សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សាធារណរដ្ឋកូរ៉េ បានផ្តល់ជំនួយឥតសំណងប្រមាណ៨លានដុល្លារសម្រាប់ជួយកម្ពុជាក្នុងការបណ្តុះបណ្តាលធនធានមនុស្សខាងវិស័យបច្ចេកវិទ្យាពត័មាន និងបច្ចេកទេស វិជ្ជាជីវៈ។
គម្រោង “ការកសាងសមត្ថភាព និងការបង្កើតបរិយាកាសគាំទ្រលើវិស័យបច្ចេកវិទ្យាពត័មាន និងសារគមនាគមន៏ក្នុងការអប់រំបណ្តុះបណ្តាលបច្ចេកទេស វិជ្ជាជីវៈនៅកម្ពុជា” នេះ ត្រូវបានសម្ពោធជាផ្លូវការនាថ្ងៃទី១៨ ខែកក្កដា ឆ្នាំ២០២៤ ។ គម្រោងនេះមានរយៈពេល៥ឆ្នាំ ចាប់ពីឆ្នាំ២០២៣ ដល់ ២០២៧ និងផ្តល់មូលនិធិដោយជំនួយឥតសំណងប្រមាណ៨លានដុល្លារពីសាធារណរដ្ឋកូរ៉េតាមរយៈទីភ្នាក់ងារសហប្រតិបត្តិការអន្តរជាតិកូរ៉េ កយកា (KOICA) ប្រចាំកម្ពុជា។
គម្រោងនេះមានធាតុផ្សំចំនួន ៤ ៖ ១) ពង្រឹង និងពង្រីកកម្មវិធីសិក្សាក្នុងវិស័យ ICT ដើម្បីឆ្លើយតបនឹងតម្រូវការទីផ្សារ ២) គាំទ្រការកសាងសមត្ថភាពដល់អ្នកបង្កើតគោលនយោបាយ គ្រូបង្គោល និងគ្រូបច្ចេកទេស ៣) បង្កើតបរិយាកាសគាំទ្រវិស័យ ICT តាមរយៈការកែលម្អ និងបំពាក់សម្ភារបណ្តុះបណ្តាលនៅក្នុងបន្ទប់កុំព្យូទ័ររបស់គ្រឹះស្ថាន TVET សាធារណៈចំនួន ២០ ដែលបានជ្រើសរើស និងទី៤ ) ពង្រឹងកម្មវិធីគាំទ្រវិស័យ ITC តាមរយៈការរៀបចំខិតប័ណ្ណផ្សព្វផ្សាយ ការអភិវឌ្ឍកម្មវិធីសិក្សាដោយមានការចូលរួមពីឧស្សាហកម្ម និងការគាំទ្រការប្រកួតប្រជែងជំនាញទាំងនៅតាមបណ្តាខេត្ត និងថ្នាក់ជាតិ។
គម្រោងនេះត្រូវបានគេរំពឹងថា នឹងជំរុញយ៉ាងខ្លាំងនូវជំនាញឌីជីថលរបស់យុវជនកម្ពុជា ដោយកាត់បន្ថយគម្លាតរវាងសមត្ថភាពកម្លាំងពលកម្ម និងតម្រូវការទីផ្សារការងារ។ តាមរយៈការផ្តល់ឱកាសឱ្យនិស្សិតបញ្ចប់ការសិក្សានូវជំនាញ ICT តាមតម្រូវការ គម្រោងនេះនឹងរួមចំណែកដល់ការអភិវឌ្ឍន៍សេដ្ឋកិច្ចទាំងមូលរបស់កម្ពុជា។
លោកស្រី Moonjung CHOI នាយិកាប្រចាំប្រទេសនៃការិយាល័យ កយកា ប្រចាំប្រទេសកម្ពុជា បានប្តេជ្ញាចិត្តក្នុងការចូលរួមអនុវត្តគម្រោងដ៏មានសារៈសំខាន់នេះឱ្យមានភាពជោគជ័យដើម្បីឱ្យពលរដ្ឋកម្ពុជា និងពលករមានសមត្ថភាព និងចំណេះជំនាញក្នុងវិស័យបច្ចេកវិទ្យាក្នុងគោលបំណងឆ្លើយតបទៅតាមតម្រូវការទីផ្សារដែលកំពុងត្រូវការខ្ពស់។
លោកស្រី បានបញ្ជាក់ថា៖
«វិស័យបច្ចេកវិទ្យា បានដើរតួនាទីយ៉ាងសំខាន់បំផុតក្នុងការអភិវឌ្ឍធនធានមនុស្សដែលជាគ្រឹះក្នុងការកសាងនិងអភិវឌ្ឍសង្គមជាតិ»។
ឯកឧត្តម ហេង សួរ រដ្ឋមន្ត្រីក្រសួងការងារ បណ្តុះបណ្តាល និងវិជ្ជាជីវៈ បានបញ្ជាក់ថា ៖ ការអនុវត្តគម្រោងនាពេលនេះ ឆ្លើយតបទាន់ពេលវេលានឹងគោលនយោយបាយដ៏មានសារៈសំខាន់របស់រាជរដ្ឋាភិបាល និងផែនការយុទ្ធសាស្ត្ររយៈពេល៥ឆ្នាំរបស់ក្រសួងក្នុងការធ្វើបរិវត្តកម្មការបណ្តុះបណ្តាលជំនាញបច្ចេកទេស និងវិជ្ជាជីវៈ ដែលជារបៀបវារៈ ក៏ដូចជាគោលដៅចម្បងបំផុតមួយក្នុងការជំរុញ កែប្រែ និងធ្វើទំនើបកម្មរចនាសម្ព័ន្ធឧស្សាហកម្មនៅកម្ពុជាពីឧស្សាហកម្មអតិពលកម្មឈានទៅឧស្សាហកម្មផ្អែកលើជំនាញក្នុងគោលបំណងឆ្លើយតបទៅតាមតម្រូវការទីផ្សារនាពេលបច្ចុប្បន្ន និងទៅអនាគត៕
Account
Security
Favourite Content