បរទេស៖ តម្លៃមាស​កំពុង​បន្តឡើងថ្លៃក្នុងកម្រិតខ្ពស់ជាប្រវត្តិសាស្ត្ររហូតដល់ទៅជាង ៥០០០ ដុល្លារក្នុងតម្លឹងនៅថ្ងៃអង្គារសប្តាហ៍នេះ​ ដោយសារតម្រូវការមាសកើនឡើងខ្ពស់ចំពេលដែលសេដ្ឋកិច្ចពិភពលោកមានភាពស្រពិចស្រពិល។

នៅលើទីផ្សារកម្ពុជា មាសមានតម្លៃក្នុងរង្វង់ ៥០៥០ដុល្លារក្នុងមួយតម្លឹង និងប្រមាណ ៥០៥ ដុល្លារក្នុងមួយជី។ តម្លៃមាសនៅឆ្នាំ២០២៥ បានឡើងថ្លៃលើសពីរយៈពេលដែលមានភាពច្របូកច្របល់មុនៗដូចជា ហេតុការណ៍នៃការវាយប្រហារភេរវកម្មថ្ងៃទី ១១ ខែកញ្ញា ឆ្នាំ២០០១ , វិបត្តិហិរញ្ញវត្ថុឆ្នាំ២០០៨, ការរាតត្បាតជំងឺកូវីដ-១៩ ខណៈរហូតមកដល់ពេលនេះ តម្លៃមាសកើនឡើងដល់ទៅ​ ៥៤% បើគិតចាប់តាំងពីឆ្នាំ១៩៧៩ ជាកំឡុងពេលដែលសហរដ្ឋអាម៉េរិកកំពុងប្រឈមមុខនឹងអតិផរណាកម្រិតធ្ងន់ធ្ងរ និងវិបត្តិថាមពល។

បច្ចុប្បន្ននេះ មិនមែនមានតែមាសទេកំពុងឡើងថ្លៃ ប៉ុន្តែ​ទីផ្សារ​ភាគហ៊ុន​ក៏កំពុងមានភាពវឹកវរឡើងចុះដូចគ្នាផងដែរ។ វិនិយោគិនភាគច្រើនបានប្រមូលផ្តុំគ្នាលេងភាគហ៊ុនរបស់ក្រុមហ៊ុនបចេ្ចកវិទ្យាធំៗ ដោយសារពួកគេកំពុងកាន់កាប់ទីផ្សារភាគហ៊ុនទាំងមូល។ យ៉ាងណាមិញ ទីផ្សារភាគហ៊ុន និងមាសកំពុងដើរឆ្ពោះទៅរកទិសដៅផ្សេងគ្នា។ ការកើនឡើងនៃតម្រូវការមាសជាសកលកំពុងឆ្លុះបញ្ចាំងពីភាពមិនច្បាស់លាស់នៃសេដ្ឋកិច្ចអាម៉េរិក និងការព្រួយបារម្ភអំពីការជាប់គាំងនៃអតិផរណារបស់មហាអំណាចសេដ្ឋកិច្ចមួយនេះ។ មិនត្រឹមតែប៉ុណ្ណោះ សហរដ្ឋ​អាម៉េរិក​បាន​ដំឡើង​ពន្ធ​ដល់​កម្រិត​ខ្ពស់​បំផុត​ចាប់​តាំង​ពី​វិបត្តិ​សេដ្ឋកិច្ច ឬ Great Depression កើតមាន។ នៅក្នុងខែតុលានេះ តម្លៃមាសបានកើនឡើង ៥% បន្ទាប់ពីរដ្ឋាភិបាលអាម៉េរិកបានប្រកាសពីការបិទប្រតិបត្តិការ និងផ្អាកចេញផ្សាយទិន្នន័យសេដ្ឋកិច្ចមួយចំនួន ដែលធ្វើឱ្យអ្នកវិនិយោគ និងមន្ត្រីរបស់ Fed មានភាពស្រពិចស្រពិលអំពីស្ថានភាពសេដ្ឋកិច្ច។

ជាលទ្ធផល វិនិយោគិនភាគច្រើនកំពុងសម្រុកទៅរកមាសដែលជាទ្រព្យសកម្មមានសុវត្ថិភាព និងអាចជៀសពីការចងជាប់ជាមួយនឹងសេដ្ឋកិច្ចអាម៉េរិក។ លើសពីនេះ ការចុះខ្សោយនៃតម្លៃប្រាក់ដុល្លារអាម៉េរិកក៏ជាកត្តាដែលធ្វើឲ្យមាសឡើងថ្លៃផងដែរ និងធ្វើឲ្យអ្នកវិនិយោគបាត់បង់ទំនុកចិត្តលើប្រាក់ដុល្លារដែលធ្លាប់ជាទ្រព្យសម្បត្តិមានសុវត្ថិភាព។ មិនត្រឹមតែប៉ុណ្ណោះ ធនាគារ​កណ្តាល​នៅតាមបណ្តាប្រទេសនានាជុំវិញ​ពិភពលោក​ក៏​កំពុង​សម្រុកទិញ​​មាសទុកជាទុនបម្រុងផង​ដែរ បន្ទាបពីទីក្រុងវ៉ាស៊ីនតោន និងសម្ព័ន្ធមិត្តដាក់ទណ្ឌកម្មលើរុស្ស៊ីដោយបង្កកទ្រព្យសម្បត្តិរបស់ទីក្រុងមូស្គូដែលទុកនៅក្នុងអាម៉េរិក។ ទណ្ឌកម្ម​ទាំង​នេះបាន​ធ្វើឲ្យប្រទេសផ្សេងទៀតព្រួយបារម្ភពីទ្រព្យសម្បត្តិរបស់ពួកគេដែលទុកនៅបរទេស រហូតធ្វើឲ្យពួកគេសម្រេចបង្កើនការទិញមាសទុកវិញ។

យោងតាមក្រុមហ៊ុន Goldman Sachs បានព្យាករណ៍ថា តម្លៃមាសទំនងជាឡើងថ្លៃដល់ ៤ ៩០០ ដុល្លារក្នុងមួយអោននៅចុងឆ្នាំ២០២៦។ ស្រដៀងគ្នានេះដែរ មហាសេដ្ឋី Ken Griffin បានលើកឡើងថា វិនិយោគគិនពិតជាមានការព្រួយបារម្ភអំពីសេដ្ឋកិច្ចអាម៉េរិក ដែលធ្វើឲ្យពួកគេបង្កើនការចាប់អារម្មណទៅលើមាស ដែលជាទ្រព្យសម្បត្តិមានសុវត្ថិភាពជាងប្រាក់ដុល្លារអាម៉េរិក។ បន្ថែមពីនេះ ពួកគេកំពុងស្វែងរកមធ្យោបាយនានាដើម្បីកាត់បន្ថយប្រាក់ដុល្លារឱ្យមានប្រសិទ្ធភាព និងកំពុងសម្លឹងទ្រព្យសកម្មផ្សេងទៀតដែលមិនពាក់ព័ន្ធនឹងប្រាក់ដុល្លារ៕