សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Aljazeera បានរាយការណ័៍ថា អាម៉េរិក បានផ្អាកការលើកលែងពន្ធលើកញ្ចប់ទំនិញតូចៗ ឬ de minimis ដែលមានតម្លៃ ៨០០ ដុល្លារ ឬតិចជាងនេះ ក្នុងគោលបំណងបិទចន្លោះប្រហោងដែលអនុញ្ញាតឱ្យកញ្ចប់ទំនិញចូលក្នុងប្រទេសដោយគ្មានជាប់ពន្ធគយ។
ការផ្អាកលើកលែងពន្ធនេះបានចូលជាធរមាននៅថ្ងៃសុក្រសប្ដាហ៍នេះ បន្ទាប់ពីកញ្ចប់ទំនិញទាំងនោះត្រូវបានលើកលែងពន្ធអស់រយៈពេល ៦ខែ។ ទន្ទឹមនឹងនេះ ប្រទេសជាង ៣០ រួមទាំងអូស្ត្រាលី អាល្លឺម៉ង់ ជប៉ុន និងម៉ិចស៊ិក បានផ្អាកការដឹកជញ្ជូនកញ្ចប់ទំនិញមួយចំនួនទៅកាន់អាម៉េរិក ដើម្បីចៀសវាងជាប់ពន្ធថ្លៃ។ ជាមួយគ្នានេះ សហជីពប្រៃសណីយ៍ជុំវិញពិភពលោកបានលើកឡើងថា ពួកគេត្រូវការភាពច្បាស់លាស់បន្ថែមទៀតអំពីការគណនាពន្ធមុនពេលដឹកជញ្ជូនកញ្ចប់ទំនិញទៅកាន់អាម៉េរិក។ ជាក់ស្ដែង ក្រុមហ៊ុនដឹកជញ្ជូន DHL បានលើកឡើងថា ខ្លួននឹងមិនដឹកជញ្ជូនកញ្ចប់ទំនិញទៅកាន់អាម៉េរិកនោះទេ រហូតដល់មានដោះស្រាយទាក់ទងនឹងរបៀបប្រមូលពន្ធ ជាមួយនឹងរបៀបដែលទិន្នន័យត្រូវបានបញ្ជូនទៅគយ និងការការពារព្រំដែនអាម៉េរិក។
កាលពីថ្ងៃទី ៣០ ខែកក្កដា សេតវិមានបានចេញផ្សាយថា អត្រាពន្ធលើកញ្ចប់តូចៗនឹងត្រូវបានគណនាតាមវិធីមួយក្នុងចំណោមជម្រើសពីរ។ ជម្រើសទី១ គឺការកំណត់តម្លៃចន្លោះពី ៨០ ដុល្លារទៅ ២០០ ដុល្លារក្នុងមួយមុខទំនិញ ដោយអាស្រ័យលើប្រទេសដើមនៃកញ្ចប់ទំនិញនោះ។ អ្នកលក់ចាំបាច់ត្រូវរៀបចំឯកសារ ដោយសារគយអាម៉េរិកនឹងទាមទារព័ត៌មានអំពីប្រភពដើម និងប្រភេទទំនិញនៅក្នុងកញ្ចប់។ជម្រើសទី២ គឺផ្អែកលើតម្លៃអត្រាពន្ធដាក់ឲ្យមានភាពស្មើគ្នា ដែលកំណត់ដោយសេតវិមានសម្រាប់ប្រទេសនីមួយៗ។ ឧទាហរណ៍៖ ប្រសិនបើប្រទេសនោះកំណត់ពន្ធ ១០% លើការនាំចូលពីអាម៉េរិក នោះកញ្ចប់ទំនិញពីប្រទេសនោះនឹងជាប់ពន្ធ ១០% ពេលចូលទៅអាម៉េរិកដូចគ្នា។
រដ្ឋបាល Trump បានលើកឡើងថា ពន្ធគយ គឺមានភាពចាំបាច់សម្រាប់កាត់បន្ថយឱនភាពពាណិជ្ជកម្មរបស់អាម៉េរិក ខណៈពេលដែលការខំប្រឹងបញ្ឈប់ឲ្យមានការលើកលែងពន្ធលើកញ្ចប់ទំនិញតូចៗ ក្នុងគោលបំណងលុបបំបាត់ការហូរចូលនៃគ្រឿងញៀនតាមព្រំដែន។ ការលើកលែងពន្ធលើកញ្ចប់ដែលមានតម្លៃតិចជាង ៨០០ ដុល្លារបានជួយត្រួសត្រាយផ្លូវពាណិជ្ជកម្មអេឡិចត្រូនិក (E-Commerce) ដែលអនុញ្ញាតឱ្យអ្នកលក់ដឹកជញ្ជូនដោយផ្ទាល់ទៅអតិថិជន។ មិនត្រឹមតែប៉ុណ្ណោះ ការលើកលែងនេះក៏អនុញ្ញាតឱ្យក្រុមហ៊ុន E-Commerce ចិន ដូចជា Shein និង Temu ជៀសវាងការបង់ពន្ធ បើទោះបីជា Trump បានដាក់ពន្ធលើទំនិញចិនក្នុងអំឡុងអាណត្តិដំបូងរបស់គាត់ក៏ដោយ។ ក្នុងរយៈពេលមួយទសវត្សរ៍កន្លងមកនេះ ចំនួននៃកញ្ចប់ទំនិញបានឆ្លងកាត់ព្រំដែនអាម៉េរិកកើនឡើងដប់ដងពី ១២៩ លានកញ្ចប់ដល់ទៅ ១,៣៦ ពាន់លានកញ្ចប់។
គួរឲ្យបញ្ជាក់ដែរថា ច្បាប់ de minimis របស់សហរដ្ឋអាម៉េរិកសម្រាប់លើកលែងលើការនាំចូលកញ្ចប់ទំនិញតូចៗត្រូវបានបង្កើតឡើងនៅឆ្នាំ១៩៣៨ ប៉ុន្តែត្រូវបានទទួលរងនូវការរិះគន់យ៉ាងខ្លាំងពីគណបក្សប្រជាធិបតេយ្យ និងគណបក្សសាធារណរដ្ឋ។ អ្នកខ្លះយល់ថា វាគឺជាចន្លោះប្រហោងដែលអនុញ្ញាតឱ្យផលិតផលចិនមានតំលៃថោកចូលសហរដ្ឋអាមេរិក ដែលប៉ះពាល់ដល់ឧស្សាហកម្មក្នុងប្រទេស ហើយត្រូវបានប្រើក្នុងរូបភាពខុសច្បាប់ ដូចជា ការនាំចូលគ្រឿនញៀន និងសារធាតុគីមីជាដើម៕
Account
Security
Favourite Content