សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការចិញ្ចឹមមាន់ និងកង្កែប គឺជាជម្រើសដ៏ល្អមួយក្នុងការបង្កើនចំណូលសម្រាប់ប្រជាពលរដ្ឋក្នុងសហគមន៍ខេត្តពោធិ៍សាត់ ដោយមានការលើកទឹកចិត្តពីកម្មវិធីគាំទ្រដោយគម្រោងអភិរក្សធនធានធម្មជាតិ REDD+ សំកុស ក្រោមការគាំទ្រអនុវត្តដោយអង្គការសម្ព័ន្ធសត្វព្រៃ (WA) សហការជាមួយក្រសួងបរិស្ថាន។
ឆ្លើយតបទៅនឹងកិច្ចប្រឹងប្រែងទៅលើកិច្ចការប្រឹងប្រែងទប់ស្កាត់ការប្រែប្រួលអាកាសធាតុ តាមរយៈការចូលរួមថែរក្សាព្រៃឈើ ដើម្បីលក់ឥណទានកាបូន គម្រោងនេះក៏គាំទ្រដល់ប្រជាជនក្នុងសហគមន៍ដែលឈប់កាប់ឈើ និងបរបាញ់ខុសច្បាប់ ដោយចូលរួមជាមួយគម្រោងដើម្បីការពារធនធានធម្មជាតិតាមបច្ចេកទេស និងធនធានដែលមាន។
ការអនុវត្តគម្រោងនេះទទួលបានការចាប់អារម្មណ៍ពីពលរដ្ឋក្នុងសហគមន៍ រហូតមកដល់ពេលនេះមានប្រជាពលរដ្ឋចំនួន ២១គ្រួសារ ក្នុងចំណោម ៧១គ្រួសារ នៅភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ បានជ្រើសរើសជម្រើសថ្មី ដោយក្នុងនោះ ១១គ្រួសារស្ម័គ្រចិត្តចិញ្ចឹមមាន់ និង១០គ្រួសារចិញ្ចឹមកង្កែប។
លោក ទូច សុផានី ប្រធានគម្រោងអេកូទេសចរណ៍ និងអភិវឌ្ឃន៍សហគមន៍អង្គការសម្ព័ន្ធមិត្តសត្វព្រៃ WA បានឱ្យដឹងថា គម្រោងរេដបូកតំបន់ជួរភ្នំក្រវាញខាងត្បូងបានផ្តល់បច្ចេកទេសចិញ្ចឹមមាន់ ចិញ្ចឹមកង្កែប បច្ចេកទេសរៀបចំទ្រុងមាន់ និងអាងកង្កែប ដល់សមាជិកគម្រោងអភិវឌ្ឍន៍ជីវភាពសហគមន៍មូលដ្ឋាន ពិសេសនៅក្នុងភូមិឆាយលូក ឃុំអូរសោមចាប់តាំងពីចុងឆ្នាំ២០២២មក។
លោក ទូច សុផានី បានមានប្រសាសន៍ថា ៖
“ប្រជាពលរដ្ឋក្នុងសហគមន៍ស្ម័គ្រចិត្តក្នុងគម្រោងត្រូវបានបណ្តុះបណ្តាលឱ្យចិញ្ចឹមកូនមាន់ និងកូនកង្កែប ដោយមានការគំាទ្របច្ចេកទេសជាប្រចាំ ។ គម្រោងការពារ អភិរក្សធនធានធម្មជាតិដ៏ធំនេះបានជួយប្រជាពលរដ្ឋគ្រប់មធ្យោបាយ ទាំងដើមទុន និងបច្ចេកទេសដល់ប្រជាសហគមន៍ទាំងឡាយណា ដែលស្ម័គ្រចិត្តអនុវត្តគម្រោងចិញ្ចឹមមាន់ និងចិញ្ចឹមកង្កែប ឈប់ចូលព្រៃកាប់ឈើឬបរបាញ់សត្វព្រៃខុសច្បាប់។”
អ្នកស្រី សំបាន កូលាប ជាអ្នកភូមិម្នាក់បានអនុវត្តគម្រោងរេដបូក ដោយជ្រើសរើសយកការចិញ្ចឹមមាន់ក្រោមការជ្រោមជ្រែងបណ្ដុះបណ្ដាលបច្ចេកទេស ផ្ដល់ពូជមាន់ បច្ចេកទេសចិញ្ចឹម ពីអង្គការសម្ព័ន្ធមិត្តសត្វព្រៃ បានឱ្យដឹងថា អ្នកស្រីធ្វើបានជោគជ័យដូចការរំពឹងទុក។
អ្នកស្រីបានប្រាប់ថា ៖
