បរទេស៖ យោងតាមប្រភពព័ត៌មានពី BBC បានរាយការណ៍ថា កិច្ចចរចា​ថ្មី​មួយរវាង​អាមេរិក​ និង​ចិន​ ក្នុង​គោល​បំណង​ដោះស្រាយ​សង្គ្រាម​ពាណិជ្ជកម្ម​នឹងត្រូវ​រៀបចំ​ធ្វើ​នៅ​ទីក្រុង​ឡុងដ៍​នាថ្ងៃ​ចន្ទ សប្ដាហ៍នេះ។

កាលពីថ្ងៃសុក្រ ប្រធានាធិបតីអាម៉េរិក Donald Trump បានប្រកាសថា គណៈប្រតិភូជាន់ខ្ពស់អាម៉េរិកនឹងជួបជាមួយតំណាងរបស់ចិន ខណៈដែលទីក្រុង​ប៉េកាំង​ក៏បាន​បញ្ជាក់ដែរ​ថា ឧបនាយក​រដ្ឋមន្ត្រី He Lifeng នឹង​ចូល​រួម​ក្នុង​កិច្ច​ពិភាក្សា​នេះ។ ការ​ប្រកាស​នេះ​បាន​កើត​ឡើង​បន្ទាប់​ពី​ Trump និង​ប្រធានាធិបតី​ចិន Xi Jinping បាន​សន្ទនាគ្នា​តាម​ទូរស័ព្ទ​កាល​ពី​សប្តាហ៍​មុន។

នៅឯកិច្ចប្រជុំមួយនៅទីក្រុងហ្សឺណែវកាលពីខែឧសភា មហាអំណាចទាំងពីរបានព្រមព្រៀងគ្នាបន្ថយសម្ពាធពាណិជ្ជកម្មសម្រាប់រយៈពេលខ្លី ៩០ ថ្ងៃ ដោយអាម៉េរិកបានទម្លាក់ពន្ធលើទំនិញពីប្រទេសចិនពី ១៤៥% មកត្រឹម ៣០% ខណៈដែលចិនបន្ទាបពន្ធលើទំនិញនាំចូលពីអាម៉េរិក​ពី ១២៥% មកត្រឹម ១០%។ ក្រោយមក​ ទាំងអាម៉េរិក និងចិន បានចោទប្រកាន់គ្នាទៅវិញទៅមកអំពីការបំពានលើកិច្ចព្រមព្រៀងបណ្តោះអាសន្ននោះ។

កាលពីថ្ងៃសុក្រ Trump បានបង្ហោះលើបណ្តាញសង្គមថា រដ្ឋមន្ត្រីក្រសួងរតនាគារ Scott Bessent, រដ្ឋមន្ត្រីក្រសួងពាណិជ្ជកម្ម Howard Lutnick និងតំណាងពាណិជ្ជកម្ម Jamieson Greer នឹងជួបជាមួយមន្ត្រីចិននៅទីក្រុងឡុងដ៍នាថ្ងៃច័ន្ទសប្ដាហ៍នេះ ខណៈដែលកាលពីថ្ងៃសៅរ៍សប្ដាហ៍មុន ក្រសួងការបរទេសចិនក៏បានលើកឡើងផងដែរថា ឧបនាយករដ្ឋមន្ត្រី He Lifeng នឹងទៅអង់គ្លេសចន្លោះពីថ្ងៃទី ៨ ដល់ថ្ងៃទី១៣ ខែមិថុនា ហើយកិច្ចប្រជុំនៃយន្តការសេដ្ឋកិច្ច និងពាណិជ្ជកម្មចិន-អាមេរិក នឹងប្រព្រឹត្តទៅក្នុងអំឡុងពេលនោះ។

ជាទូទៅ ចិនចង់ឱ្យមានការចរចារវាងមន្ត្រី ឬ ថ្នាក់ក្រោមសិនមុននឹងមានការចរចានៅតុប្រធានាធិបតី។ ការចរចាថ្មីនេះបានកើតឡើងបន្ទាប់ពីមេដឹកនាំទាំងពីរបានសន្ទនាគ្នាតាមទូរស័ព្ទ ដោយ Trump អះអាងថា ពួកគេផ្តោតសំខាន់លើពាណិជ្ជកម្មជាមួយនឹងលទ្ធផលវិជ្ជមានសម្រាប់ប្រទេសទាំងពីរ។ ទន្ទឹមនឹងនោះ ប្រធានាធីបតីចិន Xi ជំរុញឲ្យអាម៉េរិកដកចេញនូវវិធានការដែលប្រឆាំងនឹងចិន។

យ៉ាងណាក៏ដោយ ទោះបីជាការព្រមព្រៀងគ្នាកាត់បន្ថយសម្ពាធពាណិជ្ជកម្មរយៈពេលខ្លីក៏ដោយ ប៉ុន្តែអាម៉េរិកបានចោទប្រកាន់ថា ចិនមិនដកការរឹតបន្តឹងការនាំចេញសារធាតុរ៉ែកម្រ ដែលជាផ្នែកសំខាន់ក្នុងការផលិតចាប់តាំងពីគ្រឿងអេឡិចត្រូនិក ទូរស័ព្ទ និងរថយន្តអគ្គិសនី រហូតដល់សព្វាវុធធំៗ ដូចជា យន្តហោះចម្បាំង F-35 និងប្រព័ន្ធមីស៊ីលជាដើម។ ជាការឆ្លើយតប ទីក្រុងប៉េកាំងបានចោទប្រកាន់វិញថា អាម៉េរិកបានរំលោភលើកិច្ចព្រមព្រៀងរួមមានការបញ្ឈប់ការលក់កម្មវិធីរចនាបន្ទះឈីបទៅឱ្យក្រុមហ៊ុនចិន, ការព្រមានប្រឆាំងមិនឲ្យប្រើប្រាស់បន្ទះឈីបដែលផលិតដោយក្រុមហ៊ុនបច្ចេកវិទ្យាចិន Huawei, និងការលុបចោលទិដ្ឋាការសម្រាប់និស្សិតចិន។ យ៉ាងណាមិញ Trump បាននិយាយកាលពីថ្ងៃសុក្រថា Xi បានយល់ព្រមបើកពាណិជ្ជកម្មសារឡើងវិញលើសារធាតុរ៉ែកម្រ៕