ភ្នំពេញ ៖ គម្រោង​វិនិយោគចំនួន​ ១៩គម្រោង ដែលមានទុន​ប៉ាន់​ស្មានសរុប​ ២៧៦​លានដុល្លារអាម៉េរិក ត្រូវ​បានរាជរដ្ឋាភិបាល​ផ្ដល់ការ​លើកទឹកចិត្ត​ដើម្បីដំណើការ​វិនិយោគ​នៅខេត្តព្រះសីហនុ ស្រប​តាម​កម្មវិធីពិសេស​ជំរុញការ​វិនិយោគខេត្តព្រះសីហនុ របស់​រាជរដ្ឋាភិបាល ។

ការ​លើកទឹកចិត្តដល់​គម្រោង​វិនិយោគទាំង​១៩​ នេះ ធ្វើឡើង​ក្នុង​កិច្ច​ប្រជុំ​ក្រុមការងារ​ជំរុញការវិនិយោគខេត្តព្រះសីហនុ កាលពីថ្ងៃទី២៤ ខែវិច្ឆិកា ឆ្នាំ២០២៥​ ក្រោមអធិបតីភាពឯកឧត្តម​បណ្ឌិតសភាចារ្យ​ ហ៊ាន សាហ៊ីប រដ្ឋលេខាធិការ​ ក្រសួងសេដ្ឋកិច្ច​ និងហិរញ្ញវត្ថុ និងជា​ប្រធានក្រុមការងារជំរុញការ​វិនិយោគខេត្តព្រះសីហនុ ។

បើតាមសេចក្ដីប្រកាសព័ត៌មានរបស់ក្រុមការងារជំរុញការ​វិនិយោគខេត្តព្រះសីហនុ​ក្រោយកិច្ច​ប្រជុំ​បានឱ្យដឹងថា គម្រោង​វិនិយោគទាំង​១៩ ដែលមានទុនវិនិយោគប៉ាន់ស្មានសរុប ២៧៦ លានដុល្លារអាមេរិកនោះ អាចបង្កើតការងារបានចំនួន​ ១ ៨៤៥ កន្លែង ក្នុងនោះ គម្រោងពាក់ព័ន្ធនឹងអគារកំពុងជាប់គាំងមានចំនួន ៧ និងគម្រោងថ្មី ចំនួន ១២ ។ គម្រោងទំាងនេះ រួមមានគម្រោងសណ្ឋាគារ អគារពហុមុខងារ រោងចក្រផលិតឧបករណ៍ជួសជុលរថយន្ត សិប្បកម្មផលិតក្តារបន្ទះ រោងច្រកផលិតគ្រឿងសង្ហារឹម រោងចក្រផលិតដំណាប់ផ្លែឈើ និង កែច្នៃគ្រាប់ធញ្ញជាតិ និងគម្រោងរោងចក្រផលិតទឹកស្អាត និងផ្គត់ផ្គង់អគ្គិសនី ។

នៅក្នុងកិច្ច​ប្រជុំ​នោះ ឯកឧត្តមបណ្ឌិតសភាចារ្យ បានវាយតម្លៃខ្ពស់ និង ថ្លែងអំណរគុណដល់ក្រុមការងារ ដែលបានបន្តអនុវត្តកម្មវិធីពិសេសនេះ យ៉ាងសស្រាក់សស្រាំ ប្រកបដោយទំនួលខុសត្រូវខ្ពស់ និង ប្រកាន់ខ្ជាប់នូវអភិក្រម «ជវភាពនៃប្រព័ន្ធតួអង្គតែមួយ» ក្នុងរយៈពេលជិត ២ ឆ្នាំកន្លងមកនេះ ។

