សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ គណៈប្រតិភូធុរកិច្ចដែលមានក្រុមហ៊ុនសិង្ហបុរីចំនួន ១៦ បានបង្ហាញចំណាប់អារម្មណ៍ខ្ពស់ក្នុងការពង្រីកវត្តមានធុរកិច្ចរបស់ខ្លួនក្នុងប្រទេសកម្ពុជា ដែលគោលបំណងនេះត្រូវបានបង្ហាញនៅក្នុងជំនួបជាមួយឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីស្វែងយល់ពីឱកាសវិនិយោគនៅកម្ពុជា។
ក្រុមហ៊ុនសិង្ហបុរីដែលធ្វើអាជីវកម្មក្នុងវិស័យផ្សេងៗ ដូចជា វិទ្យាសាស្ត្រជីវិត ការបណ្តុះបណ្តាលផ្នែកឌីជីថល ការកែច្នៃម្ហូបអាហារ សេវាកម្មវិស្វកម្ម និងហេដ្ឋារចនាសម្ព័ន្ធ បានស្វែងយល់ពីទិដ្ឋភាពនៃការអភិវឌ្ឍនៅកម្ពុជា និងឱកាសវិនិយោគក្នុងវិស័យកម្មន្តសាល ការស្រាវជ្រាវ ការអភិវឌ្ឍន៍ និងនវានុវត្តន៍បច្ចេកវិទ្យា។ ក្រុមហ៊ុនទាំងនេះ មានមួយចំនួន បាន និងកំពុងធ្វើអាជីវកម្មនៅកម្ពុជាស្រាប់ ហើយកំពុងស្វែងរកឱកាសពង្រីកប្រតិបត្តិការ និងកិច្ចសហការថ្មីៗ។
ឯកឧត្តម ហែម វណ្ណឌី បានលើកឡើងថា៖
«កម្ពុជាមិនទាន់ជាទីផ្សារល្អឥតខ្ចោះទេ ប៉ុន្តែយើងជាប្រទេសដែលចង់បានការវិវត្ត និងមានរដ្ឋាភិបាលដែលចាំគាំទ្រវិស័យឯកជន។ ខណៈដែលយើងកំពុងត្រៀមខ្លួនចាកចេញពីឋានៈជាប្រទេសអភិវឌ្ឍន៍តិចតួចនៅចុងឆ្នាំ២០២៩ យើងស្វាគមន៍ភាពជាដៃគូរយៈពេលវែងដែលគាំទ្រកិច្ចខិតខំប្រឹងប្រែងរបស់យើងឆ្ពោះទៅរកសេដ្ឋកិច្ចផ្អែកលើចំណេះដឹង»។
ឯកឧត្តមរដ្ឋមន្ត្រីក៏បានស្នើឱ្យក្រុមហ៊ុនសិង្ហបុរីសហការជាមួយក្រុមហ៊ុនក្នុងស្រុកលើវិស័យបច្ចេកវិទ្យា ការគាំទ្រសហគ្រាសធុនតូច និងមធ្យម និងធុរកិច្ចបង្កើតថ្មី និងការអភិវឌ្ឍកម្លាំងពលកម្ម ដោយក្រសួងនឹងជួយសម្របសម្រួលការភ្ជាប់ទំនាក់ទំនងពួកគេជាមួយដៃគូក្នុងស្រុក។
ឯកឧត្តមរដ្ឋមន្ត្រីបានបន្ថែមថា៖
«កម្ពុជាមិននៅទ្រឹងទេ យើងកំពុងធ្វើដំណើរទៅមុខ ហើយយើងចង់ឱ្យក្រុមហ៊ុនសិង្ហបុរីរួមដំណើរនេះទៅមុខជាមួយយើង មិនត្រឹមតែក្នុងកម្រិតគោលនយោបាយទេ ប៉ុន្តែតាមរយៈការអនុវត្តគម្រោងវិនិយោគដែលផ្តល់ផលជាក់ស្តែង»។
សូមបញ្ជាក់ថា ក្រុមហ៊ុន Keystone Cable, Vegafoods Singapore, Emaan Inspection និង Kydon Holdings បានបង្ហាញចំណាប់អារម្មណ៍ក្នុងការស្វែងរកដៃគូក្នុងស្រុក ដោយដាក់កម្ពុជាជាទិសដៅ សម្រាប់ការពង្រីកការវិនិយោគ និងនវានុវត្តន៍៕
Account
Security
Favourite Content