បរទេស៖ យោងតាមប្រភពព័ត៌មានពី BBC បានរាយការណ៍ថា អាល្លឺម៉ង់អាចនឹងធ្លាក់ចូលទៅក្នុងវិបត្តិសេដ្ឋកិច្ច ដោយសារការដាក់ពន្ធរបស់សហរដ្ឋអាម៉េរិកលើទំនិញនាំចូល។

លោក Joachim Nagel ប្រធានធនាគារកណ្តាលអាល្លឺម៉ង់ Deutsche Bundesbank បានលើកឡើងថា សេដ្ឋកិច្ចអាល្លឺម៉ង់បានធ្លាក់ចុះក្នុងរយៈពេលពីរឆ្នាំចុងក្រោយនេះ ហើយការរងសម្ពាធពីពន្ធគយអាចនឹងធ្វើឲ្យប្រទេសធ្លាក់ចូលក្នុងវិបត្តិសេដ្ឋកិច្ចនៅឆ្នាំនេះ។ មិនត្រឹមតែប៉ុណ្ណោះ អ្នកប្រើប្រាស់នៅក្នុងអាល្លឺម៉ង់នឹងត្រូវប្រឈមមុខនឹងតម្លៃខ្ពស់ជាងនេះ ជាពិសេស ផលិតផលអាម៉េរិក។ ប្រសិនបើគ្មានពន្ធគយនោះទេ សេដ្ឋកិច្ច​អាល្លឺម៉ង់​នឹង​នៅ​ទ្រឹងជាមួយនឹង​កំណើនបន្តិចបន្តួចប្រហែល ០,២ ភាគរយ។

ទន្ទឹមនឹងនេះ លោក Nagel គាំទ្រវិធានការសងសឹករបស់សហភាពអឺរ៉ុបប្រឆាំងនឹងប្រធានាធិបតីអាមេរិក Donald Trump ដែលដាក់ពន្ធ ២៥ ភាគរយលើការនាំចូលដែកថែប និងអាលុយមីញ៉ូមទាំងអស់ពីបរទេស។ ពន្ធគយគឺជាផ្នែកសំខាន់នៃចក្ខុវិស័យសេដ្ឋកិច្ចទាំងមូលរបស់ Trump ដោយគាត់សង្ឃឹមថា ការដាក់ពន្ធគយនឹងជំរុញការផលិត និងការពារវិស័យការងាររបស់សហរដ្ឋអាម៉េរិក។ យ៉ាងណាមិញ មនុស្សជាច្រើនរិះគន់ថា ការដាក់ពន្ធគយនឹងបណ្តាលឲ្យតម្លៃកាន់តែឡើងថ្លៃសម្រាប់អ្នកប្រើប្រាស់នៅក្នុងអាម៉េរិក។ ជាការឆ្លើយតបទៅនឹងចំណាត់ការរបស់ Trump សហភាពអឺរ៉ុបបានវាយបកទៅវិញជាមួយនឹងការដាក់ពន្ធលើការនាំចូលផលិតផលជាច្រើនរបស់សហរដ្ឋអាម៉េរិក ដែលគ្រោងនឹងចូលជាធរមាននៅថ្ងៃទី ១ ខែមេសា។

ប្រធានធនាគារកណ្តាលអាល្លឺម៉ង់ Nagel ចាត់ទុកថា គោលនយោបាយពន្ធគយរបស់ Trump គឺសម្រាប់សេដ្ឋកិច្ចពីអតីតកាលប៉ុណ្ណោះ ហើយការធ្វើបែបនេះមិនមែនជាគំនិតល្អនោះទេ។ ឥឡូវនេះ សង្គ្រាមពាណិជ្ជកម្មសកលគឺជាកង្វល់ធំមួយ ដោយសារការដាក់ពន្ធគយ និងពន្ធសងសឹកគ្នាទៅវិញទៅមក ប៉ុន្តែវាជាភាពចាំបាច់សម្រាប់សហភាពអឺរ៉ុបក្នុងការវាយបកទៅវិញ។ ទោះជាយ៉ាងណាក្តី Nagel សង្ឃឹមថា នៅពេលដែលសហរដ្ឋអាម៉េរិកដឹងខ្លួនពីតម្លៃខ្ពស់បំផុតដែលត្រូវបង់ នោះវានឹងអនុញ្ញាតឱ្យមានឱកាសបន្ថែមទៀតសម្រាប់ភាគីទាំងអស់ដើម្បីឈានទៅរកដំណោះស្រាយផ្សេងៗគ្នា។

គួរឲ្យបញ្ជាក់ដែរថា ការនាំចេញរបស់អាល្លឺម៉ង់គឺជាចំណុចខ្លាំងមួយនៃសេដ្ឋកិច្ចរាប់ទសវត្សរ៍មកហើយ ជាពិសេសរថយន្តល្បីៗរបស់ប្រទេសនេះដូចជា BMW, Mercedes, Volkswagens និង Audis មានប្រជាប្រិយភាពនៅសហរដ្ឋអាម៉េរិក។ ការដាក់ពន្ធគយរបស់ Trump អាចនឹងធ្វើឲ្យរថយន្តនាំចូលពីអាល្លឺម៉ង់ឡើងថ្លៃជាងមុន ហើយអតិថិជនក្នុងអាម៉េរិកត្រូវចំណាយបន្ថែមទៀត៕