ភ្នំពេញ ៖ នេះបើយោងតាមព្រឹត្តិបត្រ​ស្ថិតិ​សេដ្ឋកិច្ច និង​ហិរញ្ញវត្ថុ​ប្រចាំត្រីមាស​ទី​២ ឆ្នាំ២០២៣ របស់ក្រសួងសេដ្ឋកិច្ច និងហិរញ្ញវត្ថុ ដែលបានចេញផ្សាយកាលពីថ្ងៃទី២៥ ខែកញ្ញា ឆ្នាំ២០២៣ កន្លងទៅបានបញ្ជាក់ថា សេដ្ឋកិច្ចកម្ពុជា ត្រូវបានប៉ាន់ស្មានថានឹងសម្រេចបានក្នុងអត្រា ៥,៦% នៅឆ្នាំ២០២៣នេះ ដែលខ្ពស់ជាឆ្នាំ២០២២ កន្លងទៅ។

របាយការណ៍បានបញ្ជាក់ថា ការឡើងនេះ គឺគាំទ្រដោយការរក្សាបានកំណើនល្អនៃកម្មន្តសាលមិនមែនកាត់ដេរ ដែលបម្រើឱ្យការនាំចេញ និងការប្រើប្រាស់ក្នុងស្រុក ការកើនឡើងនូវគម្រោងវិនិយោគធំៗ ការងើបឡើងវិញនៃសំណើសាងសង់ និងការងើបឡើងវិញគួរឱ្យកត់សម្គាល់នៃវិស័យសំណង់ទេសរណ៍ តាមរយៈភ្ញៀវទេសចរក្នុងស្រុក និងអន្តរជាតិ។

ដោយឈរលើមូលដ្ឋាននៃស្ថានភាពសូចនាករសំខាន់ៗក្នុងត្រីមាសទី២ ឆ្នាំ២០២៣ ធៀបនឹងត្រីមាសដូចគ្នាឆ្នាំមុន បានបង្ហាញថា ស្ថានភាពសេដ្ឋកិច្ចភាពល្អប្រសើរ ដែលស្តែងតាមរយៈការកើនឡើងចំនួនភ្ញៀវអន្តរជាតិជាង ២៧១% ការកើនឡើងទុនគម្រោងសាងសង់ប្រមាណ ១៣០,២% ការកើនឡើងនៃទុនវិនិយោគប្រមាណ ៦៣,៣% ការកើនឡើងនៃទំហំទំនិញនាំចេញមិនរាប់បញ្ចូលមាសប្រមាណ ០,១% ការកើនឡើងនៃអត្រាប្តូរប្រាក់ជាមធ្យមប្រមាណ ១,២% ការកើនឡើងក្នុងកម្រិតទាបនៃសន្ទស្សន៍ថ្លៃទំនិញត្រឹមប្រមាណ ០.៥% និងការថមថយប្រេងឆៅប្រមាណជាង ៣០%។

ទោះបីជាយ៉ាងក៏ដោយ ធនាគារអភិវឌ្ឍន៍អាស៊ី​ (ADB) កាលពីថ្ងៃទី២០ ខែកញ្ញា ឆ្នាំ២០២៣ បានព្យាករណ៍ថា កំណើនសេដ្ឋកិច្ចកម្ពុជា​ក្នុង​ឆ្នាំ២០២៣ ត្រូវបានរំពឹងថានឹងទាបជាងការព្យាករណ៍​ពីដើមឆ្នាំ​បន្តិចគឺមកត្រឹម ៥,៣% ពី៥,៥% ជាចម្បងគឺដោយសារ​តែ​កំណើន​​វិស័យឧស្សាហ​កម្មយឺត​ជាង​ការរំពឹងទុកនៅក្នុងឆមាសទីមួយនេះ ខណៈ ការព្យាករណ៍កំណើនសេដ្ឋកិច្ចកម្ពុជា​ឆ្នាំ២០២៤ បានរក្សានៅ ៦,០% ដដែល។

ក្នុងរបាយការណ៍បានឱ្យដឹងថា ទស្សនវិស័យអភិវឌ្ឍន៍អាស៊ី (ADO) ខែកញ្ញា​ ឆ្នាំ២០២៣​ កត់សម្គាល់ថា ការនាំចេញសម្លៀក​បំពាក់ស្បែកជើង និងទំនិញ​ធ្វើដំណើរបាន​ធ្លាក់​ចុះ​១៨,៦% ឆ្នាំលើឆ្នាំក្នុងឆមាសទី១​នៃឆ្នាំ២០២៣។​ ការធ្លាក់ចុះនេះ​ត្រូវបានប៉ះប៉ូវមួយ​ផ្នែកដោយកំណើន២២,៩% នៃការនាំចេញផលិតផលកម្មន្តសាលក្រៅ​ពីវិស័យកាត់ដេរ​ មានជាអាទិ៍ គ្រឿងបន្លាស់រថយន្ត បន្ទះស្រូបពន្លឺព្រះអាទិត្យ និងគ្រឿងសង្ហារឹមជាដើម។

