សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ កន្លងមកនេះ យើងធ្លាប់បានតាមដានខ្លះរួចមកហើយអំពីប្រធានបទក្តៅនៃបញ្ហារ៉ែកម្រដែលកំពុងបង្កភាពតានតឹងផ្នែកពាណិជ្ជកម្មរវាងប្រទេសមហាអំណាចធំៗ ដូចជា សហរដ្ឋអាម៉េរិក ចិននិងរុស្ស៊ីផង។ រ៉ែកម្រ ត្រូវបានគេចាត់ទុកថាជាចំណុចស្នូលដ៏សំខាន់នៃបញ្ហាជម្លោះកាទូតផង និងជម្លោះពាណិជ្ជកម្មផងនាពេលបច្ចុប្បន្ននេះ ជាពិសេស រវាងប្រទេសមហាអំណាចផ្នែកបច្ចេកវិទ្យា ពីព្រោះថាវាគឺជាវត្ថុធាតុដើមដ៏ចាំបាច់ចូលរួមក្នុងឧស្សាហកម្មផលិតសព្វាវុធនៅក្នុងវិស័យយោធាផង វិស័យផលិតរថយន្តផង និងឧស្សាហកម្មផលិតឧបករណ៍អេឡិចត្រូនិកគ្រប់ប្រភេទ។
តើរ៉ែកម្រមានចំនួនកំណត់ដែរឬទេ និងមានប៉ុន្មានប្រភេទ?
បច្ចុប្បន្ន ក្រុមប្រភេទនៃរ៉ែកម្រសរុបដែលត្រូវបានកំណត់មានចំនួន១៧ក្រុម ដែលសុទ្ធតែជាប្រភេទអាចបញ្ចេញសារធាតុបំពុលខ្ពស់ទៅក្នុងបរិយាកាស និងមនុស្សជាតិ (heavy metal)។ ក្រុមអ្នកជំនាញអាម៉េរិកមកពី The United States Geological Survey កាលពីឆ្នាំ២០២៤ បានធ្វើការប៉ាន់ស្មានថា ពិភពលោកទាំងមូលអាចមានវត្តមានរ៉ែកម្រសរុបបញ្ចូលគ្នា់ប្រមាណជា១១០លានតោន ដែលក្នុងនោះចិនមានច្រើនជាងគេបំផុតដល់ទៅ ៤៤លានតោន។
ចិន បច្ចុប្បន្នបានក្លាយជាប្រទេសដែលទាញយករ៉ែកម្របានច្រើនជាងគេបំផុត ខណៈដែលប្រទេសដែលមានប្រភពរ៉ែកម្រច្រើនផ្សេងទៀតបន្ទាប់ពីចិន ដូចជា ប្រទេសវៀតណាម ប្រេស៊ីល រុស្ស៊ី និងប្រទេសឥណ្ឌា នៅមិនទាន់មានសកម្មភាពមមាញឹកនៅឡើយ។ ទោះបីជាយ៉ាងណាក្តី ដំណើរការនៃការរុករករ៉ែ ការជីកយករ៉ែ ឈានទៅដល់ការកែច្នៃ គឺពិតជាមានផលលំបាកខ្លាំងណាស់សម្រាប់បណ្តាប្រទេសមួយចំនួនដែលខ្វះលទ្ធភាព ទាំងបច្ចេកទេស និងហិរញ្ញវត្ថុ។ រ៉ែកម្រ ត្រូវការវិធីសាស្ត្របែបគិមីសាស្ត្រដែលអាចបង្កផលប៉ះពាល់ និងបញ្ចេញជាតិពុលខ្ពស់។ កាកសំណល់ដែលបញ្ចេញពីប្រតិបត្តិការនេះក៏ចាំបាច់ត្រូវការគ្រប់គ្រងដែលមានបច្ចេកវិទ្យាទំនើប និងចំណាយលុយច្រើន ។
សម្រាប់មហាយក្សចិន នៅក្នុងចក្ខុវិស័យនៃការទាញយក និងកែច្នៃរ៉ែកម្រនេះ មានរយៈពេលយូរទសវត្សរ៍មកហើយ ដោយក្នុងនោះ ក្រុងប៉េកាំង បានចំណាយពេល និងទំហំថវិកាវិនិយោគ ដើម្បីអភិវឌ្ឍបច្ចេកវិទ្យាទំនើបៗក្នុងការទាញយករ៉ែទាំងនេះ។ ជាលទ្ធផល ចិន បានដើរមុនបានមួយជំហ៊ានដ៏ធំមុនគេក្នុងការទិញយកប៉ាតង់ ឬសិទ្ធិ ក្នុងបច្ចេកវិទ្យាទាញយករ៉ែ និងការផលិតរ៉ែកម្រមួយចំនួនផងដែរ។
ដូច្នេះ ចំពោះបណ្តាប្រទេសដែលមានប្រភពធនធានរ៉ែកម្រ ចាំបាច់ត្រូវតែបញ្ជូនរែ់ទាំងនោះទៅកាន់ប្រទេសចិន ដើម្បីកែច្នៃ។ ទាំងនេះ គឺជាកត្តាដ៏សំខាន់ដែលធ្វើឱ្យពិភពលោកពឹងផ្អែកយ៉ាងខ្លាំងទៅលើបច្ចេកទេស និងបច្ចេកវិទ្យារបស់ចិន ដើម្បីទទួលបានការផ្គត់ផ្គង់រ៉ែកម្រឲ្យមាននិរន្តភាព៕
Account
Security
Favourite Content