សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ការពឹងផ្អែករបស់កម្ពុជាលើការនាំចូលប្រេងឥន្ធនៈ និងជី បានធ្វើឱ្យសេដ្ឋកិច្ចប្រឈមនឹងការរំខានការផ្គត់ផ្គង់ថាមពលសកល និងបង្កើនតម្រូវការឱ្យមានវិធានការការពារគ្រួសារងាយរងគ្រោះ ព្រមទាំងការកសាងភាពធន់សេដ្ឋកិច្ចរយៈពេលវែង។ នេះបើយោងតាមរបាយការណ៍ថ្មីរបស់វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) នៅថ្ងៃទី២៤ ខែសីហា ឆ្នាំ២០២៦។
របាយការណ៍ស្តីពី «ផលប៉ះពាល់សេដ្ឋកិច្ចដោយការរំខាននៃទីផ្សារថាមពលអន្តរជាតិមកលើប្រទេសកម្ពុជា» ត្រូវបានចងក្រងដោយលោក James Giesecke និងលោក Robert Waschik មកពីមជ្ឈមណ្ឌលសិក្សាគោលនយោបាយនៅសាកលវិទ្យាល័យ Victoria លោក Milan Thomas មកពីធនាគារអភិវឌ្ឍន៍អាស៊ី (ADB) និងលោក ឆន ឌីណា មកពី CDRI។
ការសិក្សានេះពិនិត្យលើផលប៉ះពាល់ពីការកើនឡើងតម្លៃប្រេងឥន្ធនៈសកល និងការផ្គត់ផ្គង់ជីមានកម្រិត ដែលបណ្តាលមកពីការរំខានខ្សែច្រវាក់ផ្គត់ផ្គង់នៅមជ្ឈិមបូព៌ា។ របាយការណ៍បានប្រើគំរូសិក្សាវិបត្តិសកល ដោយផ្អែកលើទិន្នន័យសេដ្ឋកិច្ចកម្ពុជា ដើម្បីវាយតម្លៃផលប៉ះពាល់លើសេដ្ឋកិច្ចជាតិ។
លោកស្រី Yasmin Siddiqi នាយិកាប្រចាំប្រទេសកម្ពុជារបស់ ADB បានមានប្រសាសន៍ថា៖ «របាយការណ៍នេះផ្តល់ការវិភាគទាន់ពេលវេលា ដើម្បីគាំទ្រដល់ការឆ្លើយតបជាបន្តបន្ទាប់របស់រាជរដ្ឋាភិបាលទៅនឹងវិបត្តិប្រេងឥន្ធនៈសកល និងជំនួយតាមរយៈអន្តរាគមន៍រហ័សរបស់ ADB នាពេលថ្មីៗ ដែលជាការរួមចំណែកក្នុងការឆ្លើយតបនេះ ដើម្បីស្ថិរភាពសេដ្ឋកិច្ចរបស់ប្រទេស»។
លោកស្រីបន្តថា ការរងផលប៉ះពាល់របស់កម្ពុជាពីការរំខានទីផ្សារថាមពល មិនត្រឹមតែជាការគំរាមកំហែងរយៈពេលខ្លីដល់ការកាត់បន្ថយភាពក្រីក្រប៉ុណ្ណោះទេ ប៉ុន្តែជាបញ្ហាប្រឈមជាមូលដ្ឋានសម្រាប់ការអភិវឌ្ឍផងដែរ។
លោកស្រី Yasmin បានបន្ថែមថា ការរកឃើញក្នុងរបាយការណ៍ផ្តល់នូវជម្រើសគោលនយោបាយជាក់ស្តែង ផ្អែកលើភស្តុតាង ដើម្បីពង្រឹងសន្តិសុខថាមពល ធានាខ្សែច្រវាក់ផ្គត់ផ្គង់ប្រេងឥន្ធនៈ និងជីជាគន្លឹះ ព្រមទាំងបង្វែរស្ថានភាពសេដ្ឋកិច្ចទៅជាឱកាសសម្រាប់កំណើនប្រកបដោយចីរភាព។
លោកស្រីបណ្ឌិត អេង នេត្រា នាយិកាប្រតិបត្តិនៃ CDRI បានមានប្រសាសន៍ថា របាយការណ៍នេះឆ្លុះបញ្ចាំងពីបេសកកម្មស្នូលរបស់ CDRI ក្នុងការប្រើប្រាស់វិធីសាស្ត្រសហការ ដើម្បីចងក្រងភស្តុតាងឯករាជ្យយ៉ាងម៉ត់ចត់ ជួយអ្នកបង្កើតគោលនយោបាយដោះស្រាយបញ្ហាសេដ្ឋកិច្ចដែលបង្កឡើងដោយវិបត្តិពីខាងក្រៅ។
