បរទេស ៖ ចិនក្លាយជាមហាយក្សសេដ្ឋកិច្ចពិភពលោកក្នុងរយៈពេលដ៏ខ្លីបំផុតក្នុងរយៈពេលប៉ុន្មានទសវត្សរ៍ចុងក្រោយនេះ ហើយក្នុងនោះឧស្សាហកម្មផលិតទំនិញប្រើប្រាស់រាប់ពាន់ប្រភេទដែលមានតម្លៃថោក និងលឿននោះ គឺជាចំណែកដ៏សំខាន់នៃការស្រូបទាញយកចំណូលរាប់ពាន់លានដុល្លារជារៀងរាល់ឆ្នាំ។

ប្រទេសដែលត្រូវបានគេចាត់ទុកថាជារោងចក្ររបស់ពិភពលោក ឬ World’s Factory ក្នុងរយៈពេល៤០ឆ្នាំមកនេះ ទំនិញដែលផលិតចេញពីចិនថ្វីត្យិតតែមិនត្រូវបានគេទទួលស្គាល់ថាមានគុណភាពកម្រិតទំនិញមួយចំនួនដូចជារបស់ជប៉ុន ឬលោកខាងលិចក្តី ប៉ុន្តែបើនិយាយពីតម្លៃ និងកម្រិតនៃការអាចប្រើប្រាស់បានគឺវាបានបំពេញតំរូវការរបស់ប្រជាជនស្ទើរទូទាំងពិភពលោកដល់រាប់ពាន់លាននាក់ ដូច្នេះដើម្បីប្រកួតប្រជែងទីផ្សារផលិតផលចិនក្នុងពេលនេះវាមិនមែនជារឿងងាយស្រួលពេកនោះឡើយ។

ទោះបីជាយ៉ាងណាក្តី ពិភពលោកក្នុងបរិបថថ្មីនៃការប្រើប្រាស់ថាមពលកកើតឡើងវិញ ផលិតផលជារថយន្តអគ្គិសនីត្រូវបានគេមើលឃើញថា នឹងក្លាយទៅជាផលិតផលដ៏មានសក្តានុពល និងអាចមានទំហំទីផ្សារដល់ទៅរាប់រយពាន់លានដុល្លារនាពេលខាងមុខឆាប់ៗនេះ។

ចិនបានត្រៀមខ្លួនមួយជំហ៊ានមុន និងខ្លាំងជាងគេរួចជាស្រេចសម្រាប់ទីផ្សារដ៏ធំមួយនេះ ជាក់ស្តែងក្រុមហ៊ុនផលិតរថយន្តអគ្គិសនីរបស់ចិនបច្ចុប្បន្នដែលកំពុងមានឈ្មោះល្បីមិនក្រោម១០នោះឡើយកំពុងវាយលុកទីផ្សារជាច្រើនលើពិភពលោកបើទោះបីជាស្ថិតនៅក្នុងទំហំតិចតួចនៅឡើយក្តីនៅតាមតំបន់។

អ្នកជំនាញប្រចាំក្រុមហ៊ុន Bain Consultant បានមើលឃើញថា ចិនបានរៀបចំយុទ្ធសាស្ត្ររួចទៅហើយដើម្បីធ្វើឲ្យទីផ្សារលក់រថយន្តអគ្គិសនីរបស់ខ្លួនអាចជោគជ័យដូចទៅនឹងផលិតផលផ្សេងដែរតាមរយៈតម្លៃដ៏ទាប និងបច្ចេកវិទ្យាទំនើបដែលខ្លួនបានអភិវឌ្ឍ ប៉ុន្តែក្តីស្រម៉ៃមួយនេះហាក់ដូចជាមិនទាន់អាចក្លាយជាការពិត និងមានសភាពរលូននៅឡើយ។

នៅក្នុងទីផ្សារនៅលោកខាងលិចបច្ចុប្បន្ន មេដឹកនាំប្រទេសជាច្រើនបាននាំគ្នារិះគន់ថា លំហូរចូលយ៉ាងខ្លាំងនៃរថយន្តអគ្គិសនីតម្លៃទាបរបស់ចិនអាចនឹងធ្វើឲ្យប៉ះពាល់ធ្ងន់ធ្ងរដល់សេដ្ឋកិច្ចរបស់ពួកគេ ជាពិសេសអ្នកដែលរកស៊ីនៅក្នុងឧស្សាហកម្មផលិតរថយន្តតែម្តង។ ពួកគេខ្លះចោទថា វាជាពាណិជ្ជកម្មដែលមិនតម្លាភាពដោយសារមានការគាំទ្រពីក្រោយដោយរដ្ឋាភិបាលចិន អ្នកខ្លះចោទថា វានឹងធ្វើឲ្យមានផលប៉ះពាល់ដល់បញ្ហាសន្តិសុខជាតិជាដើម។

លទ្ធផលនៃការសម្រេចចិត្តរួមគ្នាក្នុងពេលថ្មីនេះប្លុកអឺរ៉ុបបានឈានទៅដល់ការរៀបចំបង្កើនពន្ធនាំចូលដ៏ធ្ងន់ធ្ងរប្រឆាំងទៅនរថយន្តអគ្គិសនីរបស់ចិន។ ចាប់ពីខែកក្កដាតទៅពន្ធនាំចូលរបស់ចិនមកកាន់ទីផ្សារអឺរ៉ុបនឹងកើនឡើងទៅដល់ ៤៨,១ភាគរយ ពោលគឺកើនឡើងដល់ទៅ ៣៨,១ភាគរយធៀបទៅនឹងពន្ធដែលធ្លាប់បានអនុវត្តត្រឹមតែ១០ភាគរយ។

ការសម្រេចចិត្តអឺរ៉ុបធ្វើឡើងនៅក្រោយបន្តិចដែលរដ្ឋាភិបាលទីក្រុងវ៉ាស៊ិនតោនក្រោមការដឹកនាំនៃរដ្ឋបាល លោក Joe Biden បានប្រកាសបន្ថែមពន្ធនាំចូលផលិតផលរបស់ចិនក្នុងតម្លៃកើនឡើងដល់ទៅ ១៨ពាន់លានដុល្លារគិតត្រឹមខែឧសភា ហើយក្នុងនោះសម្រាប់គ្រប់ប្រភេទរថយន្តរបស់ចិនទាំងអស់នឹងត្រូវបង់ពន្ធ១០០ភាគរយទៀតផងសម្រាប់ទីផ្សារប្រើប្រាស់អាមេរិក។

ក្នុងពេលជាមួយគ្នានេះគេសង្កេតឃើញថា នៅក្នុងប្រទេសអាមេរិកស្ទើរតែមិនមានវត្តមានរបស់រថយន្តអគ្គិសនីចិនទាល់តែសោះ ប៉ុន្តែដោយឡែកនៅក្នុងទីផ្សារអឺរ៉ុបវិញរថយន្តចិនបានលុកលុយបានចំណែកដល់ទៅ៨ភាគរយរួចទៅហើយនៃរថយន្តអគ្គិសនីដែលកំពុងប្រើប្រាស់នៅក្នុងប្លុកអឺរ៉ុប។

ដូច្នេះគេអាចមើលឃើញថា រថយន្តអគ្គិសនីចិនដែលមានតម្លៃថោកៗ ឬថ្លៃក្តីគឺមិនអាចប្រាកដថានឹងទទួលជោគជ័យដូចទៅនឹងទំនិញ និងផលិតផលដែលចិនធ្លាប់ធ្វើបានសម្រេចបានដូចកាលពីមុននោះឡើយ៕