សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមរបាយការណ៍ពីក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃបានឲ្យដឹងថា សម្រាប់រយៈពេលពេញមួយឆ្នាំ២០២៤ សេដ្ឋកិច្ចថៃបានកើនឡើង ២,៥ ភាគរយធៀបនឹង ១,៩ ភាគរយក្នុងឆ្នាំ២០២៣។ យ៉ាងណាមិញ តួរលេខនេះទាបជាងការប៉ាន់ប្រមាណជាមធ្យម ២,៧ ភាគរយ ខណៈដែលផលិតផលក្នុងស្រុកសរុប (GDP) របស់ថៃក្នុងរយៈពេល ៣ខែគិតត្រឹមខែធ្នូឆ្នាំ២០២៤ កើនឡើង ៣,២ ភាគរយ បើធៀបនឹងឆ្នាំមុន ប៉ុន្តែអត្រានេះគឺទាបជាងការប៉ាន់ស្មានជាមធ្យម ៣,៨ ភាគរយ។ ទោះជាយ៉ាងណា ការងើបឡើងនៃកំណើនសេដ្ឋកិច្ចនេះជំរុញដោយវិស័យទេសចរណ៍ និងការនាំចេញ។
យ៉ាងណាក៏ដោយ គោលនយោបាយពន្ធគយរបស់ប្រធានាធិបតីសហរដ្ឋអាម៉េរិក Donald Trump និងការប្រជែងគ្នារវាងសហរដ្ឋអាមេរិក និងចិន បានធ្វើឲ្យប្រទេសថៃប្រឈមនឹងភាពងាយរងគ្រោះដោយសារអតិរេកពាណិជ្ជកម្មខ្ពស់ជាមួយសហរដ្ឋអាម៉េរិក ខណៈដែលកំណើនផលិតផលចិនដែលមានតំលៃថោកកំពុងកើនឡើង។ បញ្ហានេះអាចនឹងកាន់តែអាក្រក់ ប្រសិនបើទីក្រុងវ៉ាស៊ីនតោនគំរាមទីក្រុងប៉េកាំងជាមួយនឹងការយកពន្ធបន្ថែមទៀត។ ទន្ទឹមនឹងនេះ សេដ្ឋវិទូព្រមានថា រដ្ឋាភិបាលថៃត្រូវជំរុញសេដ្ឋកិច្ចបន្ថែមបន្ទាប់ពីកំណើនបានចេញលទ្ធផលទាបជាងការព្យាករណ៍។
លោក Danucha Pichayanan អគ្គលេខាធិការនៃក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ បានលើកឡើងថា សេដ្ឋកិច្ចថៃនៅតែរក្សាបានស្ថិរភាពល្អ ហើយត្រូវបានរំពឹងថានឹងត្រូវបានគាំទ្របន្ថែមទៀតដោយសារការកើនឡើងនៃការនាំចេញ និងការចំណាយវិនិយោគរបស់រដ្ឋាភិបាល។ យ៉ាងណាមិញ លោកបានព្រមានអំពីហានិភ័យនៃគោលនយោបាយពន្ធគយរបស់ប្រធានាធិបតីអាម៉េរិក ដោយរដ្ឋាភិបាលត្រូវតែតាមដានយ៉ាងដិតដល់នូវគោលនយោបាយនេះ ហើយព្យាយាមស្វែងរកមធ្យោបាយដើម្បីចរចាយ៉ាងសកម្មជាមួយទីក្រុងវ៉ាស៊ីនតោន ដើម្បីការពារការនាំចេញរបស់ថៃពីផលប៉ះពាល់នៃពន្ធគយរបស់សហរដ្ឋអាម៉េរិក។ លើសពីនេះ រដ្ឋាភិបាលចាំបាច់ត្រូវជំរុញការចំណាយបន្ថែមទៀតនៅក្នុងសេដ្ឋកិច្ច ដើម្បីរក្សាសន្ទុះនៃកំណើននៅឆ្នាំ២០២៥ ជាពិសេសវិធានការជំរុញការលក់រថយន្តដែលបានធ្លាក់ចុះកាលពីឆ្នាំមុន បណ្ដាលឲ្យមានការបញ្ឈប់ការងារ និងធ្លាក់ចុះការប្រើប្រាស់។
