ភ្នំពេញ ៖ ​រាជរដ្ឋាភិបាល​កម្ពុជា​បាន​ប្រកាស​ទទួលស្គាល់​វិទ្យាស្ថានពាណិជ្ជអេស៊ីលីដា ទៅជា​សាកលវិទ្យាល័​យ​​ពាណិជ្ជសាស្ត្រអេស៊ីលីដាជា​ផ្លូវការ ដោយ​ផ្ដោ​តលើ​ជំនាញ​ដដែល​រួម​មាន​ហិរញ្ញវត្ថុ​ ធនាគារ និង​ជំនាញ បច្ចេកទេស​ឌីជីដល ដើម្បីចូល​រួម​ជាមួយរដ្ឋាភិបាល​ក្នុង​ចក្ខុវិស័យ​ជា​ប្រទេស​មានប្រាក់ចំណូល​មធ្យម​កម្រិ​ត​ខ្ព​ស់នៅឆ្នាំ២០៣០ និង​ប្រទេសមានប្រាក់ចំណូល​ខ្ពស់​នៅឆ្នាំ ២០៥០ ។

ថ្លែង​នៅក្នុង​ពិធី​បើក​បវេសនកាល​​ឆ្នាំថ្មី កាលពី​ថ្ងៃទី​១៩ កុម្ភៈ ២០២៤ លោកស្រី ប៊ុនតៃ សុវណ្ណនី ប្រធាន​ការិ​យាល័យ​សិក្សា និង​កិច្ច​កា​រនិស្សិតនៃសាកល​វិទ្យា​ល័យ​​ពាណិជ្ជសាស្ត្រ​អេស៊ីលីបានមានប្រសាសន៍ថា ក្នុង​​រយៈ​ពេល៨ឆ្នាំកន្លងទៅនេះ សាកលវិទ្យាល័យ​ពាណិជ្ជសាស្ត្រ​អេស៊ីលីដា ទទួលបាននិស្សិត​ចុះឈ្មោះចូ​ល​សិក្សា​​​ចំនួន​៨ជំនាន់​ ដែលមាននិស្សិតសរុប​ចំនួន ៧ ៥១៨នាក់ គិតត្រឹមថ្ងៃទី​១៦ ខែកុម្ភៈ ឆ្នាំ ២០២៤ ។

លោកស្រីបន្តថា បច្ចុប្បន្ន​នេះ និស្សិត​កំពុង​បន្តសិក្សា​ថ្នាក់​បរិញ្ញាបត្រ​រង​ បរិញ្ញាបត្រ និង​បរិញ្ញា​បត្រ​ជាន់ខ្ពស់​សរុប​ ៤ ៧៩៥នាក់ ដោយក្នុងមួយថ្ងៃ​មាននិស្សិ​ត​​ជា​ម​ធ្យ​ម​ចំនួន​២៥នាក់ ។ ដោយឡែកសម្រាប់និស្សិត​ចុះ​ឈ្មោះ​ចូលរៀន​ក្នុងឆ្នាំថ្មី ២០២៣-២០២៤ មានចំនួន ២​ ៣០៣​នាក់ ដែល​មាននិស្សិតស្រី​ ១ ៧៤៥នាក់ ។​

បើតាម​លោក​បណ្ឌិត ផុន​ ណារិន សាកលវិទ្យាធិការ​នៃសាកលវិទ្យាល័យ​ ពាណិជ្ជសាស្ត្រ​អេស៊ីលីដា បាន​មានប្រសាសន៍ថា ឆ្លើយតបនឹង​ការ​ជឿទុក​ចិត្តពី​សំណាក់​រាជ​រដ្ឋាភិបាល​ដែល​បានដំឡើង​គ្រឹះស្ថាន​ឧត្តម​សិ​ក្សា​​ពី​វិទ្យាស្ថានទៅជា​សាកលវិទ្យាល័យ​ពាណិជ្ជសាស្ត្រ​អេស៊ីលីដា ​បានធ្វើការ​អភិវឌ្ឍ​កម្មវិធីសិក្សា​ឱ្យ​ទាន់​សម័យ​ជានិច្ច ជាពិសេស​កម្មវិធី​សិក្សា​បែប​ឌីជីថលតាមបែប​ច្ចេកវិទ្យា និង​វិទ្យាសាស្ត្រ​ដើម្បីគាំទ្រ​គោល​នយោបាយ​សង្គម​និង​សេដ្ឋកិច្ច​ឌីជីថល  ដោយនឹង​ចូលរួម​ចំណែក​​អភិវឌ្ឍន៍​សង្គមឌីជីថល ដើម្បីធនធាន​មនុ​ស្ស​​​នៅកម្ពុជា ទៅធ្វើការ​នៅក្រៅប្រទេស​ក្នុង​ឋានៈ​ជាអ្នកជំនាញការដោយមិនមែនត្រឹមតែ​ជាកម្ម​ករ​នោះទេ​ ។​​

