ភ្នំពេញ ៖ យោងតាមរបាយការណ៍របស់រដ្ឋលេខាធិការដ្ឋានអាកាសចរណ៍ស៊ីវិលកម្ពុជាបានឱ្យដឹងថា ក្នុងអំឡុងត្រីមាសទីមួយនៃឆ្នាំ២០២៣ កន្លងទៅនេះ ប្រទេសកម្ពុជាមានអ្នកដំណើរតាមផ្លូវអាកាសចំនួន ១,២៦លាននាក់ កើនឡើង ៥៤៩ភាគរយ ធៀបទៅនឹងរយៈពេលដូចគ្នាកាលពីឆ្នាំកន្លងទៅដែលមានត្រឹមចំនួន ១៩៥,០០០នាក់ ប៉ុណ្ណោះ។

តាមរយៈរបាយការណ៍ដដែលនេះបានបង្ហាញថា ក្រុមហ៊ុនអាកាសចរណ៍ជាតិ និងអន្តរជាតិបានដំណើរការជើងហោះហើរចំនួន ១២ ០៩១ ទៅកាន់អាកាសយានដ្ឋានអន្តរជាតិចំនួន៣ របស់ព្រះរាជាណាចក្រកម្ពុជា ក្នុងអំឡុងពេលពីខែមករាដល់ខែមីនាឆ្នាំ២០២៣នេះ កើនឡើង ១៩៩ភាគរយ ពីជើងហោះហើរចំនួន ៤,០៤៣ ក្នុងរយៈពេលដូចគ្នាកាលពីឆ្នាំមុន។

ឯកឧត្តម ស៊ិន ចាន់សេរីវុត្ថា អនុរដ្ឋលេខាធិការដ្ឋាន និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល បានមានប្រសាសន៍ថា ប្រទេសកម្ពុជាត្រូវបានព្យាករណ៍ថានឹងទាក់ទាញអ្នកដំណើរតាមផ្លូវអាកាសប្រមាណ ៤,៦ លាននាក់នៅឆ្នាំនេះ ដែលរំពឹងថានឹងកើនឡើងយ៉ាងខ្លាំងពី ២,៣៨ លាននាក់កាលពីឆ្នាំមុន។

ឯកឧត្តម ស៊ិន ចាន់សេរីវុត្ថា បានមានប្រសាសន៍ថា ៖

“សម្រាប់ឆ្នាំ២០២៣ យើងព្យាករណ៍ថាចំនួនអ្នកដំណើរតាមផ្លូវអាកាសនឹងកើនឡើងទ្វេដងដោយសារវិធានការបន្ធូរបន្ថយកូវីដ-១៩ និងការបើកដំណើរការឡើងវិញរបស់ប្រទេសចិន។ អ្នកដំណើរដែលបានហោះហើរមកកម្ពុជា គឺមកពីប្រទេសថៃ វៀតណាម មីយ៉ាន់ម៉ា ហ្វីលីពីន ម៉ាឡេស៊ី សឹង្ហបុរី ឡាវ ចិន កូរ៉េខាងត្បូង តៃវ៉ាន់ និងហុងកុង”

សម្រាប់ក្នុងខែមីនាកន្លងទៅនេះ អ្នកដំណើរមកពីប្រទេសចិន ​មានចំនួន ៤១ ០៦៤ នាក់ កើនឡើង ៣៤% និងចំនួនជើងហោះហើរកើនឡើងដល់ ៤១០ ជើង កើន ២៩%។ បើធៀបនឹងខែកុម្ភៈ ឆ្នាំ២០២៣ អ្នកដំណើរមកពីប្រទេសថៃ ប្រហាក់ប្រហែលនឹងខែមុន ក្នុងចំនួន១០៣ ៣៧៨ នាក់។ មកពីប្រទេសវៀតណាម មានចំនួន ៣៥ ២៥៩ នាក់ កើនឡើង ២៧%, មកពីប្រទេសមីយ៉ាន់ម៉ា មានចំនួន ១៣៦៥ នាក់ កើនឡើង៤៨%, មកពីប្រទេសហ្វីលីពីន មានចំនួន ៤ ៨៩៥ នាក់ កើនឡើង១១%, មកពីម៉ាឡេស៊ី មានចំនួន ៣៦ ៨៩១នាក់ កើនឡើង ១៤% ,មកពីប្រទេសសិង្ហបុរី ​មានចំនួន ៤៣ ៨៩៧ នាក់ កើនឡើង ៥% , មកពីប្រទេសកូរ៉េខាងត្បូង មានចំនួន ២៤៨២០ កើនឡើង ២០%​, មកពីតៃវ៉ាន់ មានចំនួន ១៤ ៥៩១ នាក់ កើនឡើង ២% និងមកពីតំបន់ពិសេសហុងកុង មានចំនួន ៥ ៥០៨ នាក់ថយចុះ១% ។

ឯកឧត្តម ស៊ិន ចាន់សេរីវុត្ថា បានឱ្យដឹងដែរថា វិស័យអាកាសចរណ៍បានបង្កើតការងារដោយផ្ទាល់ និងដោយប្រយោលចំនួន ១,៧ លានកន្លែង ហើយបានរួមចំណែកជិត ១៧ភាគរយដល់ផលិតផលក្នុងស្រុកសរុបរបស់ប្រទេស។ សូមបញ្ជាក់ថា នៅពេលឆាប់ៗខាងមុខនេះ វិស័យទេសចរណ៍កម្ពុជា នឹងមានសមិទ្ធផលថ្មីៗបន្ថែមទៀត រួមមាន អាកាសយានដ្ឋានអន្តរជាតិសៀមរាបអង្គរថ្មីគ្រោងនឹងបើកសម្ពោធនៅថ្ងៃទី២៣ ខែតុលា ឆ្នាំ២០២៣ខាងមុខនេះ។ អាកាសយានដ្ឋានអន្តរជាតិ ភ្នំពេញ​​តេជោ នឹងត្រូវសម្ពោធដាក់ឲ្យប្រើប្រាស់នៅឆ្នាំ២០២៤។ ដោយឡែកអាកាសយានដ្ឋានអន្តរជាតិតារាសាគរអង្គរ គ្រោងនឹងសម្ពោធនៅចុងឆ្នាំ២០២៤ ជាព្រលានយន្តហោះប្រភេទ 4E ដែលមានលេខកូដ ICAO VDDS និងលេខកូដ IATA ឈ្មោះ DYSA ដែលនឹងបម្រើអ្នកដំណើររហូតដល់ទៅ៧លាននាក់ក្នុងមួយឆ្នាំ៕