ភ្នំពេញ៖ កាលពីឆ្នាំ២០២៤កន្លងទៅនេះ រាជរដ្ឋាភិបាលនៃប្រទេសកម្ពុជា ជាពិសេស រដ្ឋបាលជលផល បានសង្កេតឃើញថា ប្រទេសកម្ពុជាទទួលបានផលនេសាទ និងវារីវប្បកម្មសម្រេចបានជាង ៩២៧ពាន់ តោន កើនឡើង៦១ពាន់តោន ស្មើនឹងប្រមាណ ៧% ធៀបនឹងឆ្នាំ២០២៣ ដែលក្នុងនោះផលនេសាទទឹកសាបទទួលបាន ៤៦៧ពាន់តោន ផលនេសាទសមុទ្រទទួលបាន ១៣៩ពាន់តោន និងផលវារីវប្បកម្ម ៣២០ ពាន់តោន។

នេះជាប្រសាសន៍លើកឡើងរបស់ឯកឧត្តម ស្រ៊ុន លឹមសុង អនុប្រធានរដ្ឋបាលជលផល និងជាអនុប្រធានកម្មវិធី CAPFISH-Capture នៃក្រសួងកសិកម្ម រុក្ខាប្រមាញ់ និងនេសាទ នៅក្នុងពិធីបិទ គម្រោង «បង្កើតការងារជាសេដ្ឋកិច្ចវិលជុំរបស់សហគមន៍នេសាទនៅបឹងទន្លេសាបខាងលិច ក្នុងតំបន់១ កាលពីថ្ងៃទី១៣ ខែមិថុនា ឆ្នាំ២០២៥ រាជធានីភ្នំពេញ។

ឯកឧត្តមបានបន្តមានប្រសាសន៍ថា៖

«ការអភិរក្សសត្វផ្សោតដែលជារតនសម្បត្តិជាតិ ក្រសួងទទួលបានតួលេខវិជ្ជមាន ដែលមានសត្វផ្សោតបានកើតកូនចំនួន៩ក្បាល និងស្លាប់៤ក្បាល តាមការប៉ានស្មានមានសត្វផ្សោតសរុបចំនួន ១០៤ក្បាលក្នុងឆ្នាំ២០២៤។ ជាមួយគ្នានេះ ក៏មានវត្តមានជ្រូកទឹកជាច្រើនឡើងវិញបន្ទាប់ពីបាត់ខ្លួនជាង១០ឆ្នាំកន្លងមក។ ជាមួយគ្នានេះ ផ្សោតឃ្លៀច (ផ្សោតពណ៌ ផ្កាឈូក) និងផ្សោតក្បាលត្រឡោកក៏កើនឡើងច្រើនផងដែរ ប្រមាណជាង១០០ក្បាល ដែលតែងតែមានវត្តមានជាញឹកញាប់នៅតំបន់ឆ្នេរ ជាពិសេសខេត្តកំពត និងកែប»។

ឯកឧត្តម ស្រ៊ុន លឹមសុង បានឱ្យដឹងថា៖ កន្លងមកក្រសួងបានពង្រឹងកិច្ចសហការជាមួយក្រសួង-ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងអាជ្ញាធរមានសមត្ថកិច្ច ក៏ដូចជាអង្គការជាតិ និងអន្តរជាតិក្នុងការទប់ស្កាត់​បទល្មើសនេសាទកាន់តែមានប្រសិទ្ធភាព ដើម្បីធានាបាននូវការផ្គត់ផ្គង់ កាត់បន្ថយការនាំចូល រក្សាបានតុល្យភាពតម្លៃទីផ្សារ ព្រមទាំងធានាបាននូវគុណភាព និងសុវត្ថិភាពសម្រាប់អ្នកបរិភោគ។

ទាក់ទងនឹងគម្រោង «បង្កើតការងារជាសេដ្ឋកិច្ចវិលជុំរបស់សហគមន៍នេសាទនៅបឹងទន្លេសាប» ឯកឧត្តមបានថ្លែងអំណរគុណយ៉ាងជ្រាលជ្រៅដល់សហភាពអឺរ៉ុប ដែលបានជួយគាំទ្រថវិកាដ៏ច្រើនសន្ធឹកសន្ធាប់សម្រាប់​អនុវត្តកម្មវិធី CAPFISH-Program ​ក៏ដូចជាអង្គការដៃគូក្នុងការអនុវត្តគម្រោងជុំវិញបឹងទន្លឹសាបដ៏មានសារៈសំខាន់ក្នុងការជួយលើកស្ទួយសេដ្ឋកិច្ចជាតិ​។

តាមរយៈរបាយការណ៍សង្ខេបរបស់អង្គការអុកស្វាម រដ្ឋបាលជលសង្កេតឃើញថា រាល់សកម្មភាពរបស់គម្រោងចាប់តាំងពីឆ្នាំ២០២១ ដល់ឆ្នាំ២០២៥ ពិតជាបានជួយលើកស្ទួយការរស់នៅរបស់ប្រជានេសាទបានយ៉ាងច្រើនគួរឲ្យកោតសរសើរ រួមមានការចូលរួមផ្នែកទឹកស្អាត និងអនាម័យ ផ្នែកអប់រំការចិញ្ចឹមជីវិត និងការអភិរក្សធនធានធម្មជាតិជាដើម។​

ក្នុងរយៈពេល ៤ ឆ្នាំកន្លងមក អង្គការអុកស្វាម និងអង្គកាជាដៃគូបានសម្រេចនូវលទ្ធផលសំខាន់ៗជាច្រើន ដូចជា បណ្តុះបណ្តាលសមាជិកសហគមន៍អំពីការអភិរក្សត្រី និងព្រៃលិចទឹក, បង្កើតក្រុមកែច្នៃផលនេសាទ និងក្រុមចិញ្ចឹមឃ្មុំ, ផ្តល់សេវាទឹកសុវត្ថិភាព បង្គន់អនាម័យ និងជួសជុលសាលារៀន, ផ្តល់អាហារ និងអាហារូបករណ៍ដល់សិស្ស, ជំរុញញអេកូទេសចរណ៍ និងកសិកម្មឆ្លាត ,ការកែច្នៃសំរាមទៅជាឥដ្ឋអេកូ ​និងទៅជារបស់ប្រើប្រាស់ច្រើនយ៉ាង និងបានបំពាក់សូឡាតាមផ្ទះសហគមន៍នេសាទ។

ឯកឧត្តមបានបញ្ជាក់ថា៖ លទ្ធផលទាំងនេះមិនអាចសម្រេចបានឡើយប្រសិនបើគ្មានការចូលរួមយ៉ាងសកម្មពីសហគមន៍ អាជ្ញាធរមូលដ្ឋាន និងដៃគូអភិវឌ្ឍន៍ទាំងអស់។ ការអនុវត្តគម្រោងរបស់អង្គការអុកស្វាមនេះ រដ្ឋបាលជលផលមានមោទនភាពចំពោះសមិទ្ធផលសំខាន់ៗដែលសម្រេចបាន ក្នុងការរួមចំណែកអភិវឌ្ឍជលផល និងសូមថ្លែងអំណរគុណយ៉ាងជ្រាលជ្រៅចំពោះការប្តេជ្ញាចិត្ត និងកិច្ចសហការរបស់អ្នកទាំងអស់គ្នា៕