សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្រោយការបោះឆ្នោត និងរៀបចំរាជរដ្ឋាភិបាលថ្មីរួចរាល់ មន្ត្រីរាជរដ្ឋាភិបាលកម្ពុជារួមទាំងថ្នាក់ដឹកនាំជាច្រើនទៀតបានចាប់ផ្ដើមធ្វើសកម្មភាពដើម្បីដឹកនាំប្រទេសក្នុងការទាក់ទាញវិនិយោគិនពីបរទេស។ ជាការកត់សម្គាល់មន្ត្រីជាន់ខ្ពស់រាជរដ្ឋាភិបាលបានទៅប្រទេសកូរ៉េខាងត្បូងដើម្បីជួបវិនិយោគិននៅទីនោះ ហើយជាលទ្ធផលមានក្រុមហ៊ុនកូរ៉េចំនួន ៣៥ ក្រុមហ៊ុនមានបំណងមកវិនិយោគនៅក្នុងប្រទេសកម្ពុជា ។
ឯកឧត្តម យឹម ស៊ីណន រដ្ឋលេខាធិការក្រសួងការងារ និងបណ្ដុះបណ្ដាល វិជ្ជាជីវៈ បានមានប្រសាសន៍ថា កាលពីសប្ដាហ៍កន្លងទៅនេះ នៅក្នុងវេទិកាធុរកិច្ចមួយនៅក្នុងប្រទេសកូរ៉េ មានក្រុមហ៊ុនឯកជនជាច្រើនចូលរួម ហើយក្នុងនោះក៏មានក្រុមហ៊ុនប្រមាណ ៣៥ ក្រុមហ៊ុន បានបង្ហាញពីគោលបំណងក្នុងការចូលមកកម្ពុជាដើម្បីបណ្ដាក់ទុនវិនិយោគ លើការកែច្នៃ និងនាំចូលទៅកាន់ប្រទេសកូរ៉េវិញ។
ឯឧត្តមបន្តថា ប្រតិភូពីកម្ពុជា បានបង្ហាញពីឱកាសល្អៗដល់វិនិយោគិនកូរ៉េ ដើម្បីទាក់ទាញពួកគេឱ្យចូលមកវិនិយោគនៅក្នុងប្រទេសកម្ពុជា ដូចជាការកែច្នៃផលិតផលកសិកម្ម ហើយនាំចេញទៅប្រទេសកូរ៉េវិញតាមរយៈកិច្ចព្រមព្រៀងពាណិជ្ជកម្មសេរីដែលបានចុះកិច្ចព្រមព្រៀងជាមួយគ្នារួចហើយ និងប្រទេសជាដៃគូរបស់កម្ពុជាជាច្រើនទៀត ។
ឯកឧត្តមបន្ថែមថា បើតាមអ្វីដែលក្រុមហ៊ុនរបស់កូរ៉េបានលើកឡើងនោះ នៅអំឡុងខែតុលាឆ្នាំ ២០២៣ខាងមុខនេះ ក្រុមហ៊ុនកូរ៉េទាំងនោះ នឹងចុះមកកម្ពុជា ដើម្បីសិក្សាពីសក្ដានុពល និងសិក្សាពីការវិនិយោគរបស់ពួកគេនៅម្ពុជា ទៅតាមជំនាញរៀងៗខ្លួន។
ឯកឧត្តមបានបញ្ជាក់ថា ៖
« ក្រុមហ៊ុនដែលចាប់អារម្មណ៍មកបណ្ដាក់វិនិយោគនៅកម្ពុជាទាំង៣៥នោះភាគច្រើនគឺជាក្រុមហ៊ុនជំនាញកសិកម្ម ជាពិសេសកសិកម្មបែបទំនើប ដែលការបណ្ដាក់ទុនវិនិយោគរបស់ក្រុមហ៊ុនកូរ៉េនេះដែរ នឹងនាំមកនូវជំនាញនិងបទពិសោធន៍ពីកូរ៉េមកដល់ប្រជាជនកម្ពុជា » ។
គួររំលឹកដែរថា សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា កាលពីពេលកន្លងទៅថ្មីៗនេះ ថ្នាក់ដឹកនាំប្រទេសបានចេញទៅក្រៅប្រទេសដើម្បីចរចាទាក់ទាញវិនិយោគិនពីបរទេសចូលមកកម្ពុជា ដូច្នេះ សម្រាប់ថ្នាក់ដឹកនាំតាមមូលដ្ឋាន គួរតែជួយទាក់ទាញបន្តនៅពេលវិនិយោគិនបរទេសមកកម្ពុជា ជាពិសេសនៅតាមបណ្ដារាជធានី ខេត្តនានាទូទាំងប្រទេស ដូចជាការបង្ហាញពីសក្ដានុពលនូវអ្វីដែលយើងមានដល់វិនិយោគិនបរទេសដើម្បីឱ្យគេពិចារណាមកបណ្ដាក់ទុនក្នុងប្រទេសម្ពុជា ។
Account
Security
Favourite Content