បរទេស ៖ យោងតាមប្រភពព័តមានពី Xinhua បានរាយការណ៍ថា ឡាវ មានគោលបំណងលើកកម្ពស់ផលិតកម្មកសិកម្មរបស់ខ្លួនប្រកបដោយនិរន្តរភាព តាមរយៈការលើកទឹកចិត្តកសិករ និងអ្នកផលិត បង្កើនគុណភាព ដើម្បីជំរុញការនាំចេញកសិផលទៅកាន់ប្រទេសចិនតាមរយៈផ្លូវដែកចិន-ឡាវដែលទើបបើកដំណើរការជាផ្លូវការកាលពីពេលថ្មីៗកន្លងទៅនេះ។

ជាមួយនឹងផែនការរបស់រដ្ឋាភិបាលដូចបានលើកឡើងខាងលើនេះ ពលរដ្ឋឡាវដែលជាកសិករ ក៏ដូចជាអ្នកផលិតកសិផលបានលើកឡើងថា ផ្លូវដែកចិន-ឡាវ ពិតជាមានតួនាទីយ៉ាងសំខាន់ក្នុងការជំរុញការនាំចេញ ដោយសារផ្លូវដែកមានភាពងាយស្រួលក្នុងការដឹកជញ្ជូនផលិតផលកសិកម្ម ជាពិសេសផលិតផលស្រស់ៗ។ ពួកគេជឿជាក់ថា ប្រសិនបើផលិតផលរបស់ពួកគេបំពេញតាមស្តង់ដារគុណភាពសម្រាប់ការនាំចេញទៅកាន់ប្រទេសចិនបាននោះ ពួកគេនឹងរកប្រាក់ចំណូលបានច្រើន ដោយសារចិនគឺជាប្រទេសមានទីផ្សារដ៏ធំ។

គួររំលឹកថា កាលពីខែតុលា ឆ្នាំ២០២៤កន្លងទៅនេះ ឡាវ បាននាំចេញផ្លែចេកចំនួន ៣៩០ តោន តាមរយៈរថភ្លើងដែលធ្វើដំណើរពីរដ្ឋធានីវៀងចន្ទន៍ ទៅកាន់ទីក្រុងគុនមីង និងបន្តទៅកាន់តំបន់ Pinggu នៃទីក្រុងប៉េកាំង ប្រទេសចិន។

លោក Phonesak Jaliya អាជីវករ​លក់​ផ្លែ​ឈើ​នៅ​ទីក្រុង​វៀងចន្ទន៍ បានលើកឡើងថា ពាណិជ្ជករចិនជាច្រើនបានបង្ហាញពីចំណាប់អារម្មណ៍លើការដាំទុរេននៅក្នុងប្រទេសឡាវ ដើម្បីបំពេញតម្រូវការផ្លែឈើក្នុងចំណោមអ្នកប្រើប្រាស់ចិន ហើយនេះគឺជាឱកាសមាសសម្រាប់ឡាវ​ដើម្បី​ទទួល​បាន​ផល​ប្រយោជន៍​ពី​ទីផ្សារ​ចិន។ បន្ថែមពីនេះ ឡាវ មានធនធានធម្មជាតិច្រើន ជាមួយនឹងដីដែលមានភាពសមរម្យសម្រាប់ការដាំដុះដ៏មានសក្តានុពលសម្រាប់ប្រទេសចិន។

គួររំលឹកថា កាលពីពេលថ្មីៗនេះ សភាពាណិជ្ជកម្ម និងឧស្សាហកម្មជាតិឡាវ (LNCCI) និងក្រុមធុរកិច្ចចិន បានរៀបចំកិច្ចប្រជុំមួយដើម្បីស្វែងយល់ពីសក្តានុពលនៃដំណាំទុរេនរបស់ឡាវសម្រាប់ការនាំចេញទៅកាន់ប្រទេសចិន។ នៅក្នុងជំនួបជាមួយក្រុមធុរកិច្ចចិន Bounleuth Luangpaseuth អនុប្រធាន LNCCI បានលើកឡើងពីភាពរីកចម្រើនយ៉ាងឆាប់រហ័សនៃការដាំដុះទុរេននៅលើដីកសិកម្មដែលមានជីជាតិ។ លើសពីនេះ រដ្ឋាភិបាលឡាវ និងចិនបានវិនិយោគយ៉ាងច្រើនក្នុងការអភិវឌ្ឍន៍ហេដ្ឋារចនាសម្ព័ន្ធ ជាពិសេសផ្លូវដែកចិន-ឡាវ ដែលជំរុញឲ្យផលិតផលឡាវអាចបញ្ជូនទៅកាន់ទីផ្សារធំៗនៅប្រទេសចិន។ បន្ថែមពីនេះ រដ្ឋាភិបាលឡាវក៏បានយកចិត្តទុកដាក់លើការកែលម្អច្បាប់ និងបទប្បញ្ញត្តិពាក់ព័ន្ធផងដែរ ដើម្បីជំរុញដល់ការផលិត ការកែច្នៃ និងការនាំចេញផលិតផលកសិកម្មឲ្យកាន់តែខ្លាំងក្លា។

គួរឲ្យបញ្ជាក់ដែរថា កាលពីឆ្នាំ ២០២៣ ឡាវរកចំណូលពីការនាំចេញកសិផលបានជាង ១,៤ ពាន់លានដុល្លារអាមេរិក ខណៈដែលតម្លៃនៃផលិតកម្មក្នុងវិស័យកសិកម្ម និងព្រៃឈើមានចំណែក ២១,៤ ភាគរយនៃផលិតផលក្នុងស្រុកសរុប (GDP) របស់ឡាវ។ បច្ចុប្បន្ននេះ រដ្ឋាភិបាលឡាវ កំពុងលើកទឹកចិត្តកសិករ និងអ្នកផលិតអោយផ្គត់ផ្គង់ទំនិញកាន់តែច្រើនទៅកាន់ទីផ្សារក្នុងស្រុក និងផលិតកាន់តែច្រើនសម្រាប់ការនាំចេញ ដើម្បីទទួលបាននូវរូបិយប័ណ្ណបរទេសឲ្យកាន់តែច្រើន និងជួយកាត់បន្ថយអត្រាប្តូរប្រាក់បរទេសខ្ពស់៕