ភ្នំពេញ៖ រាជរដ្ឋាភិបាលកម្ពុជា កំពុងចាប់ដៃគូជាមួយភាគីបារាំង ក្នុងការសិក្សាលើគម្រោងបង្កើត «ផ្សារបោះដុំកសិផល និងអាហារស្រស់កម្រិតអន្តរជាតិ» នៅរាជធានីភ្នំពេញ ដើម្បីលើកកម្ពស់ខ្សែច្រវាក់ផ្គត់ផ្គង់កសិផល ធានាសុវត្ថិភាពម្ហូបអាហារ និងបង្កើនឱកាសនាំចេញកសិផលកម្ពុជាទៅកាន់ទីផ្សារអន្តរជាតិ។ គម្រោងបង្កើតផ្សារបោះដុំដ៏ធំមួយនេះ គឺជាកិច្ចសហប្រតិបត្តិការរវាងក្រសួង-ស្ថាប័នពាក់ព័ន្ធនៃរាជរដ្ឋាភិបាលកម្ពុជា ជាមួយក្រុមហ៊ុន និងអ្នកជំនាញបច្ចេកទេសមកពីប្រទេសបារាំង ដែលមានបទពិសោធន៍ខ្ពស់ក្នុងការគ្រប់គ្រងផ្សារបោះដុំកសិផលលំដាប់ពិភពលោកដោយយកគំរូតាមទីផ្សារ Rungis ដ៏ល្បីល្បាញ។

គោលបំណងសំខាន់ៗនៃគម្រោងនេះគឺធ្វើទំនើបកម្មប្រព័ន្ធបោះដុំ រៀបចំឱ្យមានមជ្ឈមណ្ឌលប្រមូលផ្តុំ ផ្ទុក និងចែកចាយកសិផល (បន្លែ ផ្លែឈើ សាច់ និងគ្រឿងសមុទ្រ) ប្រកបដោយស្តង់ដារអនាម័យ និងភូតគាមអនាម័យខ្ពស់។ ការបង្កើតផ្សារបោះដុំកម្រិតអន្តរជាតិនេះ នឹងក្លាយជាកាតាលីករយ៉ាងសំខាន់ក្នុងការផ្លាស់ប្តូរមុខមាត់វិស័យកសិកម្មកម្ពុជា ពីលក្ខណៈគ្រួសារទៅជា កសិ-ពាណិជ្ជកម្ម (Agri-business) ពេញលេញ។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.)នាព្រឹកថ្ងៃពុធ ទី១២ ខែសីហា ឆ្នាំ២០២៦ បានពិភាក្សាជាមួយ លោក Thierry Febvay ប្រធានផ្នែកអភិវឌ្ឍន៍ នៃក្រុមហ៊ុន SEMMARIS ដើម្បីសម្របសម្រួល និងជំរុញការសិក្សាសមិទ្ធិលទ្ធភាព លើគ្រប់ទិដ្ឋភាពបច្ចេកទេស ពាណិជ្ជកម្ម និងប្រតិបត្តិការ សម្រាប់គម្រោងអភិវឌ្ឍន៍ផ្សារបោះដុំកសិផល និងអាហារស្រស់កម្រិតអន្តរជាតិ នៅរាជធានីភ្នំពេញ។

ក្នុងឱកាសនៃជំនួបនេះ លោក Thierry Febvay បានជម្រាបជូន ឯកឧត្តមឧបនាយករដ្ឋមន្ត្រី អំពីបទពិសោធន៍ និងឧត្តមភាពរបស់ SEMMARIS ក្នុងនាមជាក្រុមហ៊ុនគ្រប់គ្រង និងប្រតិបត្តិការផ្សារ Marché International de Rungis នៅទីក្រុងប៉ារីស ប្រទេសបារាំង ដែលជាផ្សារបោះដុំអាហារស្រស់ដ៏ធំបំផុតមួយក្នុងពិភពលោក។ លោកបានបញ្ជាក់ពីបំណងក្នុងការនាំយកជំនាញបច្ចេកទេស ព្រមទាំងគំរូនៃការរៀបចំ និងគ្រប់គ្រងស្តង់ដារអន្តរជាតិ មកចូលរួមអភិវឌ្ឍប្រព័ន្ធឡូជីស្ទីកកសិកម្ម (Agro-Logistics) នៅកម្ពុជាផងដែរ។

