ខេត្តព្រះសីហនុ៖ សមាគមទេសចរណ៍អាស៊ីប៉ាស៊ីហ្វិកកម្ពុជា (PATA Cambodia Chapter) និង ក្រុមហ៊ុន ជី.ធី.វី.ស៊ី អិចផត ខូ អិលធីឌី (G.T.V.C) Import Export Co.,Ltd នាព្រឹកថ្ងៃទី១៤ ខែមីនា ឆ្នាំ២០២៥ បានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីចាប់ដៃគូយុទ្ធសាស្ត្ររួមគ្នាពង្រីកនូវបណ្តាញសេវាកម្មទេសចរណ៍ និងបង្កើនហេដ្ឋារចនាសម្ព័ន្ធ សម្បទាទេសចរណ៍ ដែលជាចល​ក​រដ៏សំខាន់បន្ថែមទៀតចូលរួមជំរុញ និងសម្រេចបាននូវចក្ខុវិស័យ លើកកម្ពស់វិស័យទេស​ចរណ៍​នៅកម្ពុជា។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និង ឯកឧត្តម ម៉ាង ស៊ីណេត អភិបាលខេត្តព្រះសីហនុ បានអញ្ជើញជាសាក្សីនៃការការចុះហត្ថលេខានេះ។ លោកបណ្ឌិត ធួន ស៊ីណាន ប្រធានសមាគមទេស​ចរណ៍អាស៊ីប៉ាស៊ីហ្វិកកម្ពុជា(PATA)និងអ្នកឧកញ៉ា ទៀ វិចិត្រ អគ្គនាយកក្រុមហ៊ុន ជី.ធី.វី.ស៊ី( G.T.V.C) ជាហត្ថលេខីលើ MoU ដែលធ្វើឡើងនៅរមណីយដ្ឋាន Wonderland Suites & Resort ក្នុងភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ។

អ្នកឧកញ៉ា ទៀ វិចិត្រ បានថ្លែងថា ៖ អនុស្សរណៈនេះផ្តោតទៅលើការផ្សព្វផ្សាយទាក់ទាញទេសចរមកកាន់កម្ពុជា ជាពិសេសមកកាន់តំបន់សមុទ្រខេត្តព្រះសីហនុ ។ សព្វថ្ងៃក្រុមហ៊ុន GTVC Import Export Co., Ltd. មានផលិតផល និងសេវាកម្មទេសចរណ៍សំខាន់ៗមួយចំនួនក្នុងខេត្តព្រះសីហនុ ដូចជាក្នុងស្រុកព្រៃនប់នេះមាន Wonderland Suites & Resort ដែលកំពុងដាក់ដំណើរការសេវាកម្មស្នាក់នៅកម្សាន្តប្រភេទវីឡាមានអាងទឹកឯកជនចំនួន ២៧ផ្ទះវីឡា និងបឹងហ្គាឡូកំពុងសាងសង់មានចំនួន៣០បឹងហ្គាឡូ។ ចំពោះសេវាកម្មនៅលើកោះរ៉ុង មាន Mafiya’s Resort Cambodia ដែលបានបើកបម្រើសេវាកម្មស្នាក់នៅប្រណិតតាំងពីឆ្នាំ២០​១​៨ ដែលមកដល់បច្ចុប្បន្ន រួមមាន ៦១ផ្ទះភ្ញៀវបែងចែកជាច្រើនបន្ទប់។

ដោយឡែក កំពង់ផែទេសចរណ៍ខេត្តព្រះសីហនុត្រូវបានដាក់ឱ្យប្រើប្រាស់ជាផ្លូវការតាំងពីឆ្នាំ២០២៣ មកដល់បច្ចុប្បន្នដែលក្រុមហ៊ុន ជី.ធី.វី.ស៊ី បានទទួលសិទ្ធិវិនិយោគពីកំពង់ផែអន្តរជាតិក្រុងព្រះសីហនុ លើផ្ទៃដីប្រមាណ ២២០០០ម៉ែត្រការ៉េ។ កំពង់ផែទេសចរណ៍ខេត្តព្រះសីហនុមានសមត្ថភាពទទួលអូប័រទេសច​រ​ណ៍​តូចធំចេញចូលម្តង២០គ្រឿងក្នុងពេលតែមួយ និងមានក្រុមហ៊ុនអូប័រចំនួន២១ជាសមា​ជិ​ករបស់សមា​គមភ្នាក់ងារដឹកជញ្ជូនទេសចរណ៍ជលយានខេត្តព្រះសីហនុ។ នៅក្នុងកំពង់ផែទេសចរណ៍ខេត្តព្រះសីហនុនេះ មានសម្បទាទ្រទ្រង់ទេសចរណ៍ជាច្រើន រួមមានហាងកាហ្វេអាម៉ាហ្សូន ហាង7-Eleven ម៉ាស៊ីនទូ​ ATM អាហារដ្ឋាន ចំណតរថយន្ត ចំណតអង្គុយរង់ចាំចុះអូប័រ ហាងលក់សំលៀកបំពាក់ បន្ទប់ទឹកសាធារណៈសេវាកម្មសន្តិសុខ២៤ម៉ោងនិងការិយាល័យក្រុមហ៊ុនផ្សេងៗសរុបជាង២០ក្រុមហ៊ុន​។ កំពង់ផែទេស​ចរណ៍ខេត្តព្រះសីហនុ មានភ្ញៀវធ្វើដំណើរទៅបណ្តាកោះនានាចំនួនប្រមាណ ១ពាន់ នាក់ គិតជាមធ្យមក្នុងមួយថ្ងៃ។

