សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា តម្លៃប្រេងបានធ្លាក់ចុះជាង ៣ ភាគរយ ខណៈដែលអ្នកវិនិយោគកំពុងព្រួយបារម្ភពីភាពតានតឹងនៃសង្រ្គាមពាណិជ្ជកម្មអាម៉េរិក និងចិន។
តម្លៃប្រេងម៉ាក Brent ធ្លាក់ចុះ ៣,៣% ឬ ៦៣,៣៣ ដុល្លារក្នុងមួយបារ៉ែល ខណៈដែលតម្លៃប្រេងម៉ាក West Texas Intermediate (WTI) ធ្លាក់ចុះ ៣,៧% ឬ ៦០ ដុល្លារក្នុងមួយបារ៉ែល។ កាលពីថ្ងៃពុធ សប្ដាហ៍នេះ តម្លៃនៃម៉ាកប្រេងទាំងពីរឡើងថ្លៃជាង ២ ដុល្លារក្នុងមួយបារ៉ែល ប៉ុន្តែ បន្ទាប់ពីប្រធានាធិបតីអាម៉េរិក Donald Trump ប្រកាសពីការពន្យារពេលយកពន្ធឆ្លើយតបឲ្យមានភាពស្មើគ្នាពីដៃគូពាណិជ្ជកម្មជាច្រើន។ ក្នុងពេលជាមួយគ្នានោះដែរ Trump បានដំឡើងពន្ធបន្ថែម ១២៥% លើប្រទេសចិន ពីលើពន្ធដែលមានស្រាប់ ២០% ដែលចូលជាធរមានកាលពីខែមីនា។ ជាលទ្ធផល ពន្ធលើការនាំចូលរបស់ចិនមកកាន់អាម៉េរិកមានចំនួនសរុប ១៤៥%។ ទន្ទឹមនឹងនេះ ចិនបានប្រកាសពីការយកពន្ធបន្ថែមទៀតលើការនាំចូលទំនិញរបស់សហរដ្ឋអាម៉េរិក ៨៤% ។
យ៉ាងណាមិញ ការដំឡើងពន្ធខ្ពស់របស់អាម៉េរិកប្រឆាំងនឹងចិន នឹងបង្កឲ្យមានការធ្លាក់ចុះនៃការនាំចេញប្រេងឆៅរបស់សហរដ្ឋអាម៉េរិកទៅកាន់ទីក្រុងប៉េកាំង ហើយប្រេងនៅក្នុងស្តុករបស់អាម៉េរិកនឹងកើនឡើង។ កាលពីខែមីនា ការនាំចេញប្រេងឆៅរបស់អាម៉េរិកទៅកាន់ចិនបានធ្លាក់ចុះដល់ ១១២ ០០០ បារ៉ែលក្នុងមួយថ្ងៃ (bpd) ដែលធ្លាក់ចុះពី ១៩០ ០០០ បារ៉ែលក្នុងមួយថ្ងៃ បើធៀបនឹងរយៈពេលដូចគ្នាកាលពីឆ្នាំមុន។ ជាក់ស្តែង តម្លៃប្រេងបានធ្លាកចុះបន្ទាប់ពី Trump ដំឡើងពន្ធ ១២៥ ភាគរយលើប្រទេសចិន។ កាលពីថ្ងៃពុធ ទិន្នន័យរបស់រដ្ឋាភិបាលអាម៉េរិក បង្ហាញថា ស្តុកប្រេងឆៅរបស់ អាម៉េរិកបានកើនឡើង ២,៦ លានបារ៉ែល ដែលស្ទើរតែទ្វេដងនៃចំនួនព្យាករណ៍ ១,៤ លានបារ៉ែល។
អ្នកវិភាគសេដ្ឋកិច្ច លើកឡើងថា ប្រសិនបើជម្លោះពាណិជ្ជកម្មនឹងបន្តយូរជាងនេះ សេដ្ឋកិច្ចសកលនឹងទទួលរងការខូចខាតយ៉ាងធ្ងន់ធ្ងរ។ មិនត្រឹមតែប៉ុណ្ណោះ រដ្ឋបាលព័ត៌មានថាមពលអាម៉េរិក (EIA) បានបន្ទាបការព្យាករណ៍កំណើនសេដ្ឋកិច្ចពិភពលោករបស់ខ្លួន ហើយបានព្រមានថាពន្ធគយនឹងមានសម្ពាធលើតម្លៃប្រេង ដោយសារតែវាបានកាត់បន្ថយតម្រូវការប្រេងរបស់អាម៉េរិក និងពិភពលោកទាំងនៅឆ្នាំនេះ និងឆ្នាំក្រោយ៕
Account
Security
Favourite Content