សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងកសិកម្ម រុក្ខាប្រមាញ់ និងនេសាទ ជាមួយសហគ្រិនខ្មែរ បានចុះហត្ថលេខាលើអនុស្សរណៈនៃការយោគយល់ (MoU) ក្នុងគោលបំណងជំរុញការអភិវឌ្ឍប្រព័ន្ធអេកូឡូស៊ី សហគ្រិនភាពឱ្យរស់រវើកនៅកម្ពុជា។
ពិធីនេះបានប្រព្រឹត្តទៅនៅថ្ងៃទី១១ ខែកក្កដា ឆ្នាំ២០២៤ក្រោមអធិបតីភាពរបស់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម ហែម វណ្ណឌី រដ្ឋមន្ត្រីក្រសួង ឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាលនៃសហគ្រិនខ្មែរ ដែលកិច្ចសហការនេះ ក្រសួងកសិកម្ម រុក្ខាប្រមាញ់ និងនេសាទ នឹងផ្តោតលើការគាំទ្រទាក់ទងនឹងបច្ចេកទេសដាំដុះ ធាតុចូលកសិកម្ម គ្រឿងចក្រ និងហេដ្ឋារចនាសម្ព័ន្ធ។
កិច្ចសហការនេះមានគោលបំណងគាំទ្រ និងជំរុញការអភិវឌ្ឍ «សហគមន៍កសិកម្មទំនើបនៅកម្ពុជា» តាមរយ:ការផ្ដល់ជំនួយបច្ចេកទេស និងហិរញ្ញវត្ថុរបស់សហគ្រិនខ្មែរ និងមានការសម្របសម្រួលពីក្រសួងកសិកម្ម រុក្ខាប្រមាញ់ និងនេសាទ។
ទន្ទឹមនឹងនោះ សហគ្រិនខ្មែរ នឹងផ្តោតលើការពង្រឹងជំនាញអាជីវកម្មរបស់សហគមន៍កសិកម្មតាមរយៈកម្មវិធីកសាងសមត្ថភាពនានា ដើម្បីសម្រេចបាននូវគោលបំណងបង្កើនភាពប្រកួតប្រជែងនៃកសិកម្មកម្ពុជាតាមរយៈការចងក្រង និងប្រមូលផ្តុំការធ្វើផលិតកម្មរួមគ្នាប្រកបដោយប្រសិទ្ធភាពសេដ្ឋកិច្ចខ្ពស់។
ថ្មីៗនេះ សហគមន៍ស្រូវនាងអំនៅខេត្តសៀមរាប សហគមន៍សំបូរមានជ័យខេត្តកំពង់ចាម និងសហគមន៍ខេត្តកំពង់ធំ ដែលរួមគ្នាផលិតកែច្នៃគ្រាប់ស្វាយចន្ទីដែលដាក់ឈ្មោះថា «សហគមន៍កសិកម្មទំនើបទំរីងកំពង់ធំ» ដោយមានសមាជិកសរុបចំនួន ៧៦គ្រួសារ និងផ្ទៃដីផលិតកម្មចន្ទីដែលផ្តល់ផលស្រាប់ចំនួន ៤៥៨ហិកតា ខណៈដែលសហគមន៍ទាំងនេះសុទ្ធតែបានជំរុញខ្លួនឱ្យក្លាយទៅជាសហគមន៍កសិកម្មទំនើប។
ដោយឡែក បងប្អូនប្រជាកសិករដែលជាអ្នកដាំបន្លែនៅស្រុកត្រាំកក់ ខេត្តតាកែវ សហគមន៍កសិកម្មសាមគ្គីត្រពាំងចក នឹងប្រែក្លាយខ្លួនទៅជាសហគមន៍កសិកម្មទំនើបគំរូនឹងរួមគ្នាបង្កើតជាសហគមន៍កសិកម្មទំនើប ដែលក្នុងជំហានដំបូង សហគមន៍នេះនឹងផ្តោតលើការដាំបន្លែ៤ប្រភេទនៅក្នុងផ្ទះសំណាញ់ជិត២០០ខ្នង និងគ្រោងចាប់ផ្តើមកាលវិភាគផលិតកម្មថ្មីចាប់ពីខែក្រោយទៅ ដោយរំពឹងទុកថានឹងអាចផ្គត់ផ្គង់បន្លែចម្រុះក្នុងរង្វង់ជាង៣តោនជារៀងរាល់ថ្ងៃ។
ជាមួយគ្នានេះដែរ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងកិច្ចប្រជុំលើសំណើពិនិត្យដោះស្រាយបញ្ហាប្រឈម និងសំណូមពររបស់វិស័យឯកជន បានគូសបញ្ជាក់ថា វិស័យឯកជនចាំបាច់ត្រូវធ្វើការសិក្សាឱ្យបានច្បាស់លាស់ ក្តោបព័ត៌មាន និងស្ថានការណ៍ឱ្យបានត្រឹមត្រូវ គ្រប់ជ្រុងជ្រោយ ទើបអាចវិភាគ និងវាយតម្លៃបញ្ហាប្រឈមនានាចំគោលដៅ និងមានប្រសិទ្ធភាព។
ឯកឧត្តមរដ្ឋមន្ត្រី បានបន្ថែមថា វិស័យឯកជនត្រូវសហការរួមគ្នា ចងក្រងគ្រប់ភាគីពាក់ព័ន្ធទាំងអស់ ស្វែងយល់ និងរកហេតុផលច្បាស់លាស់ ដើម្បីកាត់បន្ថយហានិភ័យខ្ពស់។
បើតាម ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ការកសាងទំនុកចិត្តទាំងអស់គ្នា គឺជាកត្តាចាំបាច់ក្នុងកិច្ចសហការ ស្វែងរកដំណោះស្រាយដែលល្អអាចទទួលយកបាន ព្រមទាំងទទួលបានផលចំណេញ និងមាននិរន្តរភាពសេដ្ឋកិច្ច។ ទន្ទឹមនឹងនេះ ឯកឧត្តមរដ្ឋមន្ត្រី ក៏បានណែនាំឱ្យមានការពង្រឹងខ្សែច្រវាក់តម្លៃ ប្រកបដោយបរិយាបន្ន៕
Account
Security
Favourite Content