សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ខេត្តព្រះវិហារ៖ អគ្គនាយកធនាគារអភិវឌ្ឍន៍ជនបទ និងកសិកម្ម (ARDB) បានណែនាំឱ្យកសិករនៅស្រុករវៀង ខេត្តព្រះវិហារ ពិនិត្យឡើងវិញពីប្រសិទ្ធភាពនៃការធ្វើស្រែ ដោយប្រសិនបើធ្វើស្រែជាបន្តបន្ទាប់ ប៉ុន្តែមិនទទួលបានផលចំណេញ គួរពិចារណាប្រែក្លាយដីទៅដាំដំណាំផ្សេងដែលសមស្របនឹងស្ថានភាពដី និងមានទីផ្សារ ដើម្បីបង្កើតចំណូលលើកកម្ពស់ជីវភាពគ្រួសារឱ្យបានល្អប្រសើរ។
ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) និងជាប្រធានសមាគមបណ្តាញកសិករតេជោ នៅថ្ងៃចុងសប្ដាហ៍កន្លងទៅនេះបានលើកឡើងថា ការធ្វើកសិកម្មត្រូវគិតគូរឱ្យបានច្បាស់អំពីថ្លៃដើម ទិន្នផល និងប្រាក់ចំណេញ ដោយមិនត្រូវធ្វើតាមទម្លាប់ដែលមិនបានគណនាពីលទ្ធផលសេដ្ឋកិច្ចនោះទេ។ ប្រសិនបើកសិករធ្វើស្រែរយៈពេល ៣ឆ្នាំ ឬច្រើនឆ្នាំជាប់ៗគ្នា ប៉ុន្តែមិនបានផលចំណេញ ហើយបំណុលកាន់តែកើនឡើង នោះគួរតែពិចារណាឡើងវិញថា តើគួរបន្តធ្វើដដែលទៀត ឬយ៉ាងណា។
ឯកឧត្តមបណ្ឌិត បានមានប្រសាសន៍ថា ៖
«បើធ្វើបានផល ចាំធ្វើ បើធ្វើមិនបាន កុំធ្វើ… កសិករត្រូវចេះវាយតម្លៃថ្លៃដើម និងលទ្ធផលជាក់ស្តែងមុននឹងសម្រេចបន្តការផលិត ប្រសិនបើធ្វើស្រែខាតជាបន្តបន្ទាប់ កសិករអាចពិចារណាប្តូរទៅដាំដំណាំផ្សេងដែលមានទីផ្សារ និងសមស្របនឹងស្ថានភាពដី ដូចជា ដំណាំចម្ការ ដំណាំបន្លែ ឬដំណាំមានតម្លៃសេដ្ឋកិច្ចផ្សេងៗ។ អ្វីដែលសំខាន់នោះគឺ កសិករត្រូវចេះគ្រប់គ្រងថ្លៃដើម តាំងពីការជ្រើសរើសពូជ ការប្រើប្រាស់ជី ថ្នាំកសិកម្ម និងការថែទាំដំណាំ ហើយការប្រើប្រាស់ធាតុចូលកសិកម្មត្រូវធ្វើតាមបច្ចេកទេស និងតាមតម្រូវការ ដើម្បីកាត់បន្ថយការចំណាយ និងបង្កើនទិន្នផល»។
ឯកឧត្តមបណ្ឌិត កៅ ថាច ក៏បានជំរុញឱ្យកសិករផ្លាស់ប្តូរពីការធ្វើកសិកម្មត្រឹមតែសម្រាប់បរិភោគក្នុងគ្រួសារ ទៅជាការផលិតសម្រាប់ទីផ្សារ ដោយមានផែនការផលិត និងសិក្សាពីតម្រូវការរបស់ទីផ្សារឱ្យបានច្បាស់លាស់ជាមុន។
ក្នុងឱកាសនោះ ឯកឧត្តមបណ្ឌិតបានអំពាវនាវដល់ប្រជាកសិករនៅស្រុករវៀង ចូលរួមជាសមាជិកសមាគមបណ្តាញកសិករតេជោ ដើម្បីទទួលបានការគាំទ្រពាក់ព័ន្ធនឹងទុន ទីផ្សារ និងបច្ចេកទេសកសិកម្ម។ លើសពីនេះទៀត ឯកឧត្តមបណ្ឌិតណែនាំឱ្យប្រើប្រាស់សេវាធនាគារ ARDB. ដើម្បីមានភាពងាយស្រួលក្នុងការផ្ទេរប្រាក់ និងទិញទំនិញ៕
Account
Security
Favourite Content