សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ រដ្ឋមន្ត្រីការបរទេសចិន លោក Wang Yi នឹងទៅបំពេញទស្សនកិច្ចនៅកូរ៉េខាងជើងក្នុងសប្តាហ៍នេះរយៈពេល ២ថ្ងៃ ដើម្បីពង្រឹងចំណងការទូត ទំនាក់ទំនងទ្វេភាគីឡើងវិញ នេះបើយោងតាមសេចក្ដិប្រកាសរបស់ក្រសួងការបរទេសចិនកាលពីថ្ងៃពុធកន្លងទៅនេះ។
អ្នកនាំពាក្យក្រសួងការបរទេសចិន លោកស្រី Mao Ning បានថ្លែងក្នុងសន្និសីទសារព័ត៌មានថា ប្រទេសចិនមានឆន្ទៈក្នុងការពង្រឹងទំនាក់ទំនងជាយុទ្ធសាស្ត្រជាមួយកូរ៉េខាងជើង និងបង្កើនការផ្លាស់ប្តូរ និងកិច្ចសហប្រតិបត្តិការរួមគ្នា។ ចំពោះដំណើរទស្សនកិច្ចរបស់លោក Wang Yi ចាប់ពីនៅថ្ងៃទី ៩ ដល់ថ្ងៃទី ១០ ខែមេសា គឺជាវិធានការសំខាន់មួយសម្រាប់ជំរុញទំនាក់ទំនងទ្វេភាគី។ ការបង្រួបបង្រួម និងការអភិវឌ្ឍទំនាក់ទំនងចិន-កូរ៉េខាងជើង គឺជាគោលនយោបាយយុទ្ធសាស្ត្រមិនផ្លាស់ប្តូររបស់គណបក្ស និងរដ្ឋាភិបាលចិន។
ថ្មីៗនេះ ទីក្រុងប៉េកាំងបានព្យាយាមស្តារទំនាក់ទំនងជាមួយនឹងទីក្រុងព្យុងយ៉ាងឱ្យត្រលប់ទៅល្អដូចកាលពីមុនវិញបន្ទាប់ពីធ្លាក់ចុះខ្សោយអំឡុងពេលរាតត្បាត និងពេលដែលមេដឹកនាំកូរ៉េខាងជើងលោក Kim Jong Un បញ្ជូនកងទ័ព និងសព្វាវុធរបស់ខ្លួនជួយក្នុងសង្គ្រាមរបស់រុស្ស៊ីទៅលើអ៊ុយក្រែន។ ជាការកត់សម្គាល់ ខ្សែរថភ្លើងដឹកអ្នកដំណើររវាងទីក្រុងប៉េកាំង និងទីក្រុងព្យុងយ៉ាងបានដំណើរការឡើងវិញក្នុងខែមីនា បន្ទាប់ពីត្រូវបានផ្អាកអស់រយៈពេល ៦ ឆ្នាំចាប់តាំងពីឆ្នាំ២០២០។ លើសពីនេះ ក្រុមហ៊ុនអាកាសចរណ៍ចិន Air China ក៏បានចាប់ផ្តើមជើងហោះហើរឡើងវិញរវាងទីក្រុងទាំងពីរផងដែរ ប៉ុន្តែការបើកផ្លូវអាកាសឡើងវិញមិនបានផ្តល់ផលប្រយោជន៍ដល់ភ្ញៀវទេសចរចិនច្រើននោះទេ ដោយសារភាគច្រើនគឺជាការធ្វើដំណើរសម្រាប់ជំនួញ និងផ្លាស់ប្តូរនិស្សិតបន្តការសិក្សា។
កាលពីខែកញ្ញា ឆ្នាំ២០២៥ មេដឹកនាំកូរ៉េខាងជើង លោក Kim Jong Un បានធ្វើដំណើរទៅកាន់ទីក្រុងប៉េកាំងដើម្បីចូលរួមជាមួយប្រធានាធិបតីរុស្ស៊ី លោក Vladimir Putin និងមេដឹកនាំផ្សេងទៀតសម្រាប់កម្មវិធីព្យុហយាត្រាយោធាដ៏ធំនៅក្នុងរដ្ឋធានីចិន។ កិច្ចប្រជុំនោះត្រូវបានបន្តរហូតដល់មានដំណើរទស្សនកិច្ចរបស់នាយករដ្ឋមន្ត្រីចិន លោក Li Qiang ទៅកាន់ទីក្រុងព្យុងយ៉ាងក្នុងខែតុលា ឆ្នាំ២០២៥ ។
តាមរយៈរូបភាពទាំងនេះគេវិភាគឃើញថា ការសម្របសម្រួលទំនាក់ទំនងរវាងកូរ៉េខាងជើង-ចិន អាចនឹងកើតឡើងមុនកិច្ចការសម្របសម្រួលពង្រឹងទំនាក់ទំនងចិន-អាម៉េរិក ដោយសារដំណើរទស្សនកិច្ចទៅកាន់ទីក្រុងព្យុងយ៉ាងរបស់លោក Wang Yi នឹងកើតឡើងមុនកិច្ចប្រជុំកំពូលរវាងប្រធានាធិបតីចិន លោក Xi Jinping និងប្រធានាធិបតីអាម៉េរិក លោក Donald Trump នាអំឡុងខែឧសភាខាងមុខនេះ។
សូមជម្រាបដែរថា បើទោះបីជាលោក Trump បានបង្ហាញចំណាប់អារម្មណ៍ម្តងហើយម្តងទៀតក្នុងការបន្តកិច្ចចរចាដោយផ្ទាល់ជាមួយមេដឹកនាំកូរ៉េខាងជើងក៏ដោយ ប៉ុន្តែនៅមិនទាន់មានកិច្ចប្រជុំណាមួយកើតឡើងនោះទេ។ យ៉ាងណាមិញ មេដឹកនាំកូរ៉េខាងជើក លោក Kim Jong Un ធ្លាប់បានលើកឡើងដែរថា វាគ្មានហេតុផលអ្វីដែលកូរ៉េខាងជើង និងសហរដ្ឋអាម៉េរិកមិនអាចចុះសម្រុងគ្នាបានឡើយ ប្រសិនបើក្រុងវ៉ាស៊ីនតោនទទួលស្គាល់អាវុធនុយក្លេអ៊ែររបស់កូរ៉េខាងជើង និងបោះបង់ចោលគោលនយោបាយប្រឆាំងនឹងទីក្រុងព្យុងយ៉ាង៕
Account
Security
Favourite Content