បរទេស៖ ក្រុមហ៊ុនធំៗរបស់កូរ៉េខាងត្បូងបានប្រកាសពីផែនការវិនិយោគថ្មីៗក្នុងស្រុកដែលមានទុនរាប់ពាន់លានដុល្លារ ដើម្បីឲ្យមានតុល្យភាពជាមួយនឹងការវិនិយោគនៅក្នុងឧស្សាហកម្មអាម៉េរិក នេះបើយោងតាមការរាយការណ៍ពី CNBC។

កាលពីថ្ងៃអាទិត្យ ប្រធានាធិបតីកូរ៉េខាងត្បូង លោក Lee Jae Myung បានជួបប្រជុំជាមួយនឹងក្រុមហ៊ុនធំៗក្នុងស្រុក បន្ទាប់ពីរដ្ឋាភិបាលរបស់លោកបានបញ្ចប់កិច្ចព្រមព្រៀងពាណិជ្ជកម្មជាមួយសហរដ្ឋអាម៉េរិក។ ទីក្រុងសេអ៊ូល បានសន្យាថានឹងវិនិយោគ ៣៥០ ពាន់លានដុល្លារនៅក្នុងឧស្សាហកម្មអាម៉េរិកជាថ្នូរនឹងការកាត់បន្ថយពន្ធរបស់រដ្ឋបាល Trump ។ យ៉ាងណាមិញ ក្រុមហ៊ុនធំៗក្នុងស្រុកបានប្តេជ្ញាជំរុញការវិនិយោគបន្ថែមទៀតនៅក្នុងប្រទេសកូរ៉េខាងត្បូង​ ដើម្បីកាត់បន្ថយក្តីបារម្ភពីការវិនិយោគនៅអាម៉េរិកច្រើនជាងក្នុងស្រុក។

ក្រុមហ៊ុន Samsung ប្រកាសអំពីគម្រោងវិនិយោគ ៤៥០ ទ្រីលានវ៉ុន (៣១០ ពាន់លានដុល្លារ) ក្នុងរយៈពេល ៥ ឆ្នាំខាងមុខ ដើម្បីពង្រីកប្រតិបត្តិការក្នុងស្រុករបស់ខ្លួន ព្រមទាំងកសាងខ្សែសង្វាក់ផលិតកម្មមួយផ្សេងទៀតនៅមជ្ឈមណ្ឌលផលិត Pyeongtaek សម្រាប់បំពេញតម្រូវការអេឡិចត្រូនិកពិភពលោក។ លើសពីនេះ Samsung ក៏មានគម្រោងសាងសង់មជ្ឈមណ្ឌលទិន្នន័យ AI នៅក្នុងខេត្ត Jeolla និងទីក្រុង Gumi ផងដែរ ដើម្បីគាំទ្រដល់កិច្ចខិតខំប្រឹងប្រែងរបស់រដ្ឋាភិបាលក្នុងការកាត់បន្ថយគម្លាតអភិវឌ្ឍន៍រវាងទីក្រុងសេអ៊ូល និងតំបន់ផ្សេងទៀត។

ក្រុមហ៊ុនផលិតរថយន្តធំជាងគេរបស់កូរ៉េខាងត្បូង Hyundai Motor បានប្រកាសពីគម្រោងវិនិយោគតម្លៃ ១២៥ ទ្រីលានវ៉ុន (៨៦,៣ ពាន់លានដុល្លារ) ពីឆ្នាំ២០២៦ ដល់ឆ្នាំ ២០៣០ ដើម្បីពង្រីកការស្រាវជ្រាវ និងការអភិវឌ្ឍន៍ក្នុងស្រុកក្នុងគោលបំណងជំរុញបច្ចេកវិទ្យាថ្មីៗ ដូចជា បញ្ញាសិប្បនិមត្តិ (AI) មនុស្សយន្ត និងរថយន្តស្វ័យបើកបរដោយខ្លួនឯងជាដើម។ លើសពីនេះ ក្រុមហ៊ុនធំៗផ្សេងទៀតដូចជា រោងចក្រថាមពល SK Group, ក្រុមហ៊ុនសាងសង់នាវា Hanwha Ocean, និង ក្រុមហ៊ុន HD Hyundai ក៏បានប្រកាសពីផែនការបង្កើនការវិនិយោគក្នុងស្រុករបស់ពួកគេផងដែរ។

នៅក្នុងជំនួបជាមួយប្រធានក្រុមហ៊ុនធំៗទាំងនោះ ប្រធានាធិបតីកូរ៉េខាងត្បូង លោក Lee Jae Myung បានសរសើរដល់វិស័យធុរកិច្ច ដែលមិនត្រឹមតែជួយរដ្ឋាភិបាលចរចាកិច្ចព្រមព្រៀងពាណិជ្ជកម្មជាមួយទីក្រុងវ៉ាស៊ីនតោនប៉ុណ្ណោះទេ ប៉ុន្តែថែមទាំងរក្សាភាពរឹងមាំលើការវិនិយោគក្នុងស្រុក ដើម្បីបន្ធូរបន្ថយក្ដីព្រួយបារម្ភថា ពួកគេអាចវិនិយោគនៅបរទេសច្រើនជាងក្នុងស្រុក។ ទន្ទឹមនឹងនេះ រដ្ឋាភិបាលរបស់លោកកំពុងស្វែងរកគោលនយោបាយផ្សេងៗ និងការបន្ធូរបន្ថយបទប្បញ្ញត្តិ ដើម្បីជួយបង្កើតបរិយាកាសធុរកិច្ចកាន់តែអំណោយផលសម្រាប់ក្រុមហ៊ុនទាំងនេះ៕