សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ក្នុងគ្រាដែលភាពតានតឹងផ្នែកពាណិជ្ជកម្មរវាងអាមេរិក និងចិននៅតែបន្តនៅឡើយនោះ ក្រុមហ៊ុនអ្នកផលិតរថយន្តអគ្គិសនី Tesla បានសម្រេចចិត្តកាត់បន្ថយការលក់រថយន្តអគ្គិសនីរបស់ខ្លួនមួយភាគធំចូលទៅក្នុងទីផ្សារចិនដែលជាប្រភពចំណូលដ៏សំខាន់មួយរបស់ខ្លួន។
របាយការណ៍ដែលត្រូវបានធ្វើឡើងដោយ PCMag និងត្រូវបានដកស្រង់យកមកចេញផ្សាយដោយកាសែត South China Morning Post បានអះអាងថា ក្រុមហ៊ុន Telsa បានបង្ខំចិត្តក្នុងការបិទលក់ទាំងស្រុងនូវរថយន្តម៉ូដេល Model S និង Model X នៅក្នុងទីផ្សារប្រទេសចិន ហើយជាលទ្ធផលភ្លាមៗ អ្នកបញ្ជាទិញជនជាតិចិនគឺមិនអាចស្នើសុំទិញម៉ូដេលទាំងពីរនេះទៀតឡើយ។
យ៉ាងណាក៏ដោយ ទោះបីជា Tesla មិនទាន់បានចេញមកអះអាងអំពីមូលហេតុនៃការសម្រេចចិត្តនេះក្តី ប៉ុន្តែគេមើលឃើញថា វាធ្វើឡើងចំពេលដែលសង្គ្រាមពាណិជ្ជកម្មយ៉ាងតានតឹងតាមរយៈការតម្លើងពន្ធគយ១២៥ភាគរយទៅលើទំនិញអាមេរិក និង១៤៥ភាគរយទៅលើទំនិញរបស់ចិន។
យ៉ាងណាក្តី សម្រាប់ម៉ូដេល Model 3 និង Model Y ដែលផលិតចេញពីរោងចក្រធំរបស់ Tesla នៅក្នុងទីក្រុងសៀងហៃ នៅតែអាចទទួលការបញ្ជាទិញជាធម្មតានៅឡើយ ខណៈដែលអតិថិជនជាជនជាតិចិនមួយចំនួននៅតែចូលចិត្ត Tesla នឹងហ៊ានចំណាយលុយច្រើនជាងមុនសម្រាប់ម៉ូដេល Telsa ទាំងនោះ។
ប្រធានផ្នែកលក់នៃក្រុមហ៊ុនរថយន្ត Wan Zhuo Auto នៅក្នុងទីក្រុងសៀងហៃ លោក Zhao Zhen បានលើកឡើងបែបនេះថា៖ គ្មានជនជាតិចិនណានឹងទទួលយកតម្លៃថ្មីរបស់ Telsa ដែលមានទំហំដល់ទៅទ្វេដងទាំងនោះទេ។ មិនត្រឹមតែប៉ុណ្ណោះ រថយន្តម៉ូដេលទំនើបទាំងនោះគឺមិនមែនជាម៉ូដពេញនិយមនៅក្នុងទីផ្សារចិនទៀតនោះទេ។
គួរឲ្យដឹងដែរថា ក្រុមហ៊ុន Tesla មុនការសម្រេចចិត្តនេះគឺបានខិតខំព្យាយាមយ៉ាងខ្លាំងរួចទៅហើយដើម្បីដោះស្រាយបញ្ហាធ្លាក់ចុះនៃប្រតិបត្តិការលក់ ប៉ុន្តែជាលទ្ធផល នៅត្រឹមត្រីមាសដំបូងឆ្នាំនេះ តួលេខលក់បានធ្លាក់ចុះដល់ទៅ១៣ភាគរយរួចទៅហើយ។ មិនត្រឹមតែប៉ុណ្ណោះ Tesla បានព្យាករណ៍ថា ការធ្លាក់ចុះនៃប្រតិបត្តិការលក់នឹងបន្តទៅដល់ ៧១ភាគរយនៅក្នុងឆ្នាំ២០២៥នេះ៕
Account
Security
Favourite Content