សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
រាជរដ្ឋាភិបាលកម្ពុជា និងក្រុមអឺរ៉ុប បានបង្ហាញការប្តេជ្ញារួមក្នុងការលើកកម្ពស់កសិកម្មធន់នឹងការប្រែប្រួលអាកាសធាតុ ប្រព័ន្ធស្បៀងអាហារធន់ ការអភិរក្សជីវចម្រុះ និងការអភិវឌ្ឍជនបទប្រកបដោយបរិយាបន្ន ក្នុងអំឡុងបេសកកម្មទៅកាន់ខេត្តភាគឦសានកម្ពុជា។
បេសកកម្មដែលធ្វើឡើង កាលពីថ្ងៃទី១៧-១៨ ខែសីហា ដឹកនាំដោយ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និង ឯកឧត្តម អ៊ីហ្គូ ទ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា បានចុះទៅកាន់ខេត្តត្បូងឃ្មុំ ក្រចេះ និងស្ទឹងត្រែង ដើម្បីពិនិត្យវឌ្ឍនភាពនៃគម្រោង និងការគាំទ្រដល់វិស័យកសិកម្ម បរិស្ថាន និងសហគមន៍មូលដ្ឋាន។
គណៈប្រតិភូមានការចូលរួមពីឯកអគ្គរដ្ឋទូតសាធារណរដ្ឋឆែក រ៉ូម៉ានី និងក្រូអាស៊ី ព្រមទាំងអនុប្រធានបេសកកម្មមកពីស្ថានទូតអូទ្រីស បែលហ្ស៊ិក បារាំង អាល្លឺម៉ង់ អៀរឡង់ និងស្វីស។ ក៏មានតំណាង IFAD, GIZ, WWF មន្ត្រីសហភាពអឺរ៉ុប និងមន្ត្រីជាន់ខ្ពស់រាជរដ្ឋាភិបាលកម្ពុជាចូលរួមផងដែរ។
នៅខេត្តត្បូងឃ្មុំ គណៈប្រតិភូបានទស្សនាសហគមន៍កសិកម្មជ័យរុងរឿង ដែលទទួលការគាំទ្រពីកម្មវិធី ASPIRE-AT ដើម្បីពិនិត្យការអនុវត្តបច្ចេកទេសកសិកម្មឆ្លាតវៃឆ្លើយតបនឹងអាកាសធាតុ និងគំនិតផ្តួចផ្តើមភ្ជាប់ទីផ្សារ។
នៅខេត្តក្រចេះ បេសកកម្មបានទៅកាន់តំបន់អភិរក្សផ្សោតទន្លេមេគង្គ ដែលគ្រប់គ្រងដោយរដ្ឋបាលជលផល និង WWF ដោយមានការគាំទ្រពីប្រទេសបែលហ្ស៊ិក និងសហភាពអឺរ៉ុប។ កិច្ចការនេះផ្តោតលើការការពារប្រភេទសត្វកម្រទន្ទឹមនឹងការបង្កើតប្រភពចំណូលប្រកបដោយនិរន្តរភាពសម្រាប់សហគមន៍មូលដ្ឋាន។
នៅស្ទឹងត្រែង គណៈប្រតិភូបានទស្សនាសិប្បកម្មកែច្នៃគ្រាប់ស្វាយចន្ទីស្ទឹងត្រែង សហគមន៍កសិកម្មចំបក់ និងទីតាំងគម្រោង CAPSAFE ដែលជាភាពជាដៃគូរវាងសហភាពអឺរ៉ុប អាល្លឺម៉ង់ និងកម្ពុជា សម្រាប់វិស័យកសិកម្ម និងប្រព័ន្ធស្បៀងអាហារប្រកបដោយចីរភាព។ គម្រោងនេះអនុវត្តដោយក្រសួងកសិកម្ម រុក្ខាប្រមាញ់ និងនេសាទ GIZ និងដៃគូពាក់ព័ន្ធ ដើម្បីគាំទ្រការកែច្នៃក្រោយការប្រមូលផល និងការធានាគុណភាព។