លោក Amonthep Chawla ប្រធានផ្នែកស្រាវជ្រាវនៅធនាគារ CIMB Thai បានលើកឡើងស្រដៀងគ្នានេះដែរថា ដើម្បីជំរុញសេដ្ឋកិច្ច រដ្ឋាភិបាលចាំបាច់ត្រូវបង្កើនការចំណាយរបស់ខ្លួន ដោយគួរតែធ្វើអ្វីមួយដើម្បីជួយកាត់បន្ថយបំណុលគ្រួសារ និងរក្សាអត្រាអតិផរណា។
លោក Therdsak Thaveeteeratham អ្នកវិភាគជាន់ខ្ពស់នៅ Asia Plus Securities លើកឡើងថា ទោះបីជាសេដ្ឋកិច្ចបានកើនឡើងពិតមែន ប៉ុន្តែនៅតែទាបជាងការព្យាករណ៍ ដោយសារការប្រើប្រាស់នៅតែខ្សោយ។ ការប្រើប្រាស់ឯកជនដែលស្មើនឹងជិតពាក់កណ្តាលនៃ GDP សរុបរបស់ប្រទេសមានអត្រា ៤,៤ ភាគរយប៉ុណ្ណោះក្នុងឆ្នាំ២០២៤ ដែលធ្លាក់ចុះពី ៦,៩ ភាគរយនៅក្នុងឆ្នាំ ២០២៣។ មិនត្រឹមតែប៉ុណ្ណោះ កំណើនសេដ្ឋកិច្ចត្រូវប៉ះពាល់ដោយសារការចុះខ្សោយនៃការលក់យានយន្ត និងអចលនទ្រព្យដខ្សោយ នេះមានន័យថា អំណាចទិញចុះខ្សោយ។
គួរឲ្យបញ្ជាក់ដែរថា វិស័យទេសចរណ៍មានចំណែកប្រហែល ១៨ ភាគរយនៃផលិតផលក្នុងស្រុកសរុប(GDP) របស់ប្រទេសថៃ ខណៈដែលការនាំចេញមានចំណែកច្រើនជាង ៦០ ភាគរយនៃសេដ្ឋកិច្ច។ ក្នុងឆ្នាំ ២០២៤ ប្រទេសថៃបានស្វាគមន៍ភ្ញៀវទេសចរណ៍បរទេសចំនួន ៣៥ លាននាក់ ដែលទាបជាងបន្តិចពីកំណត់ត្រាចំនួន ៣៩ លាននាក់ក្នុងឆ្នាំ២០១៩ មុនមានការរាតត្បាត។
យោងតាមក្រសួងពាណិជ្ជកម្មបានឱ្យដឹងថា ការនាំចេញឈានដល់ ៣០០,៥ ពាន់លានដុល្លារក្នុងឆ្នាំ ២០២៤ ដែលកើនឡើង ៥,៤ ភាគរយធៀបនឹងឆ្នាំ ២០២៣។ ទន្ទឹមនឹងនេះ ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិរបស់ថៃ បានព្យាករណ៍ថា សេដ្ឋកិច្ចថៃនឹងកើនឡើងក្នុងចន្លោះពី ២,៣ ភាគរយទៅ ៣,៣ ភាគរយនៅក្នុងឆ្នាំ ២០២៥ ដោយសាររំពឹងលើការកើនឡើងនៃការវិនិយោគឯកជន។ ក្រុមហ៊ុនបរទេសជាច្រើនដែលបានទទួលការអនុម័តពីក្រុមប្រឹក្សាវិនិយោគថៃអាចនឹងចាប់ផ្តើមគម្រោងរបស់ពួកគេនៅឆ្នាំនេះ។ ក្នុងឆ្នាំ ២០២៤ ការវិនិយោគបរទេសបានកើនឡើង ៣៣,៥ ពាន់លានដុល្លារ ដែលជាកម្រិតខ្ពស់ក្នុងរយៈពេល ១០ ឆ្នាំ៕
Account
Security
Favourite Content