សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទំហំឥណទានដែលគ្រឹះស្ថានធនាគារ និងហិរញ្ញវត្ថុ បានផ្ដល់ជូនពលរដ្ឋសម្រាប់ទិញលំនៅឋាន បានកើនឡើងជិតដល់ ៨ពាន់លានដុល្លារអាមេរិកគិតត្រឹមចុងត្រមាសទី៤ ឆ្នាំ២០២៤ ។ នេះបើតាមរបាយការណ៍របស់ក្រុមហ៊ុនការិយាល័យឥណទានកម្ពុជា ហៅកាត់ថា (CBC ) ចេញផ្សាយនៅថ្ងៃទី៣០ ខែមករា ឆ្នាំ២០២៥ ។
បើតាមរបាយការណ៍នេះបានឱ្យដឹងថា នៅដំណាច់ឆ្នាំ២០២៤ កន្លងទៅនេះ ទំហំឥណទានដែលគ្រឹះស្ថានធនាគារ និងហិរញ្ញវត្ថុ បានផ្ដល់ជូនអតិថិជនរបស់ខ្លួនជាឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានចំនួន ១៥,៥៣ពាន់លានដុល្លារអាមេរិក ក្នុងនោះឥណទានសម្រាប់ទិញផ្ទះមានប្រមាណ ៥១,២៥ភាគរយ ឬប្រមាណ ៧,៩៥ពាន់លានដុល្លារអាមេរិក ។ ក្រៅពីនោះមានកម្ចីសម្រាប់ប្រើប្រាស់ផ្ទាល់ខ្លួន មាន ៤៧,៣៦ភាគរយ ត្រូវជាប្រមាណ ៧,២២ពាន់លានដុល្លារអាមេរិក ។
របាយការណ៍ដដែលនេះបានឱ្យដឹងថា នៅក្នុងដំណាច់ឆ្នាំ២០២៤ ចំនួនគណនីឥណទានលក្ខណៈបុគ្គលមានចំនួន ២,០៤លានគណនី ហើយក្នុងនោះឥណទានសម្រាប់ទិញផ្ទះមានចំនួន ១០,០១ភាគរយដែលស្មើនឹងប្រមាណជាង២០ម៉ឺនគណនី ។ ដោយឡែកឥណទានសម្រាប់ប្រើប្រាស់ផ្ទាល់ខ្លួនមានរហូតដល់ ៨១,៩៣ភាគរយ ឬប្រមាណ ១,៦៧លានគណនី ។
សូមរម្លឹកថា ថ្មីៗនេះ ក្រសួងរៀបចំដែនដី នគរូបនីយកម្ម និងសំណង់ បានពិភាក្សាជាមួយបណ្ដាធនាគារជាច្រើន ដើម្បីពិនិត្យលទ្ធភាពក្នុងការបញ្ចុះអត្រាការប្រាក់សម្រាប់ឥណទានទិញផ្ទះ ឬបើអាចសុំឱ្យធនាគារ និងហិរញ្ញវត្ថុ ផ្ទេរឥណទានពីម្ចាស់បុរីដែលមានការប្រាក់ខ្ពស់ទៅធនាគារដែលមានអត្រាការប្រាក់ទាបវិញ ។
ឯកឧត្តម សាយ សំអាល ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ធ្លាប់បានមានប្រសាសន៍ថា ការបញ្ចុះអត្រាការប្រាក់ពីសំណាក់ម្ចាស់បុរី ឬធនាគារមកនៅទាប អាចធ្វើឱ្យអ្នកទិញផ្ទះដែលកំពុងបង់រំលស់ជាមួយបុរី ឬជាមួយធនាគារអាចមានលទ្ធភាពក្នុងចំណាយប្រចាំថ្ងៃបានប្រសើរ ហើយអតិថិជនក៏អាចសល់លុយខ្លះដើម្បីប្រើប្រាស់ទៅលើការចំណាយផ្សេងទៀត ។ ប៉ុន្តែបើសិនជាអត្រាការប្រាក់ខ្ពស់ ចំណូលដែលរកបានប្រចាំខែគឺសម្រាប់តែបង់ទៅលើរំលស់ផ្ទះប៉ុណ្ណោះ ដែលពិបាកនឹងធ្វើឱ្យមានការចាយវាយទៅលើកត្តាផ្សេងៗ ។
ឯកឧត្តម ជូ វណ្ណៈ អគ្គនាយកនិយ័តករអាជីវកម្មអចលនវត្ថុ និងបញ្ចាំ ធ្លាប់បានលើកឡើងដែរថា បច្ចុប្បន្ននេះ ពលរដ្ឋ ឬអតិថិជនដែលបានទិញផ្ទះពីម្ចាស់បុរី ឬអ្នកអភិវឌ្ឍន៍លំនៅឋានដែលមានអាជ្ញាបណ្ណពីនិយតករអាជីវកម្មអចលនវត្ថុ និងបញ្ចាំ ដែលកំពុងបង់រំលស់ប្រចាំខែ មានទំហំទឹកប្រាក់ជាង ១ពាន់លានដុល្លារអាមេរិក និងមិនទាន់រាប់បញ្ចូលចំពោះអតិថិជនដែលទិញផ្ទះ ដោយខ្ចីលុយធនាគារ ឬមីក្រូហិរញ្ញវត្ថុ ឬខ្ចីលុយពីបងប្អូនមកប្រើប្រាស់នៅឡើយ ៕
Account
Security
Favourite Content