ប្រទេសឡាវ ៖ ប្រទេសជាសមាជិកមហាអនុតំបន់មេគង្គ កាលពីថ្ងៃទី២៥ ខែមិថុនា ឆ្នាំ២០២៥ បានប្រកាសជាផ្លូវការដាក់ឱ្យប្រើប្រាស់ «ផែនការយុទ្ធសាស្ត្រអភិវឌ្ឍន៍ទេសចរណ៍មហាអនុតំបន់មេគង្គ ឆ្នាំ២០២៣០» ក្រោមការគាំទ្ររបស់ធនាគារអភិវឌ្ឍន៍អាស៊ី (ADB)។ ផែនការយុទ្ធសាស្ត្រនេះមានចក្ខុវិស័យប្រែក្លាយមហាអនុតំបន់មេគង្គឱ្យក្លាយជាគោលដៅទេសចរណ៍ឈានមុខគេជាសកល ដែលទទួលបានការទទួលស្គាល់ដោយសារបទពិសោធន៍ដំណើរកម្សាន្តប្រកបដោយគុណភាពខ្ពស់ និងចីរភាព ព្រមទាំងជំរុញឱ្យមានកំណើនសេដ្ឋកិច្ចប្រកបដោយបរិយាប័ន្ន និងការថែរក្សាគោលដៅទេសចរណ៍ដោយមានទំនួលខុសត្រូវ។

ផែនការយុទ្ធសាស្ត្រនេះត្រូវបានដាក់ចុះនូវយុទ្ធសាស្ត្រអាទិភាពចំនួន ៤ និងកម្មវិធីអាទិភាពចំនួន១៩ រួមមាន៖

យុទ្ធសាស្ត្រទី១៖ កសាងគោលដៅទេសចរណ៍ប្រកបដោយនិរន្តរភាព ដោយមានកម្មវិធីចំនួន០៥ រួមមាន (១)ការធ្វើផែនការទេសចរណ៍ដែលមានការរួមបញ្ចូលគ្នា និងមានចីរភាព ត្រូវបានពង្រឹង (២)ពង្រឹងការចូលរួមពីសហគ្រាសធនតូច និងមធ្យមនៅក្នុងខ្សែច្រវាក់ផ្គត់ផ្គង់ទេសចរណ៍ (៣)អនុវត្តស្តង់ដាទេសចរណ៍រួម (៤)អភិវឌ្ឍហេដ្ឋារចនាសម្ព័ន្ធទ្រទ្រង់ភាពធន់នៃការប្រែប្រួលអាកាសធាតុ និងគ្រោះមហន្តរាយ (៥)ពង្រីកសេវាកម្មទេសចរណ៍។

យុទ្ធសាស្ត្រទី២៖ អភិវឌ្ឍមូលធនមនុស្ស ដោយមានកម្មវិធីចំនួន ០៥រួមមាន (១)ពង្រឹងសមត្ថភាពអ្នកគ្រប់គ្រងទេសចរណ៍របស់ស្ថាប័នសាធារណៈ (២)ពង្រឹងគុណភាពសេវាកម្ម (៣)ពង្រឹងជំនាញឌីជីថល (៤)ពង្រីកការយល់ដឹងពីទេសចរណ៍ប្រកបដោយនិរន្តរភាព និងការអនុវត្តល្អៗ (៥)ពិពិធកម្មកម្លាំងពលកម្មក្នុងវិស័យទេសចរណ៍។

យុទ្ធសាស្ត្រទី៣៖ ពង្រឹងការចូលរួមរបស់ភាគីពាក់ព័ន្ធ ដោយមានកម្មវិធីចំនួន ០៥ រួមមាន (១)ពង្រឹងកិច្ចសម្របសម្រួលរវាងអន្តរវិស័យ (២)ពង្រឹងកិច្ចសហការរដ្ឋ-ឯកជន (៣)ពង្រឹងយន្តការអនុវត្តការិយាល័យសម្របសម្រួលទេសចរណ៍មេគង្គ (៤)ការទំនាក់ទំនងក្នុងគ្រប់ករណីវិបត្តិត្រូវបានពង្រឹង (៥)ពង្រឹងការសម្របសម្រួលវីសា។

យុទ្ធសាស្ត្រទី៤៖ ពង្រីកការផ្សព្វផ្សាយគោលដៅទេសចរណ៍ ដោយមានកម្មវិធីចំនួន ០៤រួមមាន (១)បទពិសោធន៍ទេសចរណ៍ច្រើនប្រទេស (Multicounty) ក្រុមអាជីវកម្មទាក់ទងនឹងទេសចរណ៍ (Tourism Clusters) និងផ្លូវទស្សនាទេសចរណ៍ ត្រូវបានអភិវឌ្ឍន៍ និងផ្សព្វផ្សាយរួមគ្នា (២)ពង្រឹងយុទ្ធនាការផ្សព្វផ្សាយមហាអនុតំបន់ទេសចរណ៍មេគង្គជាគោលដៅតែមួយប្រកបដោយនិរន្តរភាព (៣)ពង្រឹងនិតិវិធីប្រមូល វិភាគ និងផ្សព្វផ្សាយស្ថិតិទេសចរណ៍ និង(៤)រៀបចំវេទិកាទេសចរណ៍មេគង្គជារៀងរាល់ឆ្នាំ។

ជាមួយគ្នានេះ ដើម្បីជំរុញអនុវត្តយុទ្ធសាស្ត្រ និងកម្មវិធីអាទិភាពខាងលើ ប្រទេសជាសមាជិកបានស្នើឡើងនូវគម្រោងអាទិភាពក្នុងការអភិវឌ្ឍន៍ហេដ្ឋារចនាសម្ព័ន្ធទេសចរណ៍ ពង្រឹងគុណភាពសេវាកម្ម និងពិពិធកម្មផលិតផលទេសចរណ៍សរុបចំនួន ៤៧ គម្រោង ដោយមានទឹកប្រាក់សរុបជាង ១,០០០លានដុលា្លអាមេរិក ជាមួយនឹងគម្រោងកសាងផ្លូវទេសចរណ៍ និងរបៀងទេសចរណ៍ចំនួន ១៤ខ្សែរជុំវិញមហាអនុតំបន់មេគង្គ៕