លោកបណ្ឌិត ធួន ស៊ីណាន បានមានប្រសាសន៍ថា ៖ កិច្ចសហការនេះ មានគោលដៅចូលរួមអភិវឌ្ឍកញ្ចប់ទស្សនកិច្ចកម្ពុជា បង្កើនផលិតផលទេសចរណ៍ថ្មីៗ និងសេវាកម្មទេសចរណ៍ ជាពិសេសធ្វើយ៉ាងណាទាក់ទាញទេសចរទាំងក្នុងស្រុក និងអន្តរជាតិឱ្យបានកាន់តែច្រើន។

លោកបានបញ្ជាក់ថា៖ ដើម្បីគាំទ្រការវិនិយោគរបស់វិស័យឯកជនលើវិស័យទេសចរណ៍នេះ PATA ដែលមានសមាជិក ១៥៣ក្រុមហ៊ុន បានចូលរួមផ្សព្វផ្សាយគោលដៅទេសចរណ៍ រៀបចំខ្សែទស្សនកិច្ចថ្មី ដើម្បីទាក់ទាញទេសចរមកកម្ពុជា។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍បានថ្លែងថា៖ ខេត្តព្រះសីហនុបានអភិវឌ្ឍហេដ្ឋារចនាសម្ព័ន្ធរូបវ័ន្តជាច្រើន និងត្រូវបានសាងសង់ជាបន្តបន្ទាប់ស័ក្តិសមនឹងក្លាយទៅជាតំបន់សេដ្ឋកិច្ចពិសេសគំរូពហុបំណងដោយសារខេត្តនេះមានទីតាំងភូមិសាស្រ្តល្អ មានធនធានធម្មជាតិមានឆ្នេរសមុទ្រដ៏ស្រស់ស្អាតមានកំពង់ផែមានដីកសិកម្ម និងសក្ដានុពលជាច្រើនទៀតស្របនឹងខេត្តតាមតំបន់ឆ្នេរផ្សេងទៀតជារបៀងសេដ្ឋកិច្ចពិសេសប្រទាក់ក្រឡាដោយឆ្នេរសមុទ្រកម្ពុជា ត្រូវបានប្រសិទ្ធនាម ជាតារារះនាទិសនិរតី និងបណ្តាញសកលនៃគោលដៅទេសចរណ៍។

ឯកឧត្តមរដ្ឋមន្ត្រី បានថ្លែងបន្តថា៖ វិស័យទេសចរណ៍ ដើរតួនាទីជាវិស័យស្នូលធំមួយនៅក្នុងការប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសពហុបំណង» ដោយខេត្តព្រះសីហនុ នឹងក្លាយទៅជាច្រកចេញ-ចូលនៃតំបន់ឆ្នេរសមុទ្រកម្ពុជា, ជាគោលដៅទេសចរណ៍ឆ្នេរសមុទ្រកម្រិតស្តង់ដាអន្តរជាតិ និងជាតំបន់ទេសចរណ៍ដ៏ល្បីល្បាញ ប្រកបដោយភាពទាក់ទាញកម្រិតខ្ពស់មួយក្នុងអាស៊ាន។

ឯកឧត្តម ម៉ាង ស៊ីណេត អភិបាលខេត្តព្រះសីហនុបានមានប្រសាសន៍លើកឡើងថា៖ អនុស្សរណៈនៃការយោគយល់គ្នា ជាសក្ខីភាពបង្ហាញឲ្យឃើញពីការជឿជាក់របស់អ្នកវិនិយោគទុនមកលើរាជរដ្ឋាភិបាលកម្ពុជា។រាជរដ្ឋាភិបាលកម្ពុជានីតិកាលទី៧ បានបន្តលើកកម្ពស់វិស័យទេសចរណ៍ ជាពិសេសបន្តជំរុញការអភិវឌ្ឍ ទេសចរណ៍វប្បធម៌ និងធម្មជាតិ ដោយបន្ថែមទេសចរណ៍បៃតង ស្អាត និងវៃឆ្លាត ជំរុញការបង្កើតប្រភេទផលិតផលទេសចរណ៍ថ្មីៗ ដែលមានតម្លៃបន្ថែមខ្ពស់និងទេសចរណ៍ធុរកិច្ច តាមរយៈការលើកកម្ពស់ការអនុវត្ត ក៏ដូចជាការរៀបចំនិងការដាក់ចេញគោលនយោបាយនិងផែនការមេអភិវឌ្ឍន៍វិស័យទេសចរណ៍នានា៕