅមុខមន្ត្រីរាប់ពាន់​នាក់ថា យុទ្ធ​នា​ការបញ្ចប់ការ​វាស់វែង​ដី និងចុះបញ្ជី រហូតដល់ចេញបណ្ណកម្មសិទ្ធិជូន​ពលរដ្ឋ​នេះ គឺដើម្បីបញ្ចប់​ភាពចម្រូ​ង​​ចម្រាស់ និងភាពមិនច្បាស់លាស់​នៃព្រំដី ដោយមិនចង់ឱ្យពលរដ្ឋ​នៅតែ​បន្ត​មានទំនាស់​រឿងព្រំដី​រ៉ាំរ៉ៃ តកូនចៅ​ទៀត​នោះទេ ។ ការ​បញ្ចប់​ការវាស់វែងដី និ​ងចេញបណ្ណជូនពលរដ្ឋ នឹងអាច​ឱ្យពួកគាត់​រស់នៅសុខសាន្ត​ និង​មានភាពសុខុដុមរមនា​រវាង​គ្នា​នឹ​ងគ្នា​តកូនតចៅ ៕