បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា តម្លៃប្រេងបានធ្លាក់ចុះបន្តិចបន្ទាប់ពីអ៊ីស្រាអែល និងក្រុមសកម្មប្រយុទ្ធប៉ាឡេស្ទីន ហាម៉ាស (Hamas)បានចុះហត្ថលេខាលើកិច្ចព្រមព្រៀងមួយ ដើម្បីបញ្ឈប់ការបាញ់ប្រហារនៅតំបន់ហ្គាហ្សា។

ជាលទ្ធផលនាពេលនេះ តម្លៃប្រេងឆៅម៉ាក Brent ធ្លាក់ចុះ ១,៦% ឬ ៦៥,២២ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) បានធ្លាក់ចុះ ១,៧% ឬ ៦១,៥១ ដុល្លារក្នុងមួយបារ៉ែល។  

កាលពីថ្ងៃព្រហស្បតិ៍ សប្ដាហ៍នេះ អ៊ីស្រាអែល និងក្រុមសកម្មប្រយុទ្ធប៉ាឡេស្ទីន Hamas បានចុះហត្ថលេខាលើកិច្ចព្រមព្រៀងមួយ ដើម្បីបញ្ឈប់ការបាញ់ប្រហារ និងដោះលែងចំណាប់ខ្មាំងអ៊ីស្រាអែលជាថ្នូរនឹងអ្នកទោសប៉ាឡេស្ទីន។ នៅក្រោមកិច្ចព្រមព្រៀងឈប់បាញ់ ការប្រយុទ្ធគ្នានឹងឈប់ ហើយអ៊ីស្រាអែលនឹងដកខ្លួនចេញមួយផ្នែកពីហ្គាហ្សា ចំណែកឯក្រុមហាម៉ាស់នឹងដោះលែងចំណាប់ខ្មាំងដែលនៅសល់ទាំងអស់ដែលខ្លួនចាប់បាន ជាថ្នូរនឹងអ្នកទោសរាប់រយនាក់ដែលត្រូវបានចាប់ដោយអ៊ីស្រាអែលដូចគ្នា។

លោក Claudio Galimberti ប្រធានសេដ្ឋវិទូរបស់ក្រុមហ៊ុនថាមពល Rystad Energy បានលើកឡើងថា កិច្ចព្រមព្រៀងសន្តិភាព គឺជារបកគំហើញដ៏សំខាន់មួយនៅក្នុងប្រវត្តិសាស្ត្រមជ្ឈិមបូព៌ានាពេលថ្មីៗនេះ។ មិនត្រឹមតែប៉ុណ្ណោះ អង្គការនៃប្រទេសនាំចេញប្រេង និងសម្ព័ន្ធមិត្ត OPEC+ បានយល់ព្រមចំពោះការដំឡើងទិន្នផលខែវិច្ឆិកាបើទោះបីជាក្នុងបរិមាណតិចជាងការរំពឹងទុករបស់ទីផ្សារក៏ដោយ ប៉ុន្តែវាអាចបន្ធូរបន្ថយក្ដីព្រួយបារម្ភលើការផ្គត់ផ្គង់លើស។ យ៉ាងណាមិញ គេនៅតែមានការព្រួយបារម្ភពីភាពមិនច្បាស់លាស់នៃតម្លៃប្រេងឡើងចុះ ដោយសារបញ្ហានយោបាយសកលមួយចំនួន។

កាលពីថ្ងៃពុធ សប្ដាហ៍នេះ តម្លៃប្រេងបានឡើងថ្លៃប្រហែល ១% បន្ទាប់ពីអ្នកវិនិយោគបានមើលឃើញការជាប់គាំងលើកិច្ចព្រមព្រៀងសន្តិភាពអ៊ុយក្រែន និងជាសញ្ញាដែលអាចមានទណ្ឌកម្មប្រឆាំងនឹងរុស្ស៊ីដែលជាប្រទេសនាំចេញប្រេងធំទីពីររបស់ពិភពលោក។ លើសពីនេះ ការបិទប្រតិបត្តិការមួយចំនួន​ និងផ្អាកបញ្ចេញទិន្នន័យសេដ្ឋកិច្ចមួយចំនួនរបស់អាម៉េរិកអាចធ្វើឱ្យសេដ្ឋកិច្ចធ្លាក់ចុះ និងប៉ះពាល់ដល់តម្រូវការប្រេង។ ទន្ទឹមនឹងនេះ នាយករដ្ឋមន្ត្រីឥណ្ឌា Narendra Modi បានបង្ហើបថា លោកបាននិយាយជាមួយប្រធានាធិបតីអាម៉េរិក Donald Trump ដើម្បីពិនិត្យឡើងវិញនូវវឌ្ឍនភាពដ៏ល្អដែលសម្រេចបាននៅក្នុងកិច្ចចរចាពាណិជ្ជកម្ម និងយល់ព្រមរក្សាទំនាក់ទំនងជាមួយគ្នាយ៉ាងជិតស្និទ្ធ។ កាលពីខែសីហា លោក Trump បានដាក់ទណ្ឌកម្មដោយការដំឡើងពន្ធរហូតដល់ ៥០% លើការនាំចូលពីឥណ្ឌា ពាក់ព័ន្ធនឹងការដែលប្រទេសនេះបន្តទិញប្រេងពីរុស្ស៊ី៕