សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ កំពុងគិតគូរជាយុទ្ធសាស្ត្រសម្រាប់ជំរុញសក្តានុពលនៃការដឹកជញ្ជូនតាមផ្លូវទឹកដោយរៀបចំទីតាំងផែ និងផែរណបនៅតាមបណ្តាខេត្តដែលស្ថិតនៅតាមបណ្តោយដងទន្លេមេគង្គ និងទន្លេសាប ជាប្រយោជន៍សម្រាប់ដឹកជញ្ជូនភ្ញៀវទេសចរ និងសម្ភារៈទំនិញផ្សេងៗសម្រាប់នាំចេញក្នុងតំបន់ឱ្យបានកាន់តែងាយស្រួល ឆាប់រហ័ស និងការធ្វើដំណើរទេសចរណ៍មានភាពរស់រវើក សម្បូរបែបនិងជំរុញកំណើនសេដ្ឋកិច្ចជាតិផងដែរ ។
ថ្លែងក្នុងកិច្ចប្រជុំពិភាក្សាការងារជាមួយក្រុមហ៊ុនទូកទេសចរណ៍តាមបណ្ដោយទន្លេមេគង្គ ដែលបានធ្វើឡើងនៅទីស្ដីការក្រសួងនាព្រឹកថ្ងៃទី១៤ ខែតុលា ឆ្នាំ២០២៥ ឯកឧត្តមឧបនាយករដ្ឋមន្ត្រី សាយ សំអាល់ បានឱ្យដឹងថា ការជួបជុំគ្នានាពេលនេះគឺដើម្បីជជែកពិភាក្សាប្រមូលធាតុចូលបន្ថែមទៀតទាក់ទិននឹងកិច្ចការដឹកជញ្ជូនភ្ញៀវទេសចរណ៍ ឬសម្ភារៈទំនិញផ្សេងៗតាមរយៈក្រុមហ៊ុនទូកទេសចរណ៍នៅតាមបណ្ដោយដងទន្លេមេគង្គ និងទន្លេសាប ។
ឯកឧត្តមឧបនាយករដ្ឋមន្រ្តី យល់ឃើញថា ទាក់ទិននឹងកិច្ចការនេះ នៅតាមបណ្ដាខេត្តដែលស្ថិតតាមបណ្ដោយដងទន្លេមេគង្គ និងទន្លេសាប គួរតែមានផែទេសចរណ៍ ឬផែរណបសម្រាប់ទូកទេសចរណ៍ដឹកជញ្ជូនភ្ញៀវទេសចរ និងទំនិញសម្ភារៈផ្សេងៗឱ្យបានត្រឹមត្រូវ ដោយកិច្ចការនេះត្រូវពឹងផ្អែកលើការរៀបចំគិតគូរតំបន់នេះឱ្យបានច្បាស់លាស់ក្នុងគោលដៅជំរុញឱ្យតំបន់នេះក្លាយជារបៀងសេដ្ឋកិច្ច និងជាដង្ហើមសេដ្ឋកិច្ចរបស់កម្ពុជា ។
ឯកឧត្តមឧបនាយករដ្ឋមន្ត្រី សាយ សំអាល់ ក៏បានបង្ហាញពីគោលបំណងក្នុងការសម្រួលដល់ការដឹកជញ្ជូន ឬធ្វើដំណើរតាមផ្លូវទឹកដោយធ្វើយ៉ាងណាឱ្យគ្រប់ទីកន្លែងក្នុងប្រទេសកម្ពុជា អាចធ្វើដំណើរ ឬដឹកជញ្ជូនភ្ញៀវទេសចរ និងសម្ភារៈទំនិញផ្សេងៗក្នុងរយៈពេលខ្លីដែលនាំឱ្យកម្ពុជាមានចរន្តសេដ្ឋកិច្ចរស់រវើក ៕
Account
Security
Favourite Content