លោក​បណ្ឌិត​បន្តថា ការ​អភិវឌ្ឍ​​ធនធានមនុស្ស​មិនមែនត្រឹមតែអភិវឌ្ឍន៍​យកគុណភាព ​ឬយ​ក​ចំនួន​ឱ្យ​ច្រើន​នោះ​​ទេ គឺត្រូវ​ដើរទន្ទឹមគ្នាទាំង​ចំនួន និង​គុណភាព ហើយកាល​ណា​មានចំនួនកាន់តែច្រើន​​នឹងអាច​ចូលរួម​ក្នុង​ការអភិវឌ្ឍ​ជាមួយរដ្ឋាភិបាលនៅក្នុងវិស័យ​សេដ្ឋកិច្ច​របស់ជាតិបាន​ ។

លោក​បន្ថែមថា​ ការ​ទទួល​ស្គាល់ជា​សាកលវិទ្យា​ពីសំណាក់រាជរដ្ឋាភិបាល​កម្ពុជា ជាពិសេស​ពីសំណាក់​ស​ម្ដេ​ច​​ធិបតី ហ៊ុន ​ម៉ាណែត នឹង​ផ្ដល់ឱកាស​ឱ្យសាកលវិទ្យាល័យ​ពាណិជ្ជសាស្ត្រអាច​ជួយ​រដ្ឋាភិបាល​ក្នុងការ​ស​ម្រេ​ច​​បាននូវ​ចក្ខុវិស័យ​នៅឆ្នាំ២០២៣ និងឆ្នាំ២០៥០ ខណៈដែលបច្ចុប្បន្ន​នេះ សាកលវិទ្យាល័យ​ពាណិជ្ជសាស្ត្រ​អេស៊ីលី​ដា បានអភិវឌ្ឍន៍​ធន​ធាន​មនុស្ស​នៅមិនទាន់គ្រប់​ទៅតាមតម្រូវការ​ទីផ្សារ​ការងារ​ខាង​ក្រៅ​នោះទេ ពោលគឺ នៅតាមគ្រឹះស្ថាននានាតែ​ងតែ​ស្នើសុំ​និស្សិត​ដែលជិត​បញ្ចប់​ការសិក្សាពីសាកលវិទ្យាល័យ ដើម្បី​ចូលរួម​ក្នុងកម្មវិធី​សិក្ខា​សាលា​ការងារ និង​បំ​ពេញ​កា​រងារ​នៅក្នុងគ្រឹះស្ថាន​របស់ពួកគេ តែជាក់ស្ដែង​សាកលវិទ្យាល័យ​ពាណិជ្ជសាស្ត្រ​អេស៊ីលីដា មិនមាននិស្សិត​គ្រប់ចំនួនទៅតាម​ការ​ស្នើ​សុំ​នោះទេ​ ។​

សូមបញ្ជាក់ដែរថា បើតាមអនុក្រឹត្យ​របស់រាជរដ្ឋាភិបាល​កម្ពុជា​ចុះថ្ងៃទី១២ ខែ កុម្ភៈ ឆ្នាំ ២០២៤ ​បានទទួលស្គាល់​ការ​ប្រែ​ក្លាយ​វិទ្យា​ស្ថាន​ពាណិជ្ជសាស្ត្រអេស៊ីលីដា ទៅជាស​ក​ល​វិទ្យា​ល័យ​ពាណិជ្ជសាស្ត្រ​អេស៊ីលីដា ដោយ​ធ្វើការ​បណ្ដុះបណ្ដាល​កម្រិត​បរិញ្ញាបត្រ​រង បរិញ្ញាបត្រ និ​ងបរិញ្ញាបត្រ​ជាន់ខ្ពស់ ដែលមាន​មហាវិទ្យាល័យ​ចំនួន ៥ និង សាលា​​ក្រោយបរិញ្ញាបត្រ​ចំនួន​១ ៕ ​