បរទេស ៖ ក្រោយការប្រកាសបង្កើតមូលនិធិថ្មីមួយសម្រាប់ពង្រឹងវិស័យការពាររបស់អឺរ៉ុប មកដល់ពេលនេះគេមើលឃើញថាបណ្តាសមាជិករបស់ខ្លួនចំនួន១៨ប្រទេសហើយដែលបានដាក់ពាក្យស្នើសុំកម្ចីចេញពីកញ្ចប់ថវិកាពីមូលនីធិថ្មីមួយនេះ។

ទិន្នន័យដែលត្រូវបានបង្ហាញដោយកាសែត AP បានសរសេរថា មូលនិធិសម្រាប់វិស័យការពារជាតិរបស់អឺរ៉ុបដែលមានឈ្មោះពេញថា Security Action for Europe (SAFE) ទើបតែត្រូវបានបង្កើតឡើង គឺជាកម្មវិធីកម្ចីដែលផ្តល់ដោយអឺរ៉ុបសម្រាប់ទាំងបណ្តាប្រទេសដែលជាសមាជិក ទាំងមិនមែនសមាជិក សូម្បីតែអ៊ុយក្រែនក្តី បូករួមទាំងអង់គ្លេសផងដែរ ដើម្បីយកទៅប្រើប្រាសក្នុងការពង្រឹងសមត្ថភាពរបស់ខ្លួនលើវិស័យយោធា។

អ្វីដែលគួរឲ្យកត់សំគាល់នោះគឺថា វាជាកម្ចីដែលមានអត្រាការប្រាក់ទាបបំផុត និងអាចប្រើប្រាស់ដើម្បីទិញឧបករណ៍ជាសពា្វវុធគ្រប់បែបយ៉ាងទាំងអស់ ប៉ុន្តែទោះជាយ៉ាងណាក្តី វានឹងត្រូវភ្ជាប់មកជាមួយនឹងលក្ខខណ្ឌមួយចំនួនដែលផ្តោតសំខាន់តែទៅលើបញ្ហាសន្តិសុខសម្រាប់តំបន់អឺរ៉ុបប៉ុណ្ណោះ។

SAFE ត្រូវបានបង្កើតឡើកដំបូងក្រោយពេលដែលរដ្ឋបាលអាម៉េរិកក្រោមការដឹកនាំរបស់លោក Donald Trump បានបង្ហាញសញ្ញាថា រដ្ឋាភិបាលទីក្រុងវ៉ាស៊ិនតោននឹងលែងដាក់បញ្ហាសន្តិសុខរបស់អឺរ៉ុបជាកិច្ចការងារអាទិភាពទៀតហើយ។ ដូច្នេះ មូលនិធិនេះនឹងអនុញ្ញាតឲ្យម្ចាស់កម្ចីយកទៅប្រើប្រាស់ក្នុងការបញ្ជាទិញអាវុធបានគ្រប់ប្រភេទរាប់ចាប់ពីមីស៊ីល ប្រព័ន្ធការពារកាំភ្លើងធំ គ្រាប់រំសេវ ឬដ្រូនជាដើម។

គណៈកម្មការរបស់សហភាពអឺរ៉ុបបានប្រកាសថា ប្រទេសដែលបានដាក់ពាក្យសុំខ្ចីពី SAFE ទាំងនោះរួមដូចជា ប៊ែលហ្ស៊ិក ប៊ុលហ្គារី ក្រូអាត ហ្ស៊ីប ឆេក អេស្តូនី ហ្វាំងឡង់ បារាំងក្រិក ហុងគ្រី អ៊ីតាលី ឡាតវៀ លុយនេស៊ី ប៉ូឡូញ ប៉ទុយហ្គាល់ រ៉ូមេនី ស្លូវ៉ាគី និងអេស្បាញ ដែលមានទំហំកម្ចីសរុបប្រមាណ ១២៧ពាន់លានអឺរ៉ូ ឬត្រូវជា ១៤៧ពាន់លានដុល្លារ ដែលក្នុងនោះប្រទេសប៉ូឡូញបានស្នើសុំកម្ចីក្នុងទំហំស្ទើតែ ១ ភាគ ៣ នៃលុយសរុបនេះ។

គួរឲ្យដឹងដែរថា ក្រុមប្រទេសដែលជាសម្ព័ន្ធមិត្ត​អាម៉េរិក​នៅ​អឺរ៉ុប​គេជឿជាក់​ថា ​ប្រធានាធិបតី​រុស្សី លោក Vladimir Putin នឹងមានផែនការក្នុងការ​កំណត់​គោលដៅ​មួយទៀត​ក្នុងចំណោម​ពួកគេ ប្រសិនបើ​រុស្ស៊ី​ឈ្នះ​សង្គ្រាម​លើ​អ៊ុយ​ក្រែ​ន​៕