កំពង់ចាម ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី១៤ ខែវិច្ឆិកា ឆ្នាំ២០៣ បានអញ្ជើញជាអធិបតីប្រកាសឱ្យអនុវត្តជាផ្លូវការនូវ “កម្មវិធីរបបសន្តិសុខសង្គម ផ្នែកថែទាំសុខភាពតាមរបបភាគទានដោយស្ម័គ្រចិត្ត”​ និង “កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងងាយរងហានិភ័យ” ។

ទាំងនេះគឺជាការងារអាទិភាពចំនួន២ ក្នុងចំណោមការងារអាទិភាពចំនួន ៦ ក្នុងឆ្នាំ២០២៣ របស់រដ្ឋាភិបាល តាមរយៈក្រសួងការងារ សំដៅបង្កើនប្រាក់ចំណូល ការធានាលក្ខខណ្ឌការងារ​ល្អប្រសើរ ការពង្រឹងសុខដុមនីយកម្មទំនាក់ទំនងវិជ្ជាជីវៈ កិច្ចគាំពារសង្គម និងជំនាញវិជ្ជាជីវៈ​ជូនកម្មករ និយោជិត និងក្រុមគ្រួសារ។

ដោយឡែក សម្រាប់ខេត្តកំពង់ចាម លោក ហាវ ធិន នាយកវិទ្យាស្ថានពហុបច្ចេកទេស​នៃខេត្តនេះបានឱ្យដឹងថា ក្នុងឆ្នាំសិក្សា ២០២៣-២០២៤ នេះ ខាងវិទ្យាស្ថានបានធ្វើផែនការ​ក្នុងការបណ្ដុះបណ្ដាល ដោយសរុបនៃវគ្គទាំងអស់នឹងផ្ដល់ឱកាសដល់សិក្ខាកាមចំនួន ៤២០នាក់។

លោក ហាវ ធិន បានឱ្យដឹងដែរថា៖

«វិទ្យាស្ថានយើងមានវគ្គបណ្ដុះបណ្ដាលជំនាញដូចជា តបណ្ដាញ​អគ្គិសនី ជួសជុលរថយន្ដ ថែរក្សាសម្ផស្ស កែច្នៃកសិផល បច្ចេកវិទ្យាព័ត៌មានវិទ្យា និងវិស្វកម្ម​អគ្គិសនីជាដើម ហើយបើគាត់មានប័ណ្ណក្រីក្រ ឬប័ណ្ណសមធម៌ទៀត គាត់អាចទទួលបានប្រាក់ឧបត្ថម្ភចំនួន ២៨ម៉ឺនរៀលក្នុងមួយខែ»។

លោកបានបញ្ជាក់ថា សម្រាប់លក្ខខណ្ឌនៃការចុះឈ្មោះ វិទ្យាស្ថានកំណត់អាយុសិក្ខាកាមពី ១៥ ដល់ ៣៥ឆ្នាំ ត្រូវរៀនចប់ថ្នាក់ទី៩ (សញ្ញាបត្រមធ្យមសិក្សាបឋមភូមិ) ប៉ុន្តែក្នុងករណីដែលសិក្ខាកាម​មិនបាន​រៀន​ដល់​ទី៩ទេ ក៏អាចមានករណីលើកលែងដែរ ដោយលោកនឹងមានការប្រជុំជាមួយគណៈកម្មការ​ដើម្បីវាយតម្លៃ។ 

ចំពោះសិស្សដែលចូលរៀនវគ្គសញ្ញាបត្រ​បច្ចេកទេសវិជ្ជាជីវៈ នៅក្រោយពេលបញ្ចប់ការសិក្សា សិក្ខានឹងត្រូវចុះកម្មសិក្សា ហើយបន្ទាប់ពីបានចុះកម្មសិក្សាចប់ វិទ្យាស្ថាននឹងរកកន្លែងការងារឱ្យពួកគេធ្វើតែម្ដង។ 

តាមរយៈការផ្ដល់ឱកាស និងចំណេះដឹង ជំនាញ ក្រោមការយកចិត្តទុកដាក់ពីសំណាក់រាជរដ្ឋាភិបាលបែបនេះ លោក ហាវ ធិន នាយកវិទ្យាស្ថានពហុបច្ចេកទេស​នៃខេត្តកំពង់ចាមបានបង្ហាញពីក្ដីរំពឹងថា ប្រជាជនក្នុងមូលដ្ឋានខេត្តកំពង់ចាមនឹងមានការងារធ្វើកាន់តែច្រើន និងកាត់បន្ថយចំណាកស្រុក ហើយម្យ៉ាងទៀតសេដ្ឋកិច្ចខេត្តក៏នឹងរីកលូតលាស់ល្អនៅពេលដែលពលរដ្ឋមានជំនាញការងារមួយច្បាស់លាស់។

គួរបញ្ជាក់ថា សម្រាប់កម្មវិធីបណ្តុះបណ្តាលជំនាញ វិជ្ជាជីវៈ និងបច្ចេកទេសដល់យុវជនមកពីគ្រួសារ​ក្រីក្រ និងងាយរងហានិភ័យនេះ ក្រសួងបានជ្រើសរើសជំនាញចំនួន ៣៨ លើវិស័យទាំង១០ សម្រាប់ជំហានដំបូង ដែលជំនាញទាំង ៣៨នេះ ជាជំនាញដែលមានតម្រូវការខ្ពស់នៅក្នុងទីផ្សារ ហើយត្រូវសិក្សាក្នុងរយៈពេលមធ្យម៤ខែ ដែលផ្ដោតខ្លាំងលើការអនុវត្ត។ 

ក្នុងនោះ ក្រសួងការងារបានរៀបចំការចុះឈ្មោះចូលរៀនតាមរយៈថ្នាលឌីជីថល (https://apps.apple.com/app/id6468649193) ​សម្រាប់​បើកឱកាសដល់ដៃគូនានាដែលអាច ប្រើថ្នាក់ឌីជីថលនេះដើម្បីចុះឈ្មោះជូនបងប្អូន ឬសាច់ញាតិ។ ដើម្បីឱ្យការបណ្ដុះបណ្ដាលកាន់តែមានប្រសិទ្ធភាព ក្រសួងការងារក៏នឹងចុះអនុស្សារ​ណៈយោគយល់ជាមួយតំណាងវិស័យឯកជនចំនួន ១៨សមាគម រួមជាមួយនឹងសភាពាណិជ្ជកម្មកម្ពុជាផងដែរ ដែលប្រព្រឹត្តកាលពីថ្ងៃទី១១ ខែវិច្ឆិកា ឆ្នាំ២០២៣កន្លងទៅនៅក្នុងសាលពិព័រណ៍កោះពេជ្រ រាជធានីភ្នំពេញ។ ជាមួយគ្នានេះផងដែរ ដើម្បីឱ្យកាន់តែមានបត់បែន និងផ្តល់ភាពងាយស្រួលដល់បណ្តាសិក្ខាកាមដែលមានបំណងចូលសិក្សាទទួលយកជំនាញ ក្រសួងការងារក៏បានរៀបចំនូវវគ្គបណ្ដុះបណ្ដាលមានវេនយប់ និងវេនថ្ងៃចុ​ង​សប្ដាហ៍ផងដែរ៕