សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ អគ្គនាយកក្រុមហ៊ុន វីរៈប៊ុនថាំ អេចប្រេស អ្នកឧកញ៉ា សួរ វីរៈ បានឲ្យដឹងថា ភ្ញៀវទេសចរនឹងអាចធ្វើដំណើរតាមនាវាទៅកម្សាន្តកោះត្រល់នាពេលឆាប់ៗខាងមុខនេះ បន្ទាប់ពីរដ្ឋាភិបាលវៀតណាមផ្តល់ការអនុញ្ញាតជាផ្លូវការ។
អ្នកឧកញ៉ា សួរ វិរៈ បានប្រាប់បណ្តាញផ្សព្វផ្សាយ AMS ថា ការចរចាជាមួយអាជ្ញាធរវៀតណាមរយៈពេលប៉ុន្មានខែកន្លងមកនេះ ទទួលបានលទ្ធផលជាវិជ្ជមាន ហើយនៅពេលនេះ ក្រុមហ៊ុន វីរៈ ប៊ុនថាំ កំពុងរង់ចាំការសម្រេចចុងក្រោយពីរដ្ឋាភិបាលវៀតណាម ដើម្បីអនុញ្ញាតឱ្យកប៉ាល់របស់ក្រុមហ៊ុន វីរៈ ប៊ុនថាំ ដឹកជញ្ជូនទេសចរចេញពីកំពង់ផែទេសចរណ៍អន្តរជាតិខេត្តកំពត ឆ្ពោះទៅកោះត្រល់។
អ្នកឧកញ៉ាបានបញ្ជាក់ថា ៖
«មកដល់ពេលនេះ ការតភ្ជាប់ខ្សែដឹកជញ្ជូនតាមផ្លូវទឹក ពីកំពត ទៅ កោះត្រល់ យើងមានសញ្ញាខៀវហើយ ដើម្បីអាចដឹកភ្ញៀវទេសចរពីកំពង់ផែកំពតទៅកោះត្រល់។ តែយើងរង់ចាំការសម្រេចចុងក្រោយខាងភាគីវៀតណាម»។
អ្នកឧកញ៉ា សួរ វីរៈ បានបង្ហាញពីភាពសុទិដ្ឋិនិយមថា ការតភ្ជាប់ការដឹកជញ្ជូនភ្ញៀវទេសចរតាមផ្លូវទឹក នឹងជះឥទ្ធិពលវិជ្ជមានដល់វិស័យទេសចរណ៍កម្ពុជា ស្របពេលភ្ញៀវទេសចរមកពីប្រទេសវៀតណាម បានកើនឡើងគួរឱ្យកត់សម្គាល់នៅរយៈពេលចុងក្រោយនេះ។
បើតាមអ្នកឧកញ៉ា សួរ វីរៈ កំណើនទេសចរវៀតណាម និងទេសចរបរទេសមកកាន់ប្រទេសកម្ពុជា កើនឡើងក្រោយពីប្រទេសថៃបានបង្កជម្លោះព្រំដែនជាមួយប្រទេសកម្ពុជា។ ជាក់ស្ដែង លំហូរភ្ញៀវ ដែលធ្វើដំណើររវាងកម្ពុជា -វៀតណាម តាមរថយន្ត ក្រុមហ៊ុន វីរៈ ប៊ុនថាំ មានការកើនឡើងពី ៦ជើង ទៅ ១៤ជើង ក្នុងមួយថ្ងៃ។
ក្រៅពីគម្រោងតភ្ជាប់ទេសចរពីកំពង់ផែកំពត-កោះត្រល់ នៅក្នុងឆ្នាំ២០២៦នេះ អ្នកឧកញ៉ា សួរ វីរៈ ក៏គ្រោងបោះទុនវិនិយោគប្រមាណ ៨លានដុល្លារបន្ថែម លើផែនការពង្រីកសេវា ក្នុងវិស័យទេសចរណ៍ ដូចជា ការអភិវឌ្ឍន៍ឆ្នេរ និងរីស៊ត ជាដើម ដើម្បីឲ្យស្របតាមគោលនយោបាយរបស់រដ្ឋាភិបាលក្នុងការលើកកម្ពស់ភាពទាក់ទាញក្នុងវិស័យទេសចរណ៍ ការកសាងហេដ្ឋារចនាសម្ព័ន្ធថ្មីៗ ដែលចូលរួមចំណែកយ៉ាងសកម្មក្នុងការទាក់ទាញវិនិយោគិនក្នុងវិស័យទេសចរណ៍។
យោងតាមរបាយការណ៍របស់ក្រសួងទេសចរណ៍ ភ្ញៀវទេសចរមកពីប្រទេសវៀតណាម មានចំនួន ១,២២លាននាក់ កាលពីឆ្នាំ២០២៥ បានស្ថិតនៅកំពូលតារាងក្នុងចំណោមទេសចរបរទេសសរុបជាង ៥.៥លាននាក់ដែលបានមកកម្សាន្តនៅលើទឹកដីកម្ពុជា៕ ដោយ ៖ ខន ណារី AMS
Account
Security
Favourite Content