សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឱកាសនៃពិធីបើកសម្ពោធដាក់ដំណើរការជាផ្លូវការនូវមជ្ឈមណ្ឌលពាណិជ្ជកម្ម អាស៊ាន-អន្តរជាតិ កាលពីថ្មីៗនេះ ឯកឧត្តម ឃួង ស្រេង អភិបាលរាជធានី បានមានប្រសាសន៍ថា មជ្ឈមណ្ឌលពាណិជ្ជកម្ម មួយនេះពិតជាមានសក្ដានុពលក្នុងការលើកកម្ពស់ជីវភាពរស់នៅរបស់ប្រជាកសិករបានយ៉ាងច្រើន។ ទន្ទឹមនឹងការពង្រឹងសមត្ថភាពក្នុងការនាំចេញ និងនាំចូលផលិតផលកសិកម្ម បណ្តុំទីផ្សារនេះក៏នឹងជួយដល់ស្ថិរភាពនៃខ្សែច្រវាក់ផ្គត់ផ្គង់ក្នុងស្រុកផងដែរ។
ឯកឧត្តម ឃួង ស្រេង បានបញ្ជាក់ថា មជ្ឈមណ្ឌលពាណិជ្ជកម្មនេះ នឹងក្លាយជាមជ្ឈមណ្ឌលចែកចាយផលិតផលកសិកម្មចម្បងទូទាំងប្រទេស និងក្នុងតំបន់ ហើយអាចមានលទ្ធភាពក្នុងការរក្សាបានស្ថិរភាពនៃខ្សែច្រវាក់ផ្គត់ផ្គង់ក្នុងស្រុកផងដែរ។
ឯកឧត្តម អភិបាលរាជធានី ធ្លាប់បានកត់សម្គាល់ថា មជ្ឈមណ្ឌលពាណិជ្ជកម្មមួយនេះមានភាពល្អប្រសើរ និងមានសក្តានុពលបំផុត ក្នុងនាមជាទីផ្សារលក់ដុំ និងលក់រាយដ៏ទូលំទូលាយសម្រាប់ទីក្រុង ដោយផ្តល់ជូនទាំងទំនិញក្នុងស្រុក និងនាំចូល និងការចែកចាយផលិតផលទូទាំង២៤ខេត្តនៃប្រទេសកម្ពុជា ។
មជ្ឈមណ្ឌលពាណិជ្ជកម្មថ្មីនេះ ត្រូវបានសាងសង់លើផ្ទៃដីទំហំ ៣០ហិកតា ស្ថិតនៅលើមហាវិថីឈ្នះ-ឈ្នះ ក្នុងខណ្ឌព្រែកព្នៅ រាជធានីភ្នំពេញ ឥឡូវនេះគឺជាទីផ្សារលក់ដុំដ៏ធំបំផុតនៅក្នុងប្រទេសកម្ពុជា។ មជ្ឈមណ្ឌលពាណិជ្ជកម្មថ្មីនេះនឹងផ្តោតលើកសិផលដែលមានគុណភាពខ្ពស់ និងអនាម័យ ហើយអាចផ្ទុកផលិតផលក្នុងស្រុករហូតដល់ ៦០ ០០០ តោន ដែលមានប្រភពមកពីបណ្តាខេត្តក្រុងទូទាំងប្រទេសកម្ពុជា រួមជាមួយនឹងការនាំចូលពីប្រទេសដៃគូពាណិជ្ជកម្មដូចជាប្រទេសចិន វៀតណាម និងថៃផងដែរ។
លោក សៀ លូពីង (Xie Luping) ប្រធានក្រុមប្រឹក្សាភិបាលនៃមជ្ឈមណ្ឌលពាណិជ្ជកម្ម អាស៊ាន-អន្តរជាតិ បានមានប្រសាសន៍ថា គម្រោងនេះនឹងផ្តល់ផលប្រយោជន៍ទៅវិញទៅមកសម្រាប់ទាំងអ្នកនាំចូល និងអ្នកនាំចេញ។ មជ្ឈមណ្ឌលពាណិជ្ជកម្មថ្មីនេះ នឹងជំរុញពាណិជ្ជកម្មកសិកម្មយ៉ាងខ្លាំងរវាងប្រទេសចិន កម្ពុជា និងបណ្តាប្រទេសអាស៊ាន ដោយផ្តោតលើផលិតផលកសិកម្មប្រកបដោយគុណភាព និងអនាម័យជាច្រើន។
លោក សៀ លូពីង បានមានប្រសាសន៍ថា តាមរយៈផ្សារនេះនឹងពង្រឹងកិច្ចសហប្រតិបត្តិការឈ្នះ-ឈ្នះ រវាងប្រជាជនកម្ពុជា និងចិន និងប្រជាជនអាស៊ានផងដែរ ស្របតាមគំនិតផ្តួចផ្តើមខ្សែក្រវ៉ាត់និងផ្លូវ (BRI)។
សូមជម្រាបថា គម្រោងនេះបានចាប់ផ្តើមការសាងសង់ជាលើកដំបូងក្នុងឆ្នាំ២០២២ ដែលដឹកនាំដោយសមាគមអភិវឌ្ឍន៍អាជីវកម្មគ័ងស៊ី (China’s Guangxi Business Development Association-GBDA) របស់ប្រទេសចិន។ នៅក្នុងដំណាក់កាលទី១របស់ផ្សារនេះ ត្រូវបានបង្កើតឡើងដោយតូបបុគ្គលជាង ៦,០០០ ដែលឥឡូវនេះត្រូវបានជួលទៅឱ្យអាជីវករ។ ឈានទៅដល់ការចាប់ផ្តើមបើកមជ្ឈមណ្ឌលពាណិជ្ជកម្មនេះ GBDA បានផ្ទេរតូបផ្សារដំបូងចំនួន៦០០០តូប ទៅម្ចាស់អាជីវកម្មក្រោមកិច្ចសន្យារយៈពេល ៥ឆ្នាំ ដោយរយៈពេល២ឆ្នាំដំបូងគឺមិនគិតថ្លៃទេ៕
សូមបញ្ជាក់ថា មជ្ឈមណ្ឌលពាណិជ្ជកម្ម អាស៊ាន-អន្តរជាតិ ដែលគេដាក់ឈ្មោះដើម្បីសម្គាល់ថា ផ្សារដើមគរថ្មី ត្រូវបានសម្ពោធដាក់ឱ្យប្រើប្រាស់ជាផ្លូវការកាលពីពេលថ្មីៗនេះ ក្រោមអធិបតីភាព ឯកឧត្តម ឃួង ស្រេង អភិបាលរាជធានីភ្នំពេញ និង ឯកឧត្តម វ៉ាង វិនធាន (Wang Wentian) ឯកអគ្គរដ្ឋទូតចិនប្រចាំកម្ពុជា អ្នកតំណាង និងអ្នកពាក់ព័ន្ធដទៃទៀតនៃគម្រោងនេះ។
Account
Security
Favourite Content