ជាមួយនេះ ឯកឧត្តមបណ្ឌិតសភាចារ្យ បានគូសបញ្ជាក់អំពីកិច្ចសហការយ៉ាងសកម្ម រវាងក្រសួងស្ថាប័នពាក់ព័ន្ធ ដែលបានបង្កើន និង ពង្រឹងការវិនិយោគនៅក្នុងខេត្តព្រះសីហនុ តាមរយៈការងារគន្លឹះចំនួន ៤ ៖ ១). ការលើកទឹកចិត្តផ្នែកពន្ធ និង ការសម្របសម្រួលផ្នែករដ្ឋបាល, ២). ការជំរុញការវិនិយោគប្រកបដោយគុណភាព, ៣). ការប្រើប្រាស់កម្លាំងពលកម្មក្នុងស្រុក និង ការផ្ទេរជំនាញ, និង ៤). ការប្រើប្រាស់វត្ថុធាតុដើមក្នុងស្រុក ។ លើសពីនេះ, ឯកឧត្តមបណ្ឌិតសភាចារ្យ បានគូសបញ្ជាក់អំពីចំណុចពិសេស នៃកម្មវិធីពិសេសរបស់រាជរដ្ឋាភិបាល ដែលត្រូវអនុវត្តជាគំរូ សម្រាប់ទាក់ទាញ និង ថែទាំវិនិយោគ ដើម្បីចូលរួមចំណែកអភិវឌ្ឍខេត្តព្រះសីហនុ ឱ្យក្លាយទៅជាទីតាំងវិនិយោគពហុបំណង និង ប្រកបដោយយុទ្ធសាស្ត្រ ។

លោក វ៉ាន់ ធី ភ្នាក់ងារអចលនទ្រព្យ​មួយរូប​ប្រចាំខេត្តព្រះសីហនុ បានឱ្យដឹងថា​ ចាប់តាំងពី​រាជរដ្ឋាភិបាល​បានដាក់ដំណើរការ​នូវកម្មវិធីពិសេសជំរុញការ​វិនិយោគ​ខេត្តព្រះសីហនុ ឃើញ​មានគម្រោងជាច្រើន ទាំង​គម្រោង​ជាប់គាំង និងគម្រោង​ថ្មីៗ ចាប់ផ្ដើម​ដំណើរការ​វិនិយោគ ដោយ​ក្នុងនោះបានកត់សម្គាល់ឃើញថាតំបន់​ក្នុងក្រុង​មានការ​វិនិយោគលើសំណង់​អគារ​ រួមមាន​សណ្ឋាគារ អគារ​ខ្ពស់ៗ ចំណែកនៅ​តំបន់​ជាយក្រុង​មានការ​វិនិយោគលើ​តំបន់​សេដ្ឋកិច្ច​ពិសេស រោងចក្រ​ សហគ្រាស​ជាដើម ។​ ជាក់ស្ដែង​តំបន់​មួយចំនួន​នៅជាយ​ក្រុង​មានការ​ចាប់អារម្មណ៍​បង្កើតតំបន់​សេដ្ឋកិច្ច​ពិសេស​ថ្មីៗជា​បន្ត​បន្ទាប់​​ ដូចជា​ ស្រុកស្ទឹងហាវ​ ស្រុកព្រៃនប់​ ក្រុងកំពង់សោម​ជាដើម​។

ចាប់តាំងពីឆ្នាំ ២០២៤ រហូតដល់ខែ តុលា ឆ្នាំ ២០២៥ ក្រុមការងារកម្មវិធីពិសេសជំរុញការ​វិនិយោគ​ខេត្តព្រះសីហនុ បានសម្រេចជាគោលការណ៍ផ្តល់ការលើកទឹកចិត្តពិសេស ជូនគម្រោងចំនួន ៣៩២ ដែលមានទុនវិនិយោគប៉ាន់ស្មានសរុប ៧ ៨៧១ លានដុល្លារអាមេរិក និង ប៉ាន់ស្មានអាចបង្កើតការងារបាន ៥០ ៦៧០ កន្លែង ក្នុងនោះ គម្រោងពាក់ព័ន្ធនឹងអគារកំពុងជាប់គាំងមាន ចំនួន ១៨៦, គម្រោងថ្មីមាន ចំនួន ១៦៦, គម្រោងពង្រីកមានចំនួន ២៥ និង គម្រោងមានស្រាប់ចំនួន ១៥ ៕