ជាមួយគ្នានោះ តំណាងក្រុមហ៊ុនក៏បានជម្រាបជូនពីវឌ្ឍនភាពនៃការសិក្សាសមិទ្ធិលទ្ធភាព និងបានស្នើសុំអនុសាសន៍ណែនាំ ព្រមទាំងការគាំទ្រ ការសម្របសម្រួលនីតិវិធី និងកិច្ចសហការជាមួយក្រសួង ស្ថាប័នពាក់ព័ន្ធ ដើម្បីជាមូលដ្ឋានគ្រឹះក្នុងការរៀបចំយុទ្ធសាស្ត្រឱ្យកាន់តែមានប្រសិទ្ធភាព។

ជាការឆ្លើយតប ឯកឧត្តមឧបនាយករដ្ឋមន្ត្រី បានគូសបញ្ជាក់ថា រាជរដ្ឋាភិបាលកម្ពុជាក្រោមការដឹកនាំប្រកបដោយចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី តែងតែផ្តល់អាទិភាពខ្ពស់លើការធ្វើទំនើបកម្មវិស័យកសិកម្ម ការពង្រឹងខ្សែច្រវាក់ផ្គត់ផ្គង់ និងការលើកកម្ពស់ឧស្សាហកម្មកែច្នៃកសិផល និងម្ហូបអាហារ ដើម្បីផ្តល់តម្លៃបន្ថែមទៅលើទិន្នផល ដែលបងប្អូនប្រជាកសិករផលិតបាន។ ឯកឧត្តម បានបង្ហាញពីជំហររបស់ ក.អ.ក. ក្នុងការរង់ចាំផ្តល់កិច្ចសម្រួល និងការគាំទ្រយ៉ាងពេញទំហឹងដល់ដំណើរការសិក្សាសមិទ្ធិលទ្ធភាពនេះ ដើម្បីប្រែក្លាយគម្រោងនេះឱ្យលេចចេញជារូបរាងពិតប្រាកដ។

គម្រោងបង្កើតផ្សារបោះដុំកសិផល និងអាហារស្រស់កម្រិតអន្តរជាតិនេះ ត្រូវបានវាយតម្លៃថាជាគម្រោងយុទ្ធសាស្ត្រប្រកបដោយគុណសម្បត្តិ និងសក្ដានុពលខ្ពស់ ដែលមិនត្រឹមតែចូលរួមធ្វើទំនើបកម្មប្រព័ន្ធឡូជីស្ទីកកសិកម្ម (Agro-Logistics) និងពង្រឹងខ្សែច្រវាក់ផ្គត់ផ្គង់អាហារប៉ុណ្ណោះទេ ប៉ុន្តែថែមទាំងជាកាតាលីករដ៏សំខាន់ក្នុងការបង្កើតតម្លៃបន្ថែមលើផលិតផលកសិកម្មក្នុងស្រុក ធានាទីផ្សារ និងប្រាក់ចំណូលជូនបងប្អូនប្រជាកសិករ ព្រមទាំងលើកកម្ពស់សន្តិសុខស្បៀង និងជំរុញការនាំចេញកសិផលកម្ពុជាទៅកាន់ទីផ្សារតំបន់ និងសកលលោកនាពេលអនាគតផងដែរ។

សូមបញ្ជាក់ថា៖ គម្រោងនេះកើតចេញពីកិច្ចសហប្រតិបត្តិការយុទ្ធសាស្ត្ររវាងក្រុមហ៊ុន SEMMARIS និងក្រុមហ៊ុន WorldBridge Group តាមរយៈការចុះកិច្ចព្រមព្រៀង កាលពីថ្ងៃទី១០ ខែកក្កដា ឆ្នាំ២០២៦ កន្លងទៅនៅសណ្ឋាគារ Shangri-La ភ្នំពេញ ដោយមានការអញ្ជើញចូលរួមពីលោក Bertrand Ambroi​s​e​ នាយកអភិវឌ្ឍន៍អន្តរជាតិនៃក្រុមហ៊ុន SEMMARIS និងអ្នកឧកញ៉ា សៀ ដានីញ៉ែល នាយកប្រតិបត្តិនៃក្រុមហ៊ុន WorldBridge Group។ ពិធីនេះក៏មានការចូលរួមពីលោក Nicolas Forissier រដ្ឋមន្ត្រីប្រតិភូបារាំងទទួលបន្ទុកពាណិជ្ជកម្មបរទេស និងការទាក់ទាញវិនិយោគ, ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្មកម្ពុជា និងឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។

