សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កោះកុង ៖ កោះកុងក្រៅ សំដៅលើតំបន់ដែនកោះ ដែលស្ថិតនៅឃុំជ្រោយប្រស់ ស្រុកកោះកុង ខេត្តកោះកុង និងមានចម្ងាយ ៣០ គ.ម ពីក្រុងខេមរភូមិន្ទ ។ កោះកុងក្រៅមានផ្ទៃដីប្រមាណ ៨០ គីឡូម៉ែត្រការ៉េ លាតសន្ធឹងលើផ្ទៃសមុទ្រដ៏ធំល្វឹងល្វើយរបស់កម្ពុជា។
បច្ចុប្បន្ននេះ តំបន់កោះកុងក្រៅកំពុងល្បីរន្ទឺដោយសារសម្រស់នៃឆ្នេរខ្សាច់ម៉ត់សក្បោះ ភ្ជាប់ជាមួយទឹកសមុទ្រដ៏ថ្លាឆ្វេងដូចកញ្ចក់ ព្រមទាំងមានជីវៈចម្រុះជាច្រើនប្រភេទគួរឱ្យទាក់ទាញ ម្លោះហើយ នៅប៉ុន្មានឆ្នាំក្រោយនេះ តំបន់កោះកុងក្រៅបានទាក់ទាញភ្ញៀវទេសចរជាតិ-អន្តរជាតិស្ទើរគ្រប់ទិសទីឱ្យទៅទស្សនា។
អ្នកស្រី ចន សម្ផស្ស រស់នៅក្នុងសហគមន៍ជ្រោយប្រស់ និងមានស្វាមីជាអ្នករត់ទូកទេសចរណ៍បានឱ្យដឹងថា កាលពីដើមឡើយ គ្រួសារអ្នកស្រីប្រកបរបរនេសាទ ដាក់មង ដាក់លបជាដើម ប៉ុន្តែមិនសូវជាកាក់កបបានចំណូលច្រើននោះទេ ហើយក៏មិនសូវជាមានសុវត្ថិភាពនោះដែរ។ ជាក់ស្ដែង ក្នុងរយៈពេលប៉ុន្មានឆ្នាំចុងក្រោយនេះ ដោយផលពីការនេសាទហាក់ធ្លាក់ចុះផង អ្នកស្រី ក៏ដូចជាប្រជាសហគមន៍ឯទៀត បានស្វះស្វែងរករបរផ្សេងដើម្បីចិញ្ចឹមជីវិត។
បើតាមអ្នកស្រី ចន សម្ផស្ស បានឱ្យដឹងទៀតថា ស្វាមីរបស់អ្នកស្រីបានចាប់ផ្ដើមមុខរបររត់ទូកទេសចរណ៍បន្ថែមលើការនេសាទកាលពីប្រមាណ៣ឆ្នាំមុន ពោលគឺនៅពេលដែលចាប់ផ្ដើមមានអ្នកទេសចរចង់ទៅលេងកម្សាន្ដនៅតំបន់កោះកុងក្រៅ ហើយដោយមានតម្រូវការជួលទូក អ្នកស្រី និងស្វាមីក៏សម្រេចចិត្តដាក់ទូកមួយដើម្បីជូនភ្ញៀវតែម្ដង។
រហូតមកដល់រយៈពេលពីរឆ្នាំចុងក្រោយនេះ មុខរបររបស់អ្នកស្រី និងស្វាមី ចាប់ផ្ដើមកាក់កបគ្រាន់បើ ដោយហេតុថា មានកំណើននៃអ្នកទេសចរ និងការចាយវាយរបស់អ្នកដែលមកកម្សាន្ត ហើយមិនត្រឹមតែគ្រួសាររបស់អ្នកស្រីនោះទេ ប្រជាសហគមន៍ផ្សេងទៀតក៏ងាកមកប្រកបមុខរបរនេះដែរ ដោយរហូតមកដល់បច្ចុប្បន្ននេះ ក្នុងសហគមន៍មានទូកប្រមាណ ៣០ ទៅ ៤០ទូកឯណោះ។
សម្រាប់ការផ្តល់សេវាដឹកជញ្ជូនភ្ញៀវកម្សាន្តតាមទូកនេះដែរ អ្នកស្រី ចន សម្ផស្ស បានបញ្ជាក់ថា ៖
«ភាគច្រើនគ្រួសារខ្ញុំគាត់ជូនភ្ញៀវទៅកោះចំថ្ងៃសុក្រ សៅរ៍ អាទិត្យ អីចឹងហើយថ្ងៃច័ន្ទ ដល់ព្រហស្បតិ៍ គឺគាត់នៅនេសាទដដែល»។
ទោះជាយ៉ាងណា អ្នកស្រីបានទទួលស្គាល់ថា ចាប់តាំងពីអ្នកស្រីបានបន្ថែមមុខរបររត់ទូកនេះ ជីវភាពគ្រួសាររបស់អ្នកស្រីមានភាពល្អប្រសើរជាងមុន។
បើតាមការឱ្យដឹងពីអ្នកស្រី ការជូនភ្ញៀវទៅលេងកម្សាន្ដនៅតំបន់កោះកុងក្រៅ គឺមានភាពងាយស្រួលជាងរបរនេសាទឆ្ងាយ ព្រោះបច្ចប្បន្ននេះការនេសាទមិនសូវបានផល ហើយប្រសិនបើមានភ្លៀង ឬព្យុះទៀត ទូកនឹងមិនអាចចេញទៅប្រកបរបរនេសាទបាននោះទេ។
សម្រាប់តម្លៃវិញ អ្នកស្រី សម្ផស្ស បានឱ្យដឹងថា៖
«ជាទូទៅ បើភ្ញៀវគាត់ជួលទូកយើង ២យប់ ៣ថ្ងៃ យើងយកចាប់ពី ២៣០ដុល្លារ ទៅ ២៥០ដុល្លារ ហើយបើសិនជាគាត់គេងតែមួយយប់ទេ យើងយកជាមធ្យម ១៥០ដុល្លារ»។
គួរបញ្ជាក់ថា រហូតមកដល់ពេលនេះ ទូកក្នុងសហគមន៍ភាគច្រើនគឺមានភ្ញៀវស្ទើរតែរាល់សប្ដាហ៍ ដូច្នេះហើយវាមិនត្រឹមតែបានជួយជីវភាពគ្រួសារអ្នកស្រីតែមួយនោះទេ តែបានជួយដល់សហគមន៍ទាំងមូលតែម្ដង។
ដោយមើលឃើញពីសក្កានុពលទេសចរណ៍បែបនេះ អ្នកស្រី ចន សម្ផស្ស ចង់ឃើញមានការយកចិត្តទុកដាក់បន្ថែមទៅលើការកសាងផែឱ្យមានរបៀបរៀបរយ មានការទុកដាក់សំរាមឱ្យត្រឹមត្រូវ បង្កើនសោភ័ណភាពក្នុងសហគមន៍ ដើម្បីទាក់ទាញភ្ញៀវមកបន្ថែមទៀត៕
Account
Security
Favourite Content