លោកស្រី Jyotsana Varma នាយិកា ADB ប្រចាំកម្ពុជាមានប្រសាសន៍ថា ការរំពឹង​ទុក​ចំពោះភាពប្រសើរជាងមុននៃកំណើនសេដ្ឋកិច្ចរបស់ប្រទេសធំៗ​ដែលមានការ​ជឿន​លឿន​ត្រូវបានរំពឹងថានឹងជំរុញការនាំចេញ​របស់​​​កម្ពុជាសម្រាប់ឆមាសទី២​ ឆ្នាំ២០២៣ ទោះបីជាកំណើនវិស័យឧស្សាហកម្មក្នុង​ស្រុក​​បានថមថយក្នុងឆមាសដំបូងឆ្នាំនេះក៏​ដោយ។ 

លោកស្រីបញ្ជាក់ថា វិស័យសេវាកម្មចូលរួមចំណែកធំជាងគេ​ចំពោះកំណើន​សេដ្ឋកិច្ចឆ្នាំនេះដោយវិស័យនេះបានកើនលើសការរំពឹងទុកនៅក្នុងឆមាសទី១ជាពិសេស ដោយសារការ​ងើប​ឡើងវិញខ្លាំងនៃវិស័យទេសចរណ៍​។

លោកបណ្ឌិត លី គូឈីង ប្រធានក្រុមបេសកកម្មទស្សនកិច្ចប្រចាំឆ្នាំរបស់ស្ថាប័ន ASEAN+3 Macroeconomic Research Office (AMRO) បានលើកឡើងថា សេដ្ឋកិច្ចកម្ពុជាមានការងើបឡើងវិញយ៉ាងឆាប់រហ័ស និងរឹងមាំបន្ទាប់ពីការបើកប្រទេសឡើង ដែលជំរុញដោយសកម្មភាពចាយវាយក្នុងស្រុក និងការកើនឡើងតម្រូវការសកល។ នៅក្នុងឆ្នាំ ២០២៣ AMRO វាយតម្លៃថា សេដ្ឋកិច្ចកម្ពុជានៅរក្សាបានកំណើនក្នុងអត្រា ៥,៣% ដែលជាកំណើនខ្ពស់ក្នុងតំបន់ ទោះបីត្រូវថមថយតិចជាការវាយតម្លៃកាលពីដើមឆ្នាំក្តី។

លោកបណ្ឌិត លី គូឈីង បានថ្លែងបន្តថា កំណើននេះជំរុញដោយការងើបឡើង វិញយ៉ាងឆាប់រហ័សនៃវិស័យទេសចរណ៍, ភាពរឹងមាំនៃវិស័យកម្មន្តសាលមិនមែនកាត់ដេរ និងលំនឹងសកម្មភាព សេដ្ឋកិច្ចក្នុងស្រុក ទោះបីមានការថមថយវិស័យកាត់ដេរ និងភាពង្រឹងនៃវិស័យសំណង់ និងអចលនទ្រព្យក៏ដោយ ។ កត្តាទាំងនេះ បង្ហាញពីលទ្ធផលនៃការបន្តអនុវត្តវិធានការអន្តរាគមន៍នានារបស់រាជរដ្ឋាភិបាល ដើម្បីរក្សាលំនឹងជីវភាព និងសកម្មភាពសេដ្ឋកិច្ចរបស់វិស័យអាទិភាពដែលនៅទទួលរងផលប៉ះពាល់។

លោកបណ្ឌិតបានបន្តថា ទោះបីវាជរដ្ឋាភិបាលបានបង្កើនចំណាយសម្រាប់ការជួយអន្តរាគមន៍ទាំងនេះ ក៏ស្ថានភាពហិរញ្ញវត្ថុសាធារណៈជារួមនៅរក្សាបានចីរភាព តាមរយៈការរក្សានូវវិន័យថវិកា ការចាយចំទិសដៅ ព្រមទាំងការរក្សាបំណុលសាធារណៈឱ្យនៅកម្រិតទាបអាចគ្រប់គ្រងបាន។ វិស័យហិរញ្ញវត្ថុក៏នៅមានស្ថិរភាព ទោះបីមានការប៉ះពាល់ខ្លះដោយសារការកើនឡើងនូវអត្រាការប្រាក់គោលជាសកល។ ទំហំពាណិជ្ជកម្មជារួមមានតុល្យភាពល្អប្រសើរ ដោយសារការថមថយការនាំចេញ ជាពិសេស វត្ថុធាតុដើមផលិត ខណៈដែលការបង្វែរឯកជននៅបន្តមានកំណើន៕