ក្រោមកិច្ចព្រមព្រៀងនេះ ក្រុមហ៊ុន SEMMARIS នឹងផ្តល់ជំនួយបច្ចេកទេសដល់ក្រុមហ៊ុន WorldBridge Group លើការសិក្សាលទ្ធភាព ដោយប្រើប្រាស់ជំនាញរាប់ទសវត្សរ៍របស់ខ្លួនក្នុងការប្រតិបត្តិការផ្សារ Rungis។ ការសិក្សានេះនឹងវាយតម្លៃលើទីផ្សារម្ហូបអាហារ អចលនទ្រព្យ ឃ្លាំង និងតម្រូវការភស្តុភារកម្មរបស់ទីផ្សារលក់ដុំនៅភ្នំពេញ រួមជាមួយនឹងការធ្វើផែនការបច្ចេកទេស និងទីតាំងដែលត្រូវការដើម្បីអភិវឌ្ឍបង្កើតផែនការមេ។

កិច្ចព្រមព្រៀងនេះឆ្លុះបញ្ចាំងពីក្រុមហ៊ុន WorldBridge Group បានបន្តប្តេជ្ញាចិត្តក្នុងការនាំយកហេដ្ឋារចនាសម្ព័ន្ធលំដាប់ពិភពលោក និងជំនាញអន្តរជាតិមកកាន់វិស័យកសិកម្ម និងចែកចាយចំណីអាហារនៅកម្ពុជា ស្របពេលជាមួយនឹងការធ្វើឱ្យកិច្ចសហប្រតិបត្តិការសេដ្ឋកិច្ចរវាងកម្ពុជា និងបារាំងកាន់តែស៊ីជម្រៅ។ ទីផ្សារដែលបានស្នើឡើងនេះមានបំណងពង្រឹងការតភ្ជាប់រវាងកសិករ អ្នកលក់ដុំ និងអ្នកចែកចាយកម្ពុជា ជាមួយនឹងហេដ្ឋារចនាសម្ព័ន្ធផ្សារទំនើបៗ ដែលត្រូវបានបង្កើតឡើងចំគោលដៅដើម្បីជួយគាំទ្រដល់ការអភិវឌ្ឍរយៈពេលវែងនៃខ្សែសង្វាក់ផ្គត់ផ្គង់ចំណីអាហាររបស់ព្រះរាជាណាចក្រកម្ពុជា។

ជំនួបពិភាក្សាការងារនេះ បានបញ្ចប់ទៅក្នុងបរិយាកាសស្និទ្ធស្នាល និងយោគយល់ ដែលបង្ហាញយ៉ាងច្បាស់អំពីឆន្ទៈរួម រវាងរាជរដ្ឋាភិបាលកម្ពុជាតាមរយៈ ក.អ.ក. និងក្រុមហ៊ុន SEMMARIS ព្រមទាំងដៃគូវិនិយោគ ក្នុងការបន្តផ្តល់កិច្ចសហការជិតស្និទ្ធទៅវិញទៅមកលើគ្រប់ទិដ្ឋភាព។ គម្រោងបង្កើតផ្សារបោះដុំកសិផល និងអាហារស្រស់កម្រិតអន្តរជាតិនេះ ត្រូវបានវាយតម្លៃថាជាគម្រោងយុទ្ធសាស្ត្រប្រកបដោយគុណសម្បត្តិ និងសក្ដានុពលខ្ពស់ ដែលមិនត្រឹមតែចូលរួមធ្វើទំនើបកម្មប្រព័ន្ធឡូជីស្ទីកកសិកម្ម (Agro-Logistics) និងពង្រឹងខ្សែច្រវាក់ផ្គត់ផ្គង់អាហារ ប៉ុណ្ណោះទេ ប៉ុន្តែថែមទាំងជាកាតាលីករដ៏សំខាន់ក្នុងការបង្កើតតម្លៃបន្ថែមលើផលិផលកសិកម្មក្នុងស្រុក ធានាទីផ្សារ និងប្រាក់ចំណូលជូនបងប្អូនប្រជាកសិករ ព្រមទាំងលើកកម្ពស់សន្តិសុខស្បៀង និងជំរុញការនាំចេញកសិផលកម្ពុជាទៅកាន់ទីផ្សារតំបន់ និងសកលលោក នាពេលអនាគតផងដែរ៕