“មុខរបរថ្មីដោយការចិញ្ចឹមមាន់ ការដាំដំណាំកសិកម្មនៅផ្ទះសម្បែង គឺជាមុខរបរល្អបំផុតសម្រាប់គ្រួសារខ្ញុំ ពីព្រោះថា ក្រៅពីអាចរកប្រាក់ចំណូលសម្រាប់គ្រួសារហើយ យើងមិនចាំបាច់ចេញទៅឆ្ងាយៗដើរស៊ីឈ្នួលគេផង។ ពេលនេះខ្ញុំបាននៅផ្ទះសម្បែង ថែរក្សាកូនចៅមិនព្រួយបារម្ភដូចមុនទៀតទេ។”
លោក ហ៊ុន សិលា និងភរិយា ដែលបានជ្រើសរើសការចិញ្ចឹមកង្កែបបាននិយាយថា មុននឹងចូលរួមក្នុងគម្រោងនេះ ខ្លួនបានធ្វើចំណាកស្រុកដើម្បីរកការងារធ្វើចិញ្ចឹមជីវីតដោយការដើរស៊ីឈ្នួលកាត់ស្មៅ ហើយប្រាក់ចំណូលដែលទទួលបានគឺចាយមិនគ្រប់គ្រាន់នោះទេ។ ក្រោយមកនៅចុងឆ្នាំ២០២២ លោកបានចាប់ផ្តើមចិញ្ចឹមកង្កែបដែលមានអ្នកជំនាញគម្រោងអភិវឌ្ឃន៍សហគមន៍អង្គការ WA មកជួយជ្រោមជ្រែង ដោយក្នុងនេះលោកអាចរកចំណូលពីការលក់កូនកង្កែប និងលក់កង្កែបធំ ជាមួយនឹងការទទួលបានថវិការសមរម្យជួយឱ្យសេដ្ឋកិច្ចគ្រួសារមានភាសពធូរស្រាលល្អប្រសើរជាងមុនឆ្ងាយណាស់។
បុរសវ័យ ២៩ឆ្នាំរូបនេះបានប្រាប់ថា ការចិញ្ចឹមកង្កែបត្រឹមរយៈពេល៣ខែគឺអាចចាប់លក់បានហើយ ដោយក្នុងនោះកង្កែបធំលក់បានក្នុងមួយគីឡូក្រាម ១៥ ០០០ ដល់ ២០ ០០០រៀល។
លោក ហ៊ុន សិលា បានបញ្ជាក់ថា ៖
“មួយថ្ងៃខ្ញុំអាចលក់កូនកង្កែប និងកង្កែបធំតិចបំផុត៣ម៉ឺនរៀល។ ឥឡូវនេះជាមួយនឹងការចិញ្ចឹមកង្កែប ខ្ញុំអាចរកប្រាក់ចំណូលបានសមរម្យ ដើម្បីផ្គត់ផ្គង់គ្រួសារ ជាពិសេសកូនៗរបស់ខ្ញុំ។”
សូមបញ្ជាក់ថា គម្រោងរេដបូកសំកុសបង្កើតឡើងក្នុងគោលបំណងជួយរាជរដ្ឋាភិបាលកម្ពុជាសម្រេចបាននូវគោលដៅសម្រាប់កំណើនសេដ្ឋកិច្ចសង្គមប្រកបដោយនិរន្តរភាព ដើម្បីជួយជំរុញឱ្យមានការកាត់បន្ថយ និងការបន្ស៊ាំទៅនឹងការប្រែប្រួលអាកាសធាតុ អភិរក្សជីវៈចម្រុះ និងបង្កើតឱ្យមានជម្រើសជីវភាពរស់នៅស្របតាមផែនការរបស់អង្គការសហប្រជាជាតិក្នុងការកាត់បន្ថយការបញ្ចេញឧស្ម័នផ្ទះកញ្ចក់ដែលបណ្តាលមកពីការបាត់បង់ និងរេចរិលព្រៃឈើ ដែលហៅកាត់ថា រេដបូក(REDD+)។
គម្រោងនេះគ្របដណ្ដប់ តំបន់ការពារធម្មជាតិចំនួន ៣ រួមមាន៖ ដែនជម្រកសត្វព្រៃភ្នំសំកុស ជាតំបន់ការពារទេសភាពនៅភាគពាយ័ព្យនៃប្រទេសកម្ពុជា ដែលគ្របដណ្ដប់លើផ្ទៃដីជាងជាង២០ម៉ឺនហិកតា, ច្រករបៀងអភិរក្សជីវៈចម្រុះជួរភ្នំក្រវាញដែលប្រព័ន្ធតំបន់ការពារធម្មជាតិ ក្នុងទំហំផ្ទៃដីជាង៨ម៉ឺនហិកតា និងតំបន់ភាគខាងជើងនៃឧទ្យានជាតិជួរភ្នំក្រវាញខាងត្បូងស្ថិត នៅក្នុងខេត្តពោធិ៍សាត់ ដែលមានផ្ទៃដីប្រមាណជាង១២,០០០ ហិកតា ៕
Account
Security
Favourite Content