ឯកឧត្តម ឌិត ទីណា បានមានប្រសាសន៍ថា កម្ពុជាកំពុងផ្លាស់ប្តូរមុខមាត់វិស័យកសិកម្ម ពីការធ្វើកសិកម្មបែបគ្រួសារទៅជាការផលិតបែបពាណិជ្ជកម្ម តាមរយៈសហគមន៍កសិកម្មទំនើប និងផលិតកម្មកសិកម្មតាមកិច្ចសន្យា ដើម្បីរៀបចំកសិករក្នុងស្រុកឱ្យអាចផ្គត់ផ្គង់ផលដំណាំបានទៀងទាត់ និងឋិតថេរដល់រោងចក្រកែច្នៃ។
ឯកឧត្តមបានបន្ថែមថា កិច្ចសហការជាមួយសហភាពអឺរ៉ុប និងដៃគូផ្សេងទៀត កំពុងជួយលើកកម្ពស់ស្តង់ដារសុវត្ថិភាពចំណីអាហារ និរន្តរភាព និងសមត្ថភាពប្រកួតប្រជែងក្នុងទីផ្សារ សម្រាប់ដំណាំសំខាន់ៗ ដូចជា ស្វាយចន្ទី និងម្រេច ព្រមទាំងបើកឱកាសថ្មីសម្រាប់កសិករក្នុងស្រុក និងទីផ្សារអន្តរជាតិ។
ក្នុងអំឡុងបេសកកម្ម ប្រតិភូបានពិភាក្សាជាមួយមន្ត្រីរដ្ឋាភិបាល ដៃគូអភិវឌ្ឍន៍ សហគមន៍ជនបទ និងអាជីវកម្មកសិកម្មក្នុងស្រុក។ កិច្ចពិភាក្សាផ្តោតលើលទ្ធផលនៃការវិនិយោគលើកសិកម្មតាមកិច្ចសន្យា ការកែច្នៃក្រោយប្រមូលផល និងការពង្រឹងខ្សែច្រវាក់តម្លៃកសិកម្ម ដើម្បីលើកកម្ពស់ស្តង់ដារសុវត្ថិភាពចំណីអាហារ ជំរុញការចូលរួមរបស់វិស័យឯកជន និងពង្រីកការចូលទៅកាន់ទីផ្សារតំបន់ និងអឺរ៉ុបដែលមានតម្លៃខ្ពស់។
ឯកឧត្តម អ៊ីហ្គូ ទ្រីសម៉ាន់ បានមានប្រសាសន៍ថា តាមរយៈយុទ្ធសាស្ត្រច្រកទ្វារសកល (Global Gateway) របស់សហភាពអឺរ៉ុប ក្រុមអឺរ៉ុបកំពុងវិនិយោគលើជំនាញបច្ចេកទេស សុវត្ថិភាពចំណីអាហារ និងប្រព័ន្ធកែច្នៃ ដើម្បីជំរុញខ្សែច្រវាក់តម្លៃស្វាយចន្ទី និងម្រេចរបស់កម្ពុជា។
ឯកឧត្តម បានបញ្ជាក់ថា ការគាំទ្រនេះជួយឱ្យអាជីវកម្មកសិកម្មក្នុងស្រុកអាចបង្កើតផលិតផលមានតម្លៃបន្ថែមខ្ពស់នៅក្នុងប្រទេស និងពង្រីកទៅកាន់ទីផ្សារនាំចេញតម្លៃខ្ពស់។ លោកក៏បានលើកឡើងថា ការជួបផ្ទាល់ជាមួយកសិករក្នុងដំណើរឆ្លងកាត់ខេត្ត បានបង្ហាញពីផលប៉ះពាល់វិជ្ជមាននៃភាពជាដៃគូជាមួយក្រសួងកសិកម្ម រុក្ខាប្រមាញ់ និងនេសាទ។
រាជរដ្ឋាភិបាលកម្ពុជា និងក្រុមអឺរ៉ុប បានបញ្ជាក់ជាថ្មីពីការប្តេជ្ញាបន្តកិច្ចសហប្រតិបត្តិការ ដើម្បីអភិវឌ្ឍវិស័យកសិកម្ម និងប្រព័ន្ធស្បៀងអាហារ ពង្រឹងការការពារជីវចម្រុះ និងជំរុញការអភិវឌ្ឍជនបទឱ្យកាន់តែធន់នឹងការប្រែប្រួលអាកាសធាតុ និងមាននិរន្តរភាព៕
Account
Security
Favourite Content