លោកស្រីបណ្ឌិត អេង នេត្រា បានថ្លែងថា៖ «តាមរយៈការរួមបញ្ចូលគ្នានូវជំនាញក្នុងស្រុកជាមួយនឹងគំរូស្រាវជ្រាវអន្តរជាតិល្អៗ យើងសង្ឃឹមថា វានឹងជួយដល់អ្នកដឹកនាំក្នុងរាជរដ្ឋាភិបាល វិស័យឯកជន ក៏ដូចជាវិស័យអភិវឌ្ឍន៍ នូវមូលដ្ឋានច្បាស់លាស់ ផ្អែកលើភស្តុតាង ដើម្បីដាក់ចេញនូវសកម្មភាព»។
តាមរបាយការណ៍ អនុសាសន៍គោលនយោបាយរួមមាន ការពន្លឿនការធ្វើពិពិធកម្មថាមពល ការកសាងជំនាញបៃតង និងការរក្សាប្រេងឥន្ធនៈ និងជីបម្រុងជាយុទ្ធសាស្ត្រ ដើម្បីកាត់បន្ថយផលប៉ះពាល់ពីវិបត្តិខាងក្រៅ។ របាយការណ៍ក៏ស្នើឱ្យមានការគាំទ្រចំគោលដៅ និងទាន់ពេលវេលាដល់គ្រួសារងាយរងគ្រោះ ព្រមទាំងរក្សាលំហសារពើពន្ធសម្រាប់ការចំណាយសាធារណៈដែលមានអាទិភាព។
លោក Milan Thomas សេដ្ឋវិទូប្រចាំប្រទេសកម្ពុជារបស់ ADB បានមានប្រសាសន៍ថា៖ «គំរូស្រាវជ្រាវនេះបង្ហាញថា ប្រសិនបើតម្លៃប្រេងឥន្ធនៈកើនឡើងបន្ថែមទៀតដល់ ៥០% ខ្ពស់ជាងមុនពេលមានវិបត្តិ សកម្មភាពសេដ្ឋកិច្ចនឹងធ្លាក់ចុះ ១%»។
លោកបានបញ្ជាក់ថា ផលប៉ះពាល់អាចមានកាន់តែច្រើនលើគ្រួសារនៅតាមជនបទ ដោយសារផលិតកម្មវិស័យកសិកម្មរបស់ពួកគេរងផលប៉ះពាល់ពីតម្លៃធាតុចូលខ្ពស់ជាងមុន។
លោក Milan Thomas បានបន្ថែមថា អនុសាសន៍មួយចំនួនក្នុងរបាយការណ៍មាននៅក្នុងកម្មវិធីអន្តរាគមន៍គ្រប់ជ្រុងជ្រោយ (Comprehensive Intervention Program) របស់រាជរដ្ឋាភិបាល ដែលនឹងត្រូវបានគាំទ្រដោយកម្មវិធីអន្តរាគមន៍រហ័សសម្រាប់ស្ថិរភាពសេដ្ឋកិច្ច (RISE) របស់ ADB ចាប់ពីខែក្រោយ។
កម្មវិធី RISE ដែលត្រូវបានអនុម័តនៅថ្ងៃទី៣០ ខែកក្កដា នឹងផ្តល់ហិរញ្ញប្បទានសម្បទានចំនួន ២៥០ លានដុល្លារ ដើម្បីគាំទ្រកម្មវិធីអន្តរាគមន៍គ្រប់ជ្រុងជ្រោយរបស់រាជរដ្ឋាភិបាលកម្ពុជា។ ហិរញ្ញប្បទាននេះនឹងគាំទ្រប្រាក់ចំណូលសម្រាប់គ្រួសារក្រីក្រ ការគាំទ្រអន្តរាគមន៍ថាមពលសម្រាប់អ្នកបើកបររ៉ឺម៉កកង់បី ព្រមទាំងការបណ្តុះបណ្តាល និងបរិក្ខារកសិកម្មសម្រាប់គ្រួសារនៅតាមជនបទ។
កម្មវិធីនេះក៏នឹងបន្តការបន្ធូរបន្ថយពន្ធបណ្តោះអាសន្ន និងផ្តល់ជាជំនួយជាក់លាក់ដោយប្រើប្រព័ន្ធ IDPoor។
ជាមួយគ្នានេះ កាលពីថ្ងៃទី១០ ខែមេសា ឆ្នាំ២០២៦ ADB បានព្យាករថា សេដ្ឋកិច្ចកម្ពុជានឹងកើនឡើង ៤,៥% ក្នុងឆ្នាំ២០២៦ ប្រសិនបើការរំខានទីផ្សារទំនិញសកលដែលបង្កឡើងដោយជម្លោះនៅមជ្ឈិមបូព៌ា មិនត្រូវបានអូសបន្លាយយូរ។
តាមសេណារីយ៉ូរបស់ ADB ប្រសិនបើស្ថានភាពនៅមជ្ឈិមបូព៌ាធូរស្រាលឆាប់រហ័ស កំណើនសេដ្ឋកិច្ចកម្ពុជានឹងត្រូវបានគាំទ្រដោយភាពធន់នៃវិស័យកម្មន្តសាល ហើយត្រូវបានព្យាករថានឹងកើនដល់ ៥,០% នៅឆ្នាំ២០២៧ ដោយសារស្ថានភាពនៅក្រៅប្រទេសមានភាពប្រសើរឡើង និងកំណែទម្រង់ក្នុងស្រុកបន្តលើកកម្ពស់ផលិតភាពសេដ្ឋកិច្ច៕
Account
Security
Favourite Content