ក្នុងអំឡុងពេលបុណ្យចូលឆ្នាំចិនកាលពីឆ្នាំ២០២៣ ត្រឹមតែរយៈពេល៦ថ្ងៃដំបូងប៉ុណ្ណោះ ការធ្វើដំណើរទេសចរណ៍សរុបនៅទូទាំងប្រទេសចិនមានចំនួនដល់ទៅ ៣០៨លានដងត្រូវបានធ្វើឡើង ក្រោយការខកខានរយៈពេលជាង២ឆ្នាំដោយសារវិបត្តិកូវីដ-១៩ ដោយគេសង្កេតឃើញថា សម្ទុះនៃការចំណាយរបស់ពលរដ្ឋចិនបានហក់ងើបឡើងវិញខ្លាំងក្នុងអំឡុងពេលបុណ្យដ៏ធំបំផុតប្រចាំឆ្នាំមួយនេះ។

គិតត្រឹមតែប្រាក់ចំណូលសរុបដែលទទួលបានពីសកម្មភាពទេសចរណ៍ក្នុងស្រុកប៉ុណ្ណោះ ក្នុងអំឡុងពេលថ្ងៃឈប់សម្រាកនៃពិធីបុណ្យចូលឆ្នាំចិន ឆ្នាំ២០២៣ រយៈពេល៦ថ្ងៃ មានចំនួនប្រមាណជា ៣៧៥,៨ ពាន់លានយន់ ឬតូ្រវជា ៥៥,៦ ពាន់លានដុល្លារដែលជាចំនួនមួយស្ថិតក្នុងអត្រាខ្ពស់ និងបានកើនឡើង ៣០ ភាគរយធៀបទៅនឹងឆ្នាំ២០២២ និងប្រមាណជា ៧៣,១ ភាគរយខ្ពស់ជាងឆ្នាំ២០១៩។

បុណ្យចូលឆ្នាំចិន ឬ ហៅថា បុណ្យនានិទាឃរដូវ គឺជាថ្ងៃឈប់សំរាកដ៏សំខាន់បំផុតសំរាប់ជនជាតិចិន និងពលរដ្ឋដែលមានដើមកំណើតកាត់កូនចៅចិន។ ក្រៅតែពីនៅក្នុងប្រទេសចិនផ្ទាល់ហើយនោះ ពិធីបុណ្យនេះ ត្រូវប្រារព្ធឡើងនៅតាមបណ្តាប្រទេសផ្សេងទៀតចាប់ពីអឺរ៉ុបទៅដល់អាស៊ីដែលក្នុងនោះក៏មានទាំងប្រទេសកម្ពុជា សិង្ហបុរីឥណ្ឌូនេស៊ី ម៉ាឡេស៊ី ភីលីពីនិង ថៃ ផងដែរ។

ដោយសារតែចិនមានពលរដ្ឋច្រើន និងមានប្រវត្តិដ៏យូរលង់ណាស់មកហើយផងនោះ បច្ចុប្បន្នការប្រារព្ធពិធីបុណ្យចូលឆ្នាំចិនបានក្លាយទៅជាពិធីបុណ្យដ៏ពេញនិយមរបស់ពិភពលោកបើទោះបីជានៅក្នុងតំបន់អឺរ៉ុបក្តី ដោយសារតែជនជាតិចិន និងអ្នកមានកំណើតកាត់កូនចៅចិនបានរស់នៅស្ទើរគ្រប់ទីកន្លែងទាំងអស់។

ដោយឡែកពលរដ្ឋចិនជាង ១០០០លាននាក់វិញនៅពេលដែលពិធីបុណ្យឈានចូលមកដល់ គេតែងសង្កេតឃើញថា ពួកគេបានត្រៀមរៀបចំខ្លួន និងផ្ទះសំបែងយ៉ាងរួចរាល់ ខណៈដែលជាពេលវេលាប្រារព្ធបានឈានចូលកាន់តែខិតជិតចូលមកដល់ ពោលគឺចាប់ពីថ្ងៃទី២២ ខែមករា និងបន្តរយៈពេលដល់ទៅ១៥ថ្ងៃសម្រាប់ឆ្នាំ២០២៤នេះ។

សកម្មភាពចាយវាយនៅអំឡុងពេលចូលឆ្នាំមានកម្លាំងខ្លាំងបំផុតធៀបទៅនឹងរយៈពេលផ្សេងទៀតជារៀងរាល់ឆ្នាំ ទាំងការធ្វើដំណើរ ការជួបជុំ ការទទួលទានអាហារ ភេសជ្ជៈ និងការចំណាយទៅលើការទិញទំនិញសំភារៈថ្មីៗដាក់ចូលក្នុងផ្ទះ រួមជាមួយនឹងការជូនកាដូជាដើមដោយក្នុងនោះទំហំអាចមានទៅដល់រាប់រយពាន់លានដុល្លារជារៀងរាល់ឆ្នាំ។

នៅពេលពិធីចូលឆ្នាំចិនមកដល់ ពលរដ្ឋចិនបានចំណាយលុយយ៉ាងច្រើនសន្ធឹកសន្ធាប់ទៅលើការទិញសម្លៀកបំពាក់ថ្មីៗ និងគ្រឿងរៀបចំផ្ទះ ខណៈដែលពេលពិធីចូលឆ្នាំមកដល់ពួកគេនឹងត្រូវបន្តចំណាយបន្ថែមទៀតទៅលើការធ្វើដំណើរទៅជួបជុំគ្រួសារ និងការចំណាយទៅលើការទទួលទាន និងភេសជ្ជៈជាដើម។

ក្រៅពីនោះ អ្នកខ្លះត្រូវចំណាយលើការធ្វើដំណើរទៅកំសាន្តតាមគោលដៅទេសចរណ៍សំខាន់ក្នុងស្រុក និងក្រៅស្រុកផងដែរ ដែលក្នុងនោះតំបន់ទាក់ទាញបំផុតសម្រាប់ពលរដ្ឋចិននាពេលចូលឆ្នាំ គឺទីក្រុងប៉េកាំង, ទីក្រុងហុងកុង, ទីក្រុងហាប៊ីន ខណៈដែលតំបន់ទេសចរណ៍ក្រៅប្រទេសវិញ ពលរដ្ឋចិននិយមធ្វើដំណើរទៅកាន់ប្រទេសម៉ាឡេស៊ីប្រទេសថៃ ប្រទេសកម្ពុជា ប្រទេសអាមេរិក ប្រទេសអង់គ្លេស ប្រទេសកាណាដា និងបារាំងផងដែរ។

បន្ថែមលើការចំណាយទាំងនោះ ពលរដ្ឋចិនដល់ទៅជាង ១០០០លាននាក់ ត្រូវការចំណាយដាច់ខាតទៅលើការជូនអាំងប៉ាវឱ្យគ្នាទៅវិញទៅមក ពីព្រោះថាវាគឺជារឿងដែលមិនអាចចោលបានឡើយ ដោយសារតែជំនឿរបស់ពលរដ្ឋចិនបានជឿជាក់ថា ការជូនកាដូអាំងប៉ាវនេះ មិនត្រឹមតែនាំសំណាង និងទ្រព្យសម្បត្តិហូរហៀរជូនគ្នាទៅវិញទៅមកនោះទេ ប៉ុន្តែវាក៏ជាការតំណាងឲ្យការនាំមកនូវសេចក្តីសុខ និងអាយុវែងផងដែរ៕