ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំវេទិកាវេចខ្ចប់នៅកម្ពុជា លើកដំបូងដោយផ្តោតលើតួនាទីសំខាន់នៃការវេចខ្ចប់ក្នុងការជំរុញកំណើន គុណភាព និងភាពប្រកួតប្រជែងរបស់សហគ្រាសធុនមីក្រូ តូច និងមធ្យមកម្ពុជា។

នៅក្នុងសុន្ទរកថាបើកវេទិកាដែលជាព្រឹត្តិការណ៍អមទិវាជាតិសហគ្រាសធុនមីក្រូ តូច និងមធ្យម ឯកឧត្តម​ ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសង្កត់ធ្ងន់ថា៖ការវេចខ្ចប់មិនមែនគ្រាន់តែជាវិស័យគាំទ្រទេ តែជាសសរស្តម្ភយុទ្ធសាស្ត្រសម្រាប់បរិវត្តកម្មសេដ្ឋកិច្ចរបស់កម្ពុជា។

ឯកឧត្តមរដ្ឋមន្ត្រីបានលើកឡើងថា៖

«វិស័យវេចខ្ចប់ដើរតួនាទីយ៉ាងសំខាន់ក្នុងការអភិវឌ្ឍសហគ្រាសធុនមីក្រូ តូច និងមធ្យម វិស័យឧស្សាហកម្ម និងការអភិវឌ្ឍសេដ្ឋកិច្ចកម្ពុជា»។

ឯកឧត្តមបានរំលេចពីការរួមចំណែកនៃវិស័យវេចខ្ចប់ក្នុងការអភិវឌ្ឍជំនាញ ការបង្កើតការងារ និងការបង្កើនភាពធន់នៃទីផ្សារ ដោយបន្ថែមថា៖

«សំបកវេចខ្ចប់ជួយពង្រឹងគុណភាព ភាពធន់ និងសុវត្ថិភាពរបស់ផលិតផល ទន្ទឹមនឹងនោះគាំទ្រការធ្វើពិពិធកម្មសេដ្ឋកិច្ចដោយផ្តល់ដំណោះស្រាយផលិតកម្មតាមតម្រូវការជាក់ស្តែង ។ វិស័យនេះគាំទ្រដល់កំណើនរបស់កម្ពុជាតាមរយៈការធានា​នូវសុចរិតភាពផលិតផល ការពារសុខភាពអ្នកប្រើប្រាស់និងលើកកម្ពស់សេដ្ឋកិច្ចដែលមានការប្រកួតប្រជែងប្រកប​ដោយតម្លាភាព​»។

នៅកម្ពុជា វិស័យនេះមានការវិវត្តរីកចម្រើនគួរឱ្យកត់សម្គាល់ ដោយក្នុងរយៈពេលប្រាំពីរឆ្នាំកន្លងមកនេះ ចំនួនសហគ្រាសផលិត និងចែកចាយសម្ភារវេចខ្ចប់បានកើនឡើងប្រមាណ ៣១៩% និងទុនវិនិយោគបានកើនឡើងជាង ១៣១% ។

ឯកឧត្តមបានលើកឡើង​ថា​៖ ​ការរីកចម្រើនគួរឱ្យកត់សម្គាល់នេះមិនមែនជាភាពចៃដន្យទេ ប៉ុន្តែជាលទ្ធផលនៃការដាក់ចេញនូវយុទ្ធសាស្ត្រច្បាស់លាស់ និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ខណៈដែលកម្ពុជាត្រៀមលក្ខណៈសម្រាប់ការចាកចេញពីឋានៈជាប្រទេសអភិវឌ្ឍន៍តិចតួចនៅឆ្នាំ២០២៩ ការកែលម្អសោភ័ណភាពផលិតផល ការធ្វើប្រេឌីង និងការត្រៀមលក្ខណៈសម្រាប់នាំចេញគឺជាអាទិភាពជាតិ។ នៅក្នុងបរិបទនេះ ការវេចខ្ចប់ត្រូវបានចាត់ទុកថាជាកត្តាជំរុញដ៏សំខាន់ ដើម្បីជួយសហគ្រាសធុនមីក្រួ តូច និងមធ្យម ក្នុងការធ្វើសមាហរណកម្មចូលក្នុងខ្សែច្រវាក់តម្លៃតំបន់ និងពិភពលោក។

ឯកឧត្តមរដ្ឋមន្ត្រីបានបន្ថែមថា៖

«បច្ចុប្បន្ន ការវេចខ្ចប់មិនមែនត្រឹមតែជាការទុកដាក់ទំនិញទៀតនោះទេ ប៉ុន្តែជាការបញ្ជាក់ពីគុណភាព ការធានាសុវត្ថិភាព និងការបង្កើតអត្តសញ្ញាណផលិតផលសម្រាប់ទីផ្សារក្នុងស្រុក និងអន្តរជាតិ»។

វេទិកាវេចខ្ចប់នេះក៏ជាការពញ្ញាក់អារម្មណ៍ ឱ្យបង្កើនការវិនិយោគកាន់តែច្រើនលើនវានុវត្តន៍វិស័យវេចខ្ចប់ ការរចនា និងផលិតកម្មក្នុងស្រុក រួមជាមួយនឹងភាពជាដៃគូកាន់តែរឹងមាំរវាងវិស័យសាធារណៈ និងឯកជន ដើម្បីចាប់យកសក្តានុពលនៃវិស័យនេះ ព្រមទាំងគាំទ្រឱ្យផលិតផលកម្ពុជាលេចធ្លោនៅក្នុងតំបន់ និងនៅលើឆាកអន្តរជាតិ៕