សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ធនាគារជាតិនៃកម្ពុជា (NBC) និងគណៈប្រតិភូក្រុមប្រឹក្សាធុរកិច្ចសហភាពអឺរ៉ុប-អាស៊ាន (EU-ABC) បានបើកកិច្ចពិភាក្សា ដើម្បីស្វែងរកកិច្ចសហការថ្មីៗ លើកកម្ពស់ទំនាក់ទំនងផ្នែកធុរកិច្ច និងវិនិយោគរវាងសហភាពអឺរ៉ុបជាមួយប្រទេសកម្ពុជា ជាពិសេសក្នុងវិស័យធនាគារ និងហិរញ្ញវត្ថុ។
កិច្ចពិភាក្សាការងារនេះ ត្រូវបានធ្វើឡើងក្នុងជំនួបរវាង លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា និងគណៈប្រតិភូក្រុមប្រឹក្សាធុរកិច្ចសហភាព អឺរ៉ុប-អាស៊ាន (EU-ABC) ដឹកនាំដោយលោកស្រី Sharon Toh អនុប្រធានក្រុមប្រឹក្សាភិបាល អមដោយថា្នក់ដឹកនាំជាន់ខ្ពស់សភាពាណិជ្ជកម្មអឺរ៉ុបប្រចាំកម្ពុជា និងតំណាងក្រុមហ៊ុនអឺរ៉ុបធំៗ នារសៀលថ្ងៃទី៤ ខែមីនា ឆ្នាំ២០២៦ នៅធនាគារជាតិនៃកម្ពុជា អគារវត្តភ្នំ។
ធនាគារជាតិ បានបញ្ជាក់ថា កិច្ចពិភាក្សានេះមានគោលបំណងស្វែងរកកិច្ចសហការថ្មីៗថែមទៀត ដើម្បីលើកកម្ពស់ទំនាក់ទំនងផ្នែកធុរកិច្ច និងវិនិយោគរវាងសហភាពអឺរ៉ុបជាមួយប្រទេសកម្ពុជា ជាពិសេសក្នុងវិស័យធនាគារ និងហិរញ្ញវត្ថុ។
ក្នុងជំនួបនេះ លោកជំទាវបណ្ឌិតទេសាភិបាលបានមានប្រសាសន៍អំពីវឌ្ឍនភាពប្រព័ន្ធធនាគារកម្ពុជា ការរួមចំណែកក្នុងការជំរុញកំណើនសេដ្ឋកិច្ច និងគាំទ្រដល់ការធ្វើពាណិជ្ជកម្ម និងការវិនិយោគ។ បន្ថែមលើនេះ លោកជំទាវក៏បានគូសបញ្ជាក់ពីការអភិវឌ្ឍប្រព័ន្ធទូទាត់ឌីជីថល និងការសម្រេចការតភ្ជាប់ជាមួយប្រទេសសក្តានុពលនានា ដែលផ្តល់ភាពអំណោយផលដល់ការលើកកម្ពស់ការប្រើប្រាស់ប្រាក់រៀល និងបរិយាបន្នហិរញ្ញវត្ថុ។
លោកជំទាវបណ្ឌិត ជា សិរី បានថ្លែងឱ្យដឹងថា លោកជំទាវពិតជារីករាយណាស់ដែលបានជួបជាមួយគណៈប្រតិភូក្រុមប្រឹក្សាធុរកិច្ចសហភាព អឺរ៉ុប-អាស៊ាន ដោយបានជម្រាបជូនគណៈប្រតិភូអំពីការអភិវឌ្ឍប្រព័ន្ធសេដ្ឋកិច្ច និងហិរញ្ញវត្ថុនៅកម្ពុជា។ ទោះបីយ៉ាងក៏ដោយ លោកជំទាវបណ្ឌិត បានបន្តថា បន្ទាប់ពីការអភិវឌ្ឍយ៉ាងឆាប់រហ័សអស់រយៈពេលជាយូរមកយ៉ាងណាក៏ដោយ កំណើនសេដ្ឋកិច្ចរបស់ប្រទេសកម្ពុជាត្រូវបានរំពឹងថានឹងនៅតែវិជ្ជមាន ប៉ុន្តែនឹងប្រឈមមុខនឹងហានិភ័យធ្លាក់ចុះពីភាពមិនប្រាកដប្រជាពីកត្តាខាងក្រៅ និងកត្តាក្នុងស្រុកមួយចំនួន។
