ភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានជំរុញ និងសំណូមពរដល់បងប្អូនប្រជាពលករខ្មែរដែលទើបវិលត្រលប់មកពីប្រទេសថៃ ត្រូវខិតខំធ្វើការនៅក្នុងប្រទេសរបស់យើង ដើម្បីដល់ជួយជីវភាពគ្រួសារផង និងសេដ្ឋកិច្ចជាតិឱ្យកាន់តែប្រសើរឡើងផង ព្រោះថាការងារនៅក្នុងស្រុកមិនខ្វះទេ ខណៈដែលក្រុមហ៊ុនវិនិយោគ ជាពិសេសវិស័យឧស្សាហកម្មជាច្រើនកំពុងត្រូវការកម្លាំងពលកម្ម និង កម្មករជំនាញ ជាមួយនឹងការទទួលបានអត្ថប្រយោជន៍ផ្សេងៗជាច្រើនទៀតបន្ថែមពីលើប្រាក់បៀរវត្សប្រចាំខែ។

ឯកឧត្តមបណ្ឌិត ចន ណារិទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញាវត្ថុ និងជាក្រុមការងាររាជរដ្ឋាភិបាលចុះមូលដ្ឋានស្រុកពញាឮ ខេត្តកណ្តាល កាលពីថ្ងៃចុងសប្ដាហ៍កន្លងទៅ ក្នុងឱកាសអញ្ជើញបើកវេទិកាការងារ និងការចុះឈ្មោះស្វែងរកការងារធ្វើរបស់ពលរដ្ឋ និងពលករខ្មែរដែលបានវិលត្រឡប់មកពីប្រទេសថៃ និងកំពុងស្វែងរកការងារធ្វើ ក្នុងនោះមានការសម្ភាសការងារជ្រើសរើសដោយផ្ទាល់ជាមួយតំណាងក្រុមហ៊ុន និងក្រុមការងារទីភ្នាក់ងារជាតិមុខរបរ និងការងារ ដែលកម្មវិធីនេះបានរៀបចំនៅជើងភ្នំព្រះរាជទ្រព្យ ស្រុកពញាឮ ខេត្តកណ្តាល ។

ក្នុងឱកាសនោះ ឯកឧត្តមរដ្ឋលេខាធិការ ក៏បានអំពាវនាវដល់ពលរដ្ឋជាសមាជិកគ្រួសារដែលមានបណ្ណសមធម៌,បណ្ណគ្រួសារងាយរងហានិភ័យ ដែលបានវិលត្រឡប់មកពីប្រទេសថៃវិញ សូមមកចុះឈ្មោះសិក្សាជំនាញវិជ្ជាជីវៈក្នុងកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសជូនដល់យុវជនមកពីគ្រួសារក្រីក្រ និងងាយរងហានិភ័យ (TVET) របស់រាជរដ្ឋាភិបាល ដើម្បីទទួលបានការសិក្សាជំនាញច្បាស់លាស់ដោយមិនគិតថ្លៃ ហើយថែមទាំងទទួលបានប្រាក់ឧបត្ថម្ភប្រចាំខែ ដើម្បីអាចឈានទៅចាប់យកឱកាសការងារដែលកំពុងមានតម្រូវការនៅក្នុងប្រទេសកម្ពុជា។

ឯកឧត្តមបណ្ឌិតរដ្ឋលេខាធិការ ក៏បានបន្ថែមដែរថា ក្រោមកិច្ចខំប្រឹងប្រែងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា, សហរដ្ឋអាម៉េរិកបានសម្រេចទម្លាក់អត្រាពន្ធបដិការសម្រាប់កម្ពុជា មកនៅត្រឹម ១៩ ភាគរយប៉ុណ្ណោះ ហើយតាមរយៈអត្រាពន្ធបដិការនេះ កម្ពុជា អាចមានឱកាសទាក់ទាញអ្នកវិនិយោជាតិ និងអន្តរជាតិជាច្រើនបន្ថែមទៀត ទាំងពេលបច្ចុប្បន្ន និងនាពេលអនាគត ដែលអាចបង្កើតឱកាសការងារបានកាន់តែច្រើន ៕

អត្ថបទ៖ ង៉ាន់ ទិត្យ
រូបភាព៖ រិន រចនា