ភ្នំពេញ ៖ «វិក្កយបត្រឌីជីថល» ជាប្រព័ន្ធគ្រប់គ្រងគណនេយ្យ LocalizeBook ដែលទើបនឹងដាក់ឱ្យប្រើប្រាស់ជាផ្លូវការនាពេលថ្មីៗនេះ។ បច្ចេកវិទ្យាគ្រប់គ្រងគណនេយ្យបែបឌីជីថលនេះមានសារៈសំខាន់ណាស់នៅក្នុងវិស័យពាណិជ្ជកម្ម និងអាជីវកម្ម ជាពិសេសអាចជួយឲ្យសហគ្រាសធនតូច និងមធ្យម មានការគ្រប់គ្រងគណនេយ្យឲ្យបានត្រឹមត្រូវ និងមានរបាយការណ៍ហរិញ្ញវត្ថុច្បាស់លាស់។

មុខងារថ្មីដំបូងគេ «វិក្កយបត្រឌីជីថលជាមួយនឹង ABA Payway (Digitalize Invoicing with ABA Payway)» នេះត្រូវបានប្រកាសឱ្យប្រើប្រាស់កាលពីចុងសប្តាហ៍មុននៅសាលប្រជុំធំនៃមជ្ឈមណ្ឌលបណ្ដុះធុរកិច្ចថ្មី “តេជោ” ដោយ ឡូខលឡាយស៍ ថេក សូលូសិន ឯ.ក (LOCALIZE TECH SOLUTION CO.,LTD) ។

លោកបណ្ឌិត តាំង ងួនលី នាយកមជ្ឈមណ្ឌលបណ្តុះធុរកិច្ចថ្មីតេជោ បានស្ងើចសរសើរ និងអបអរសាទរដល់ក្រុមហ៊ុន ឡូខលឡាយស៍ ថេក សូលូសិន ឯ.ក ដែលជាម្ចាស់ជ័យលាភីលេខ ១ ក្នុងកម្មវិធីពន្លឿនអាជីវកម្មថ្នាលឌីជីថលឆ្នាំ២០២២ សម្រាប់បើកសម្ពោធមុខងារថ្មី និងការចុះអនុស្សរណៈនៃការយោគយល់គ្នាជាមួយធនាគារ ABA Bank។

លោកបណ្ឌិតបានមានប្រសាសន៍ថា វិក្កយបត្រឌីជីថលនេះ គឺជាសមិទ្ធផលមួយថ្មីនៅក្នុងវិស័យឯកជនជួយគាំទ្រទៅដល់ប្រព័ន្ធអេកូឡូស៊ីនៃការធ្វើធុរកិច្ចនៅកម្ពុជា។ វាជួយបម្រើឱ្យទិសដៅរួមគ្នាក្នុងការកសាងប្រព័ន្ធទូទាត់បច្ចេកវីទ្យាហិរញ្ញវត្ថុ និងបញ្ជីគណនេយ្យដ៏ត្រឹមត្រូវ។

លោក ទុយ ហុង ស្ថាបនិក និងជានាយកគ្រប់គ្រង LOCALIZE TECH SOLUTION CO.,LTD បានថ្លែងថា Localize គឺជាធុរកិច្ចថ្មីផ្នែកឌីជីថលក្នុងស្រុក ដែលផ្គត់ផ្គង់ប្រព័ន្ធគ្រប់គ្រងគណនេយ្យអនឡានសម្រាប់សហគ្រាសធនតូច និង មធ្យមដែលមានឈ្មោះថា LocalizeBook ។

លោកបានបញ្ជាក់ថា ៖ បេសកម្មរបស់ LOCALIZE គឺប្រើប្រាស់បច្ចេកវិទ្យាឌីជីថល ជួយឲ្យសហគ្រាសធនតូច និងមធ្យម មានការគ្រប់គ្រងគណនេយ្យឲ្យបានត្រឹមត្រូវ និងមានរបាយការណ៍ហរិញ្ញវត្ថុច្បាស់លាស់ ។ មុខងារថ្មីនេះ គឺកើតចេញពីកិច្ចសហប្រតិបត្តិការ រវាងក្រុមហ៊ុន Localize និងធនាគារ វឌ្ឍនៈអាស៊ី ចំកាត់ (ABA Bank) ។  Localize នឹងធ្វើការភ្ជាប់ API Integration ជាមួយសេវាទូទាត់ប្រាក់តាមអនឡាញរបស់ធនាគារ ABA (ABA Payway) ទៅក្នុងមុខងារទូទាត់វិក្កយត្របច្ចុប្បន្នដែលមានស្រាប់ ។ ដូច្នេះ បន្ទាប់ពីមុខងារថ្មីនេះដាក់ឲ្យដំណើរការ អ្នកប្រើប្រាស់របស់ប្រព័ន្ធ LocalizeBook ទាំងអស់នឹងទទួលបានអត្ថប្រយោជន៍ថ្មីមួយទៀតគឺអាចចេញវិក្កយបត្រដោយភ្ជាប់ KHQR Code របស់ធនគា ABA ដោយស្រ័យប្រវត្តិ តាមរយៈប្រព័ន្ធ Localize តែម្តង ដោយមិនចាំបាច់ធ្វើការជាមួយធនគារ ABA នោះទេ ។ មិនត្រឹមតែប៉ុណ្ណោះ នៅពេលដែលអតិថិជនរបស់គាត់ធ្វើការទូទាត់ប្រាក់តាមរយៈ KHQR ខាងលើ ប្រព័ន្ធ LocalizeBook នឹងជូនដំណឹងទៅអ្នកប្រើប្រាស់វិញ រួចធ្វើការទូទាត់ក្នុងប្រព័ន្ធ និងចេញបង្កាន់ដៃទទួលប្រាក់ជូនអតិថិជនវិញដោយស្វ័យប្រវត្តិ ។

លោក ទុយ ហុង បានមានប្រសាសន៍ថា ជារួម មុខងារថ្មីនេះនឹងជួយសម្រួលឲ្យអ្នកប្រើប្រាស់ធ្វើការចេញវិក្កយបត្រ និងធ្វើការទូទាត់ដោយគ្រាន់តែចុចមួយប៊ូតុងប៉ុណ្ណោះ ។

លោក Zokhir Rasulov នាយកផ្នែកឌីជីថលនៃធនាគារ ABA បានលើកឡើងថា ភាពជាដៃគូរវាង Localize និង ABA នឹង​ជួយជំរុញការរីកលូតលាស់សេដ្ឋកិច្ចរបស់កម្ពុជា ជាពិសេសជួយទៅដល់អាជីវកម្មរបស់សហគ្រាសធនតូច និងមធ្យមនៅកម្ពុជា ៕