សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី Investing បានរាយការណ៍ថា តម្លៃប្រេងបានបន្តឡើងថ្លៃបន្ទាប់ពីអ្នកនាំចេញកំពូលអារ៉ាប៊ីសាអូឌីត និងរុស្ស៊ីបានបញ្ជាក់ជាថ្មីពីការប្តេជ្ញាចិត្តរបស់ពួកគេក្នុងការកាត់បន្ថយការផ្គត់ផ្គង់ប្រេងដោយស្ម័គ្រចិត្តរហូតដល់ដំណាច់ឆ្នាំ ខណៈដែលពិភពលោកកំពុងប្រឈមមុខនឹងសង្រ្គាមអ៊ីស្រាអែល-ក្រុមហាម៉ាស។ ទន្ទឹមនឹងនេះ តម្លៃប្រេងឆៅ Brent បានឡើងថ្លៃ ០,៣៤ ភាគរយ ឬ ៨៥,១៨ ដុល្លារក្នុងមួយបារ៉ែល ខណៈដែលតម្លៃប្រេងឆៅ West Texas Intermediate (WTI) បានឡើងថ្លៃ ០,៤ ភាគរយ ឬ ៨០,៨២ ដុល្លារក្នុងមួយបារ៉ែល។
កាលពីថ្ងៃអាទិត្យកន្លងទៅនេះ អារ៉ាប៊ីសាអូឌីតបានបញ្ជាក់ថា ខ្លួននៅបន្តស្ម័គ្រចិត្តកាត់បន្ថយប្រេងចំនួន ១ លានបារ៉ែលក្នុងមួយថ្ងៃរហូតដល់ចុងខែធ្នូ ដោយរក្សាទិន្នផលប្រហែលត្រឹមតែ ៩ លានបារ៉ែលក្នុងមួយថ្ងៃដូចពេលបច្ចុប្បន្ន។ លើសពីនេះ រុស្ស៊ីក៏បានប្រកាសថាខ្លួននឹងបន្តស្ម័គ្រចិត្តកាត់បន្ថយប្រេងបន្ថែមចំនួន ៣ សែនបារ៉ែលក្នុងមួយថ្ងៃរហូតដល់ចុងខែធ្នូផងដែរ។ សេចក្តីប្រកាសនេះបង្ហាញថា អារ៉ាប៊ីសាអូឌីតមានបំណងរឹតបន្តឹងទីផ្សារ និងបង្កើនតម្លៃប្រេង។
យ៉ាងណាក៏ដោយ លោក Giovanni អ្នកយុទ្ធសាស្រ្ត UBS បាននិយាយថា ការកាត់បន្ថយផលិតកម្មប្រេងនេះអាចត្រូវបានពន្យារពេលដល់ត្រីមាសទីមួយនៃឆ្នាំ ២០២៤ ដោយសារតែតម្រូវការប្រេងអាចធ្លាក់ចុះនៅដើមឆ្នាំ២០២៤។
សូមរំលឹកដែរថា កាលពីថ្ងៃចន្ទកន្លងទៅនេះ បណ្តាមេដឹកនាំទីភ្នាក់ងារអង្គការសហប្រជាជាតិបានទាមទារបទឈប់បាញ់នៅហ្គាហ្សា ខណៈដែលអាជ្ញាធរសុខាភិបាលក្នុងតំបន់បាននិយាយថា ចំនួនអ្នកស្លាប់ដោយសារការវាយប្រហារពីអ៊ីស្រាអែលលើសពី ១ សែននាក់ហើយ។ យ៉ាងណាមិញ ភាពទន់ខ្សោយនៃប្រាក់ដុល្លារក៏បានជួយដល់តម្លៃប្រេងផងដែរ ដោយសារវាជំរុញកំណើនតម្រូវការពីអ្នកទិញរូបិយប័ណ្ណបរទេស។ ទោះជាយ៉ាងណាក្តី ការបន្ធូរបន្ថយនៃការដឹកជញ្ជូនរបស់រោងចក្រចម្រាញ់ប្រេងរបស់ចិន និងសហរដ្ឋអាមេរិកបានធ្វើឱ្យប៉ះពាល់ដល់តម្លៃ។
មិនត្រឹមតែប៉ុណ្ណោះ ដោយសារតែការធ្លាក់ចុះនៃប្រាក់ចំនេញ និងកង្វះកូតានាំចេញរហូតដល់ដំណាច់ឆ្នាំនេះ ដំណើរការរោងចក្រចម្រាញ់ប្រេងរបស់ចិនបានធ្លាក់ចុះពីកម្រិតកំណត់ត្រានៅក្នុងត្រីមាសទីបី។ ទន្ទឹមនឹងនេះដែរ រោងចក្រចម្រាញ់ប្រេងឆៅរបស់សហរដ្ឋអាមេរិកក៏ធ្លាក់ចុះផងដែរនៅត្រីមាសនេះដោយសារប្រេងសាំងមានកម្រិតខ្សោយ៕
Account
Security
Favourite Content