បរទេស ៖ ប្រធានាធិបតីអាម៉េរិក លោក Donald Trump បានគំរាមដំឡើងពន្ធ ២៥% លើការនាំចូលពីកូរ៉េខាងត្បូង ដោយសារមិនបានអនុវត្តតាមកិច្ចព្រមព្រៀងពាណិជ្ជកម្មជាមួយនឹងទីក្រុងវ៉ាស៊ីនតោន នេះបើយោងតាមសេចក្ដីរាយការណ៍ពី CNA។

លោក Trump បានសរសេរនៅលើ Truth Social ថា សភាកូរ៉េខាងត្បូងមិនបានអនុវត្តតាមកិច្ចព្រមព្រៀងរបស់ពួកគេជាមួយសហរដ្ឋអាម៉េរិកនោះទេ ដែលជាហេតុធ្វើឲ្យលោកមានបំណងដំឡើងពន្ធលើទំនិញមួយចំនួន រួមមានដូចជា យានយន្ត ឈើ ឱសថ ជាដើម ដោយដំឡើងពីអត្រា ១៥% ទៅ​ ២៥%។ យ៉ាងណាក៏ដោយ គេមិនទាន់ច្បាស់ថា ការដំឡើងពន្ធនេះនឹងចូលជាធរមានពេលណានោះទេ។ ទន្ទឹមនឹងនេះ អ្នកសេដ្ឋកិច្ចតែងតែលើកឡើងពីក្ដីព្រួយបារម្ភអំពីវិធីសាស្រ្តនៃការប្រើប្រាស់ពន្ធគយរបស់លោក Trump ក្នុងគោលនយោបាយការបរទេសដែលធ្វើឲ្យប៉ះពាល់ដល់ទំនាក់ទំនងការទូតជាមួយប្រទេសជាដៃគូ និងប្រឈមមុខជាមួយតុលាការកំពូលអាម៉េរិកផងដែរ។

នៅក្នុងកិច្ចព្រមព្រៀងទ្ចេភាគីដែលសម្រេចបានកាលពីឆ្នាំ២០២៥ ទីក្រុងវ៉ាស៊ីនតោន យល់ព្រមកាត់បន្ថយពន្ធលើការនាំចូលរថយន្ត និងគ្រឿងបន្លាស់រថយន្តពីកូរ៉េខាងត្បូងក្នុងអត្រា ១៥% បន្ទាបពីអត្រាដំបូង ២៥%។ ជាថ្នូរមកវិញ កូរ៉េខាងត្បូងនឹងវិនិយោគ ៣៥០ ពាន់លានដុល្លារអាម៉េរិកទៅក្នុងនៅអាម៉េរិក ដោយទីក្រុងសេអ៊ូលនឹងបង់ប្រាក់ដំបូងចំនួន ២០០ ពាន់លានដុល្លារ។

សូមរំលឹកថា កាលពីដើម​ខែមករា​ ឆ្នាំ២០២៦នេះ រដ្ឋមន្ត្រី​ក្រសួង​ហិរញ្ញវត្ថុកូរ៉េខាងត្បូង បាន​លើកឡើង​ថា ការវិនិយោគ​ដែល​បាន​គ្រោងទុក​ចំនួន ៣៥០ ពាន់​លាន​ដុល្លារ​ក្នុងវិស័យ​យុទ្ធសាស្ត្រ​របស់​អាម៉េរិក​ក្រោម​កិច្ចព្រមព្រៀង​ពាណិជ្ជកម្ម​នេះ​ទំនង​ជា​មិន​ចាប់ផ្តើម​នៅ​ក្នុងឆមាស​ទី​១​នៃ​ឆ្នាំនេះទេ ក្រោមហេតុផល​រូបិយប័ណ្ណ​វ៉ុន​កំពុងចុះខ្សោយ។ ​លំហូរ​ចេញនៃ​រូបិយប័ណ្ណ​ក្នុងបរិមាណដ៏ច្រើន​បាន​បង្ក​ឲ្យ​មាន​ផលលំបាក​ដល់​អាជ្ញាធរ​នៅ​ទីក្រុង​សេអ៊ូល ដែលធ្វើឲ្យប្រាក់​វ៉ុន​​ធ្លាក់ចុះ​ដល់​កម្រិត​ទាប​មិន​ធ្លាប់​មាន (គិត​ចាប់តាំងពី​វិបត្តិ​ហិរញ្ញវត្ថុ​ពិភពលោកពី​ឆ្នាំ២០០៧ ដល់​ឆ្នាំ២០០៩)។

លោក Josh Lipsky ប្រធានសេដ្ឋកិច្ចអន្តរជាតិនៅក្រុមប្រឹក្សាអាត្លង់ទិក បាននិយាយថា សកម្មភាពរបស់លោក Trump លើកូរ៉េខាងត្បូងបានឆ្លុះបញ្ចាំងពីការមិនអត់ធ្មត់ចំពោះល្បឿននៃការអនុម័តកិច្ចព្រមព្រៀងពាណិជ្ជកម្មក្របខ័ណ្ឌរបស់ទីក្រុងសេអ៊ូល។ ជារឿយៗ ប្រធានាធិបតីអាម៉េរិករូបនេះតែងតែគំរាម​​ដំឡើង​ពន្ធ​បន្ថែមទៀតលើប្រទេសមួយចំនួនក្នុង​ករណីដែលពួកគេពន្យារពេល ឬមិន​បាន​អនុវត្ត​តាមកិច្ចព្រមព្រៀងពាណិជ្ជកម្ម។

កាលពីថ្ងៃអង្គារ៍ សប្ដាហ៍នេះ វិមានប្រធានាធិបតីកូរ៉េខាងត្បូង បានបញ្ជាក់់ថា រដ្ឋមន្ត្រីឧស្សាហកម្ម លោក Kim Jung-kwan នឹងទៅបំពេញទស្សនកិច្ចនៅអាម៉េរិកក្នុងពេលឆាប់ៗនេះ ដើម្បីជួបជាមួយរដ្ឋមន្ត្រីពាណិជ្ជកម្ម លោក Howard Lutnick។ ​ទីប្រឹក្សា​ប្រធានាធិបតី​កូរ៉េខាងត្បូង​នឹង​ធ្វើ​កិច្ចប្រជុំ​ជាមួយ​ក្រសួង​ពាក់ព័ន្ធរបស់អាម៉េរិក​ដើម្បី​ពិភាក្សា​អំពី​វិធានការ​នានា។ យ៉ាងណាមិញ ការិយាល័យ​តំណាង​ពាណិជ្ជកម្ម​អាម៉េរិក​មិន​បាន​ឆ្លើយតប​ចំពោះ​សំណើសុំ​របស់ភាគីកូរ៉េខាងត្បូងនោះ​ទេ៕