លោកជំទាវបណ្ឌិត បានថ្លែងថា ទស្សនវិស័យខាងនេះ ត្រូវឱបក្រសោប ដោយសារភាពមិនប្រាកដប្រជាលើភាពតានតឹងព្រំដែន ពន្ធបដិការ និងការអនុវត្តកាន់តែខ្លាំងឡើងប្រឆាំងនឹងប្រតិបត្តិការឆបោកតាមអ៊ីនធឺណិត ដែលអាចជាផលលំបាករយៈពេលខ្លី។
លោកជំទាវបណ្ឌិត ជា សិរី បាថ្លែងដូច្នេះថា ៖
«យ៉ាងណាក៏ដោយ ការចេញនូវវិធានការនានា ត្រូវបានរំពឹងថានឹងពង្រឹងអភិបាលកិច្ច កែលម្អកេរ្តិ៍ឈ្មោះកម្ពុជាលើឆាកអន្តរជាតិ និងគាំទ្រដល់ការវិនិយោគប្រកបដោយចីរភាពបន្ថែមទៀតក្នុងរយៈពេលមធ្យម»។
លោកជំទាវក៏បានថ្លែងអំណរគុណដល់បណ្តាក្រុមហ៊ុនអឺរ៉ុបដែលបានវិនិយោគ និងពង្រីកផលិតកម្មនៅកម្ពុជា និងស្នើឱ្យបង្កើនការវិនិយោគឱ្យបានកាន់តែច្រើនថែមទៀត។
ក្នុងឱកាសនេះ លោកស្រី Sharon Toh បានលើកឡើងពីសុទិដ្ឋិនិយមរបស់គណៈប្រតិភូ EU-ABC ចំពោះសក្តានុពលសេដ្ឋកិច្ចកម្ពុជា និងបានលើកសសើរពីការបំពេញតួនាទីបានយ៉ាងល្អរបស់ធនាគារជាតិនៃកម្ពុជា ក្នុងការរក្សាស្ថិរភាពប្រព័ន្ធធនាគារ ជាពិសេសការអភិវឌ្ឍប្រព័ន្ធទូទាត់ឌីជីថល។
ទន្ទឹមនឹងការលើកឡើងពីកត្តាប្រឈមមួយចំនួន គណៈប្រតិភូ EU-ABC ក៏បានគូសបញ្ជាក់ពីការតាំងចិត្តបន្តពង្រឹងកិច្ចសហប្រតិបត្តិការថែមទៀត ជាពិសេសលើការវិនិយោគដើម្បីពង្រឹងភាពប្រកួតប្រជែងផ្នែកពាណិជ្ជកម្ម ការអភិវឌ្ឍហិរញ្ញវត្ថុប្រកបដោយចីរភាព និងផ្សារមូលបត្រជាដើម។
គណៈប្រតិភូក្រុមប្រឹក្សាធុរកិច្ចសហភាព អឺរ៉ុប-អាស៊ាន បានបង្ហាញពីសុទិដ្ឋិនិយមនៅក្នុងដំណើរអភិវឌ្ឍន៍របស់ប្រទេសកម្ពុជា។
របាយការណ៍ប្រចាំឆមាសទី១ និងទិសដៅការងារឆមាសទី២ របស់ធនាគារជាតិនៃកម្ពុជា បានបង្ហាញថា ប្រព័ន្ធធនាគារនៅកម្ពុជា បន្តរក្សាបានភាពធន់ និងបានរួមចំណែកគាំទ្រសកម្មភាពសេដ្ឋកិច្ច ដែលឆ្លុះបញ្ចាំងតាមរយៈកំណើនទ្រព្យសកម្ម របស់គ្រឹះស្ថានធនាគារនិងហិរញ្ញវត្ថុ បានកើន ៩,៥% ដល់ ៤០៧,១ ទ្រីលាន រៀល (១០១,៨ ប៊ីលានដុល្លារអាមេរិក) ដោយ ក្នុងនោះទ្រព្យសកម្មរបស់គ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើមានសមាមាត្រ ៩៧% និងបានកើនឡើង ៩,៧% ដល់ ៣៩៤,៨ ទ្រីលានរៀល (៩៨,៧ ប៊ីលានដុល្លារអាមេរិក) ខណៈដែលគ្រឹះស្ថានធនាគារនិងហិរញ្ញវត្ថុមិន ទទួលប្រាក់បញ្ញើមានសមាមាត្រ ៣% និងបាន កើនឡើង ៣,១% ដល់ ១២,៣ ទ្រីលានរៀល (៣,១ ប៊ីលានដុល្លារអាមេរិក)៕
Account
Security
Favourite Content